పద్మశ్రీ విజేతలకు ‘చిరు’ సత్కారం

తెలుగు రాష్ట్రాల నుంచి ఐదుగురు ప్రముఖులతో పాటు సీనియర్‌ నటులు మురళీ మోహన్‌, రాజేంద్ర ప్రసాద్‌లు పద్మశ్రీ అవార్డులకు ఎంపిక కావడం సినీ పరిశ్రమకు విశేష గౌరవంగా నిలిచింది. ఈ ఆనందాన్ని మరింత ప్రత్యేకంగా మార్చారు చిరంజీవి. చిరంజీవి స్వయంగా మురళీ మోహన్‌, రాజేంద్ర ప్రసాద్‌ల నివాసాలకు వెళ్లి వారిని శాలువాలతో సత్కరించి, పుష్పగుచ్ఛాలు అందించి హృదయపూర్వక అభినందనలు తెలిపారు. తెలుగు సినిమాకు లభించిన ఈ జాతీయ గౌరవం ఒక మైలురాయిగా పేర్కొన్నారు. ఈ ముగ్గురి మధ్య జరిగిన ఆత్మీయ సంభాషణలు, జ్ఞాపకాల పంచుకోవడం.. దశాబ్దాల పాటు కలిసి ప్రయాణించిన అనుబంధాన్ని, పరస్పర గౌరవాన్ని ప్రతిబింబించాయి.

‘విశిష్ట వ్యక్తులను సత్కరించడం చాలా ఆనందాన్ని కలిగిస్తుంది. శ్రీ ధర్మజీ పద్మ విభూషణ్‌, మై డియర్‌ మమ్ముట్టీ, డాక్టర్‌ దత్తాత్రేయుడు నోరికి లభించిన పద్మ భూషణ్‌.. ఇవన్నీ దశాబ్దాల పాటు వారు చూపిన అంకితభావం, ప్రతిభకు దక్కిన గౌరవం. మిత్రులు మురళీ మోహన్‌, రాజేంద్ర ప్రసాద్‌, సోదరుడు మాధవన్‌, మన చాంపియన్‌ రోహిత్‌ శర్మ, అలాగే వరల్డ్‌కప్‌ విన్నింగ్‌ కెప్టెన్‌ హర్మన్‌ప్రీత్‌ కౌర్‌కు పద్మశ్రీ లభించడం ఎంతో సంతోషంగా ఉంది. కళలు, విజ్ఞానం, వైద్యం, సాహిత్యం, క్రీడలు వంటి రంగాల్లో విశేష సేవలు అందించిన 2026 సంవత్సరపు పద్మ అవార్డు గ్రహీతలకు నా హృదయపూర్వక అభినందనలు’ అని చిరు సోషల్‌మీడియా వేదికగా తెలిపారు.