మాటే మంత్రము

మన ఆలోచనా విధానం, ప్రవర్తన ఎలా ఉంటాయనేది మాటల ద్వారానే తెలుస్తుంది. అందుకే వీలైనంత వరకూ జాగ్రత్తగా మాట్లాడటం మంచిది. ఇతరులు బాధపడకుండా, ఇబ్బందిపడకుండా తెలియజేయగలగాలి. అలాగే మనమూ అభిప్రాయాలను తెలపాలి. కొంతమందికి ఎప్పుడు ఎలా మాట్లాడాలో తెలియదు. సరదాగా ఎవరైనా ఆట పట్టించినా వెంటనే గొడవకు దిగుతుంటారు. సంతోషంగా ఉండాల్సిన సమయాల్లోనూ ప్రతికూలంగా స్పందిస్తుంటారు. తమ మాటలతో అప్పటివరకూ సంతోషంగా ఉన్న వాతావరణాన్ని సీరియస్గా మార్చేస్తుంటారు. ‘మాటలే కదా.. ఏదో ఒకటి చెప్పేస్తే సరిపోతుందిలే’ అనుకోవడానికి లేదు. మనం అనుకునేదాని కంటే వీటిల్లో చాలా శక్తి ఉంటుంది. పదునైన మాటలు ఎదుటివారి మనసును గాయపరచడమే కాదు.. వారి ఆత్మ గౌరవాన్నీ, విశ్వాసాన్నీ దెబ్బతీయగలవనే విషయాన్ని గుర్తుంచుకోవాలి. రోజూ మన చుట్టూ ఎన్నో ఘటనలు జరుగుతుంటాయి.

వాటిల్లో అన్నీ సంతోషాన్ని పంచేవే ఉండవు కదా. నచ్చనివీ ఉండొచ్చు. అలాంటప్పుడు మన అభిప్రాయాన్ని కచ్చితంగా తెలియజేయడం తప్పుకాదు. కానీ అదే అదునుగా తీసుకుని మాటల తూటాలతో ఇతరుల మనసును ఛిద్రం చేయకూడదు. ఎదుటివారి మనసు నొచ్చుకోకుండా.. అదే సమయంలో వాళ్ల పొరపాటు వాళ్లకు అర్థమయ్యేలా చెప్పగలగాలి. ఇది కాస్త కష్టమేగానీ ఆచరించాలనుకుంటే అసాధ్యమేమీ కాదు. భావోద్వేగాలను నియంత్రించుకోలేక ఆవేశంతో కోపంగా మాట్లాడటం. ఆ తర్వాత అలా ఎందుకు చేశానా అని మధనపడే సందర్భాలు జీవితంలో ఎదురవుతూనే ఉంటాయి. అందుకే స్పందించడానికి ముందే కాస్త ఆలోచించగలిగితే ఆ తర్వాత తీరిగ్గా పశ్చాత్తాపపడాల్సిన అవసరమే ఉండదు. సాధారణంగా మన అభిప్రాయాలు, ఆలోచనలు, సమాచారం, భావోద్వేగాలను ఇతరులకు తెలియజేయడానికి మాటల సాయం తీసుకుంటాం. ఇవి విషయాన్ని స్పష్టపరిచేలా ఉండాలిగానీ అగౌరవపరిచేలా ఉండకూడదు. కించ పరిచేలా అసలే ఉండకూడదు. ఎవరైనా కావాలని రెచ్చగొట్టినట్టు అనిపిస్తే.. వెంటనే రెట్టింపు ఆవేశంతో జవాబు చెబుతాం. దీనికి ముందు ఒక్కసారి కాస్త ఆలోచించాలి.

వాళ్లు ఉద్దేశపూర్వకంగా రెచ్చగొట్టే విధంగా మాట్లాడారా? లేదా పొరబడుతున్నామా? మనమే ముందుగా తెలుసుకోవాలి. కొన్నిసార్లు మన మాటలు ఎదుటివారి ఆత్మవిశ్వాసాన్ని దెబ్బతీయడమే కాదు… అనుబంధం మీదా ప్రభావం చూపిస్తాయి. ఉదాహరణకు మనకు కష్టంగా అనిపించే అంశాలకు సంబంధించిన మెలకువలను స్నేహితుల నుంచి తెలుసుకుని ఉండొచ్చు. ఆవేశంతో మాట్లాడటం వల్ల ఇలాంటి సహకారం భవిష్యత్తులో దొరక్కపోవచ్చు కూడా. ఇలాంటి ప్రతికూల ఫలితాలకూ అవకాశం లేకపోలేదు. అందుకే చక్కగా కలిసిపోయి మాట్లాడుతూ అందరికీ ఆత్మబంధువులా వుండాలా? లేక మాటలతో అందరినీ చిరాకుపెడుతూ ‘వీళ్లు మహా బోరింగ్‌ అనుకునేలా ఉండాలా? అనేది మన చేతుల్లోనే ఉంటుంది. ఆలోచించి మాట్లాడే నైపుణ్యం చిన్నా పెద్దా తేడా లేకుండా అందరికీ అవసరమే. అలాగే జీవితంలోని ప్రతి సందర్భంలోనూ ఈ నేర్పు ఎంతగానో ఉపయోగపడుతుంది. చేతిలోంచి ఏదైనా వస్తువు జారి కిందపడితే వెంటనే జాగ్రత్తగా తీసుకోవచ్చు. పొరపాటున జారిపడబోయినా దేని సాయంతోనైనా లేచి నిలబడవచ్చు. కానీ మాట జారితే మాత్రం వెనక్కు తీసుకోలేం. అందుకే ఈ విషయంలో చాలా జాగ్రత్తగా ఉండాలి. మాట్లాడే ముందే ఆలోచించాలి.