గ్లోబల్‌ టెండర్ల ద్వారానే బిడ్ల ఖరారు
అభివృద్ధిని చూసి ఓర్వలేకే బీఆర్‌ఎస్‌ విమర్శలు
విద్యుత్‌ రంగాన్ని నిర్లక్ష్యం చేసిన గత సర్కార్‌
గ్రిడ్ల బేస్‌ లోడ్‌ కోసం థర్మల్‌ విద్యుత్‌ అనివార్యం
సోలార్‌, హైడెల్‌ విద్యుత్‌ ప్రాజెక్ట్‌లపై ప్రత్యేక దృష్టి : ఉప ముఖ్యమంత్రి మల్లు భట్టి విక్రమార్క
నవతెలంగాణ బ్యూరో – హైదరాబాద్‌
ప్రపంచంతో పోటీ పడుతూ వేగంగా అభివృద్ధి చెందుతున్న తెలంగాణ రాష్ట్రావసరాల కోసమే కొత్త విద్యుత్‌ ప్రాజెక్ట్‌లను ప్రతిపాదించామని ఉప ముఖ్యమంత్రి మల్లు భట్టి విక్రమార్క అన్నారు. మంత్రులు శ్రీధర్‌బాబు, పొన్నం ప్రభాకర్‌తో కలిసి శనివారం హైదరాబాద్‌లోని ప్రగతిభవన్‌లో ఇంధనరంగ అవసరాలు, రాష్ట్ర ప్రభుత్వం తీసుకుంటున్న చర్యలపై ఆయన పవర్‌ పాయింట్‌ ప్రజెంటేషన్‌ ఇచ్చారు. రామగుండం, పాల్వంచ, మక్తల్‌లలో మూడు కొత్త థర్మల్‌ పవర్‌ ప్లాంట్లను నిర్మించాలని రాష్ట్ర మంత్రివర్గం నిర్ణయించడంపై ప్రతిపక్షాలు చేస్తున్న విమర్శలను ఆయన తిప్పి కొట్టారు. గ్రిడ్‌ స్టెబిలిటీ, ప్రజా అవసరాల ను దృష్టిలో పెట్టుకుని కొత్త ప్రాజెక్ట్‌లు చేపట్టామని చెప్పారు. ”గ్రిడ్‌ను స్థిరంగా ఉంచటానికి థర్మల్‌ పవర్‌ కూడా తప్పనిసరి. పునర్వినియోగం మాత్రమే సరిపోదు. బేస్‌లోడ్‌ లేకపోతే తెలంగాణ కూడా స్పెయిన్‌ పోర్చుగల్‌ అనుభవాలని చవి చూడాల్సి ఉంటుంది. గ్రిడ్‌ కుప్పకూలితే రాష్ట్రానికి రోజుకు రూ.15 వేల నుంచి రూ.20 వేల కోట్ల నష్టం వాటిల్లుతుంది. ఆస్పత్రులు, రక్షణ, రవాణా, టెలికాం, డేటా సెంటర్లు మొదలగు కీలకరంగాలన్ని తీవ్రంగా దెబ్బతింటాయి.
జాతీయ లక్ష్యాలకు అనుగుణంగా గ్రిడ్‌లను రక్షించడానికి 5 వేల నుంచి 6వేల మెగావాట్ల థర్మల్‌ సామర్థ్యాన్ని పెంచాలి” అని భట్టి వివరించారు. పదేండ్ల పాలనలో విద్యుత్‌ రంగాన్ని బీఆర్‌ఎస్‌ నిర్లక్ష్యం చేసిందని ఆరోపించారు. కాలం చెల్లిన టెక్నాలజీని ఉపయోగించి రాష్ట్రానికి అన్యాయం చేసిందన్నారు. ప్రతిపక్షంలో ఉన్నప్పుడు తాము సబ్‌ క్రిటికల్‌ థర్మల్‌ ప్లాంట్లను వ్యతిరేకించామని గుర్తు చేశారు. అదే క్రమంలో కొత్తగా నిర్మించే ప్లాంట్లను సూపర్‌ క్రిటికల్‌ విధానంలో ఏర్పాటు చేస్తున్నామని స్పష్టం చేశారు. హిట్‌ హెడ్‌ వద్దనే థర్మల్‌ ప్లాంట్‌ ఏర్పాటు చేయాలనేది ప్రభుత్వ లక్ష్యమని భట్టి స్పష్టం చేశారు. కేంద్ర ప్రభుత్వ మార్గదర్శకాల మేరకు గ్లోబల్‌ టెండర్ల ద్వారా తక్కువ కోట్‌ చేసిన బిడ్లను ఖరారు చేస్తామని స్పష్టం చేశారు. ఇందులో ఎలాంటి అవినీతికి ఆస్కారం లేదని తేల్చి చెప్పారు. అభివృద్ధిని చూసి ఓర్వలేక, బీఆర్‌ఎస్‌ ఆరోపణలు చేస్తున్నదని దుయ్యబట్టారు.
అభివృద్ధికి విద్యుతే ప్రధానం
ఏ రంగం అభివృద్ధి చెందాలన్నా విద్యుత్‌ అత్యంత ప్రధానమనీ, అందుకే రాష్ట్రానికి వచ్చే పదేండ్ల విద్యుత్‌ డిమాండ్‌ను దృష్టిలో పెట్టుకుని ప్రణాళికలు సిద్ధం చేస్తున్నట్టు వివరించారు. సెంట్రల్‌ ఎలక్ట్రిసిటీ అథారిటీ(సీఈసీ) ఇచ్చిన రిపోర్ట్‌ ప్రకారం 2014 నుంచి 2019 వరకు రాష్ట్ర విద్యుత్‌ గ్రోత్‌ 14.5 శాతం కాగా, తమ ప్రభుత్వం అధికారం చేపట్టిన తర్వాత 2024-25లో ఒక్క ఏడాదిలోనే 9.8 శాతంగా నమోదైందని అన్నారు. మూసీ నది ప్రక్షాళన, ఫ్యూచర్‌ సిటీల నిర్మాణం, భారీ ఎత్తున వస్తున్న అంతర్జాతీయ పెట్టుబడులు, డేటా సెంటర్ల ఏర్పాటు, ఎలక్ట్రిక్‌ వాహనాలు, సాగునీటి అవసరాలు వంటి అంశాలను పరిగణనలోకి తీసుకుంటే రాష్ట్రానికి భారీ విద్యుత్‌ మద్దతు అవసరమని పేర్కొన్నారు. అలాగే 2047 నాటికి 3 ట్రిలియన్‌ డాలర్ల జీడీపీ లక్ష్యాన్ని చేరాలంటే రాష్ట్ర ఆర్థిక వ్యవస్థకు ఏటా 13శాతం ఆర్థిక వృద్ధి, విద్యుత్‌ డిమాండ్‌కు తగ్గట్టుగా ఏటా 10శాతం వృద్ధి సాధిస్తేనే లక్ష్యాన్ని అధిగమిస్తామని భట్టి స్పష్టం చేశారు.
గ్రీన్‌ ఎనర్జీపై ప్రత్యేక దృష్టి
కేంద్ర మార్గదర్శకాలు, ఫ్రీ పొల్యూషన్‌ నేపథ్యంలో రాష్ట్ర ప్రభుత్వం గ్రీన్‌ ఎనర్జీపై దృష్టి పెట్టిందని భట్టి అన్నారు. పారిస్‌ ఒప్పందం ప్రకారం 2030 నాటికి విద్యుత్‌ అవసరాల్లో 50 శాతం, 2070 నాటికి జీరో గ్రీన్‌ ఎనర్జీ వాడాల్సి ఉంటుందని పేర్కొన్నారు. కేంద్రప్రభుత్వ ఆదేశాల ప్రకారం దేశంలోని అన్ని రాష్ట్రాలకు ఈ నిబంధన వర్తిస్తుందని అన్నారు. దానికి తోడు పెరుగుతున్న విద్యుత్‌ డిమాండ్‌ను అధిగమించాలంటే గ్రీన్‌ ఎనర్జీని ఉత్పత్తి చేయాల్సిన అవసరం ఉందని భట్టి పేర్కొన్నారు. ఈ క్రమంలోనే విద్యుత్‌ కష్టాలను తగ్గించుకునేందుకు ప్రపంచమంతా గ్రీన్‌ ఎనర్జీ వైపు వెళ్తోందని తెలిపారు. ఈ క్రమంలోనే సోలార్‌, హైడెల్‌ విధానంలో పెద్ద ఎత్తున విద్యుత్‌ ఉత్పత్తి చేయాలని ప్రణాళికలు సిద్ధం చేస్తున్నట్టు చెప్పారు.
ఎనర్జీ స్టోరేజీ పట్ల నిర్లక్ష్యం
గత సర్కార్‌ ఎనర్జీ స్టోరేజీని నిర్లక్ష్యం చేసిందని భట్టి విమర్శించారు. ఎనర్జీ స్టోరేజీకి రౌండ్‌-ది-క్లాక్‌ విధానం అవసరమని పేర్కొన్నారు. బ్యాటరీ విధానం ఖరీదైన నేపథ్యంలో సర్కార్‌ పంప్డ్‌ స్టోరేజ్‌ ప్రాజెక్ట్‌లను ప్రతిపాదించిందని చెప్పారు. పక్క రాష్ట్రం ఆంధ్రప్రదేశ్‌తో పాటు దేశంలో అనేక రాష్ట్రాలు ఈ విధానంలో మిగులు విద్యుత్‌ను స్టోరేజీ చేస్తున్నాయని గుర్తు చేశారు. పీక్‌ స్టేజీలో ఆయా రాష్ట్రాలు స్టోరేజీ విద్యుత్‌ను వాడుకుంటున్నాయని అన్నారు. పంప్డ్‌ స్టోరేజీ విద్యుత్‌ తయారీకి తెలంగాణ భౌగోళికంగా అనుకూలమని తాము చేసిన సర్వేలో తేలిందని చెప్పారు. రాష్ట్ర వ్యాప్తంగా 12 ప్రాంతాలను పంప్డ్‌ స్టోరేజీ విద్యుత్‌ ఉత్పతి ప్రాంతాలుగా గుర్తించామని అన్నారు.అయితే వీటి నిర్మాణానికి 5నుంచి 6 సంవత్సరాల సమయం పడుతుందని మంత్రి వివరించారు. ఈ క్రమం లో రాష్ట్రంలో విద్యుత్‌ డిమాండ్‌ను అధిగమిం చేందుకు ఉత్పత్తి పెంపు, కొత్త ప్రాజెక్ట్‌ల నిర్మాణం, తక్కువ ధరకు కొనుగోలు తదితర చర్యలు తీసుకుంటు న్నామని భట్టి తెలిపారు. ప్రతిపక్షాలు ఎన్ని విమర్శలు చేసినా రాష్ట్ర ప్రయోజనాలే తమకు ముఖ్యమని స్పష్టం చేశారు. ఈ మీడియా సమావేశంలో ఇంధన శాఖ ముఖ్య కార్యదర్శి నవీన్‌మిట్టల్‌, ట్రాన్స్‌కో సీఎండీ కృష్ణ భాస్కర్‌, సింగరేణి సీఎండీ ఎన్‌. బలరామ్‌, ఎస్పీడీసీఎల్‌ సీఎండీ ముషారఫ్‌ ఇతర ఉన్నతాధికారులు పాల్గొన్నారు.
