ఏ గ్రేడ్ ధాన్యాన్ని బీ గ్రేడ్గా మార్చి రైతులను దోచుకుంటున్న మిల్లర్లు
సూదగాని సత్య రాజయ్య, తెలంగాణ రైతు సంఘం ఆలేరు మండల కార్యదర్శి
పిక్క గణేష్, తెలంగాణ రైతు సంఘం ఆలేరు మండల అధ్యక్షుడు
నవతెలంగాణ – ఆలేరు రూరల్
ఐకెపి, పిఎసిఎస్, ఎఫ్సీఐ ధాన్యం కొనుగోళ్లలో ప్రభుత్వం వెంటనే వేగం పెంచాలని తెలంగాణ రైతు సంఘం ఆలేరు మండల కార్యదర్శి సూదగాని సత్య రాజయ్య,మండల అధ్యక్షుడు పిక్క గణేష్ డిమాండ్ చేశారు.వరి ధాన్యం కొనుగోలు ప్రక్రియలో జరుగుతున్న జాప్యానికి నిరసనగా శుక్రవారం ఆలేరు మార్కెట్ యార్డు ముందు రైతు సంఘం ఆధ్వర్యంలో రైతులతో కలిసి ధర్నా నిర్వహించారు.ఈ సందర్భంగా సూదగాని సత్య రాజయ్య మాట్లాడుతూ వరి కోతలు ప్రారంభమై నెల రోజులు గడిచినా రైతులు ఐకెపి,పిఎసిఎస్,ఎఫ్సీఐ కొనుగోలు కేంద్రాల వద్ద ధాన్యంతో పడిగాపులు పడుతున్నారని విమర్శించారు. ప్రభుత్వం స్పందించకపోవడంతో రైతులు తీవ్ర ఇబ్బందులు ఎదుర్కొంటున్నారని అన్నారు.
మిల్లర్లు తూకం వేసే సమయంలో ఏ గ్రేడ్ ధాన్యంగా స్వీకరించి,మిల్లులకు తరలించిన తర్వాత బీ గ్రేడ్గా చూపిస్తూ రైతులను లక్షల రూపాయల మేర దోచుకుంటున్నారని ఆరోపించారు.ఈ దోపిడీని ప్రభుత్వం వెంటనే అరికట్టాలని డిమాండ్ చేశారు.మార్కెట్ యార్డుల్లో రైతులకు కనీస సౌకర్యాలు కూడా కల్పించడం లేదని ఆవేదన వ్యక్తం చేశారు.ధాన్యం ఆరబెట్టేందుకు టార్పాలిన్లు ఏర్పాటు చేయాలని,కల్లాలను సిమెంట్తో నిర్మించాలని,తాగునీటి వసతి కల్పించాలని కోరారు.ఎండ తీవ్రత నుంచి రైతులను రక్షించేందుకు తాత్కాలిక నీడ సదుపాయాలు ఏర్పాటు చేయాలని, వర్షాల సమయంలో నీరు నిల్వ కాకుండా కాలువలు,షెడ్లకు దోనులు ఏర్పాటు చేయాలని డిమాండ్ చేశారు.లారీలను త్వరితగతిన పంపించి ధాన్యాన్ని వెంటనే తరలించాలని, మే 15లోపు పూర్తిస్థాయిలో ధాన్యం కొనుగోళ్లు పూర్తి చేయాలని ప్రభుత్వాన్ని కోరారు. అలాగే తూకం వేసినప్పుడు ఏ గ్రేడ్ ధాన్యాన్ని అదే గ్రేడ్గా కొనుగోలు చేయాలని డిమాండ్ చేస్తూ తహసీల్దార్కు వినతిపత్రం సమర్పించారు.
ఈ కార్యక్రమంలో రైతు సంఘం నాయకులు దూపటి వెంకటేష్, మొరిగాడి రమేష్,కూలీ సంఘం నాయకులు జూకంటి పౌల్, సంగీ రాజు,ఘనగాని మల్లేశం,గ్యార అశోక్,సిద్ధులు,నంగునూరి మల్లేష్, ఏసీరెడ్డి మణెమ్మ,సింగిరెడ్డి అండాలు,గజ్జెల రాజమణి, భాగ్యమ్మ,సునీత,అనిత, లలిత, సువర్ణ తదితరులు పాల్గొన్నారు.
