భారీ వర్షాలతో 580 అంగన్‌వాడీ భవనాలకు నష్టం

– నిర్మల్‌ జిల్లాలోనే 100కిపైగా
– నష్టాన్ని తేల్చిన స్త్రీ, శిశు సంక్షేమ శాఖ అధికారులు
– మరమ్మత్తులకు రూ.17 కోట్లు అవసరమని ప్రాథమిక అంచనా
– మంత్రి సీతక్క ఆదేశాలతో సురక్షిత భవనాల్లోకి తరలింపు
– అంగన్వాడీ కేంద్రాల సేవలకు అంతరాయం కలుగకుండా చూడాలని మంత్రిఆదేశం
నవతెలంగాణ బ్యూరో-హైదరాబాద్‌
రాష్ట్ర వ్యాప్తంగా కురుస్తున్న వర్షాల కారణంగా అంగన్‌వాడీ కేంద్రాలకు తీవ్ర నష్టం జరిగింది. అధికారుల సమగ్ర నివేదిక ప్రకారం సొంత భవనాల్లో నడుస్తున్న 440, రెంట్‌ ఫ్రీ భవనాల్లో నడుస్తున్న 140, మొత్తంగా 580 అంగన్‌వాడీ కేంద్రాలు దెబ్బతిన్నాయి. పైకప్పుల లీకేజీలు, గోడలు మరియు బేస్‌మెంట్‌లో పగుళ్లు, ఫ్లోర్‌ దెబ్బతినడం వంటి సమస్యలు ఎక్కువగా కనిపించాయి. ఒక్క నిర్మల్‌ జిల్లాల్లోనే 100కిపైగా అంగన్‌వాడీ కేంద్రాలకు నష్టం వాటిల్లింది. భద్రాద్రి కొత్తగూడెం జిల్లాలో 75, కామారెడ్డి జిల్లాలో 49, గద్వాల్‌ జిల్లాలో 40, హన్మకొండ జిల్లాలో 25, మెదక్‌ జిల్లాలో 25, వనపర్తి జిల్లాలో 22, ఆసిఫాబాద్‌ జిల్లాలో 20, ములుగు జిల్లాలో 20 చొప్పున భవనాలు అంగన్‌వాడీ కేంద్రాల నిర్వహణకు అక్కరకు రాకుండా పోయాయి. కొన్ని కేంద్రాల్లో వర్షపు నీరు లోపలకు చేరడంతో బియ్యం, పప్పులు, పాల డబ్బులు, నూనె ప్యాకెట్లు, స్టడీ మెటీరియల్‌ తడిసి ముద్దయ్యాయి.ఆ భవనాల మరమ్మత్తులకు భారీగా నిధులు అవసరమవుతాయని స్త్రీ, శిశు సంక్షేమ శాఖ అధికారులు అంచనా వేశారు. సొంత భవనాల మరమ్మత్తులకు రూ. 14 కోట్ల రూపాయలు, రెంట్‌ ఫ్రీ భవనాల మరమ్మత్తులకు రూ. 3 కోట్ల రూపాయలు ఖర్చవుతుందని లెక్కగట్టారు. ఈ నేపథ్యంలో తడిసిన భవనాల్లో అంగన్వాడీ సేవలు తక్షణం నిలిపివేయాలని, సమీపంలోని ప్రభుత్వ భవనాలు లేదా పాఠశాల ప్రాంగణాల్లో కేంద్రాలను తాత్కాలికంగా తరలించాలని అధికారులను మంత్రి సీతక్క ఆదేశించారు. అలాగే తడిసిపోయిన సరుకుల బదులుగా వెంటనే కొత్త సరుకులను సరఫరా చేయాలని స్పష్టం చేశారు. పిల్లల పోషకాహారం, ఆరోగ్య పరిరక్షణ, విద్య ఒక్కరోజు కూడా అంతరాయం లేకుండా కొనసాగాలని సూచించారు. సురక్షిత భవనాల్లో అంగన్‌వాడీ సేవలు కొనసాగించేలా చర్యలు తీసుకోవాలని ఆదేశించారు. మంత్రి ఆదేశాల మేరకు అంగన్‌వాడీ కేంద్రాలను తాత్కాలికంగా వేరే చోట్లకు తరలించే ప్రక్రియను అధికారులు మొదలుపెట్టారు. గర్భిణీలకు, చిన్నపిల్లలకు పౌష్టికాహారం అందించండంలో ఇబ్బందులు తలెత్తకుండా ప్రత్యేక చర్యలు చేపట్టారు.