అందర్నీ భయపెట్టే సినిమా

సాదలమ్మ ఫిల్మ్‌ ప్రొడక్షన్స్‌, బిల్వ స్టూడియోస్‌ బ్యానర్‌ల మీద నిఖిల్‌ ఎం.గౌడ నిర్మించిన చిత్రం ‘జిన్‌’. అమ్మిత్‌ రావ్‌, పర్వేజ్‌ సింబా, ప్రకాష్‌ తుమినాద్‌, రవి భట్‌, సంగీత ముఖ్య పాత్రల్ని పోషించారు. చిన్మయ్ రామ్‌ దర్శకత్వం వహించారు. ఈ చిత్రం ఈనెల 19న గ్రాండ్‌గా రిలీజ్‌ కాబోతోంది. ఈ క్రమంలో నిర్మాత నిఖిల్‌ ఎం గౌడ మీడియాతో చిత్ర విశేషాల్ని పంచుకున్నారు.
‘మాది బెంగళూరు. నాకు సినిమాల మీద ఉన్న ప్యాషన్‌, ఇష్టం తెలుసుకుని నా ఫ్రెండ్స్‌ ద్వారా దర్శకుడు చిన్మయ్ రామ్‌ పరిచయం అయ్యారు. ఆయన చెప్పిన ఈ ‘జిన్‌’ కథ నాకు చాలా నచ్చింది. కాన్సెప్ట్‌ కొత్తగా ఉంది కదా అని నిర్మించేందుకు ముందుకు వచ్చాను.

ఈ చిత్రాన్ని కర్ణాటక, ఆంధ్రా బార్డర్‌లో షూట్‌ చేశాం. ఇప్పటికే నేను సినిమాను చూశాను. కథ విన్నప్పుడు నేను ఏమైతే ఫీల్‌ అయ్యానో, ఊహించుకున్నానో తెరపైనా అదే ఫీలింగ్‌ కలిగింది. అందరినీ భయపెట్టేలా ఈ చిత్రం ఉంటుంది. ఈ మూవీకి అలెక్స్‌ ఇచ్చిన ఆర్‌ఆర్‌, సునీల్‌ హొన్నలి విజువల్స్‌ స్పెషల్‌ అట్రాక్షన్‌గా నిలుస్తాయి. చిన్మయ్ రామ్‌ గొప్పగా తెరపైకి తీసుకువచ్చారు. ఈ చిత్రం అందరికీ కొత్త అనుభూతిని ఇస్తుంది. మేం చేసిన ఈ కొత్త ప్రయోగాన్ని ఆదరిస్తారని ఆశిస్తున్నాను. మామూలుగా ఈ జిన్‌ కాన్సెప్ట్‌ చాలా మందికి తెలియదు. మేం ఈ మూవీలో కొత్త ప్రపంచాన్ని చూపించబోతున్నాం. అది తప్పకుండా మిమ్మల్ని మెప్పిస్తుంది’ అని నిఖిల్‌ ఎం గౌడ తెలిపారు.