– లీగల్ ఎయిడ్ అందుబాటులో
నవతెలంగాణ – కామారెడ్డి
ప్రస్తుతం ఆన్లైన్ లావాదేవీలు, సోషల్ మీడియా వినియోగం పెరిగిన నేపథ్యంలో సైబర్ నేరాలు రోజురోజుకు పెరుగుతున్నాయి. ఈ నేపథ్యంలో సైబర్ మోసాలకు గురైన బాధితులకు న్యాయం అందించేందుకు ప్రభుత్వం ఉచిత న్యాయసాయం (లీగల్ ఎయిడ్) సేవలను అందుబాటులోకి తీసుకువచ్చింది. ఈ సేవలను జిల్లా లీగల్ సర్వీసెస్ అథారిటీ ద్వారా బాధితులు పొందవచ్చు.
సైబర్ మోసాలు, ఆన్లైన్ ఫ్రాడ్, బ్యాంక్ అకౌంట్ హ్యాకింగ్, సోషల్ మీడియా మోసాలు, ఓటిపి ( OTP ) మోసాలు వంటి కేసుల్లో బాధితులు చాలా మంది న్యాయపరమైన సహాయం తీసుకోవడంలో ఇబ్బందులు పడుతున్నారు. ఈ సమస్యను దృష్టిలో ఉంచుకుని ప్రభుత్వం ఉచిత న్యాయ సలహా, కోర్టు వ్యవహారాల్లో సహాయం, కేసుల ఫైలింగ్ వంటి సేవలను లీగల్ ఎయిడ్ ద్వారా అందిస్తోంది. లీగల్ ఎయిడ్ ద్వారా లభించే సేవలు సైబర్ నేరాలపై ఉచిత న్యాయ సలహా, పోలీస్లకు తనకు జరిగిన అన్యాయంపై ఫిర్యాదు ఇవ్వడంలో సహాయం, కోర్టులో కేసు వేయడానికి ఉచిత న్యాయవాది, మోసపోయిన డబ్బు తిరిగి పొందేందుకు చట్టపరమైన మార్గదర్శనం.
సైబర్ క్రైమ్ ఫిర్యాదులపై పూర్తి న్యాయ సహాయం.. ఎవరు పొందవచ్చు ?
సైబర్ నేరాలకు గురైన సాధారణ ప్రజలు మహిళలు, విద్యార్థులు, ఆర్థికంగా బలహీన వర్గాలు వృద్ధులు, గ్రామీణ ప్రాంత ప్రజలు.
ఫిర్యాదు ఎలా చేయాలి ?
సైబర్ మోసాలకు గురైన వారు వెంటనే 1930 హెల్ప్లైన్ కు కాల్ చేయాలి లేదా ఆన్లైన్లో www.cybercrime.gov.in� వెబ్సైట్లో ఫిర్యాదు నమోదు చేయవచ్చు. అనంతరం జిల్లా లీగల్ సర్వీసెస్ అథారిటీని సంప్రదించి ఉచిత న్యాయసాయం పొందవచ్చు.
అవగాహన అవసరం
నిపుణుల మాటలో, సైబర్ నేరాలకు గురైనప్పుడు చాలా మంది భయంతో లేదా అవగాహన లేకపోవడంతో ఫిర్యాదు చేయరు. అయితే ప్రభుత్వం అందిస్తున్న లీగల్ ఎయిడ్ సేవలను వినియోగించుకుంటే బాధితులకు న్యాయం త్వరగా అందే అవకాశం ఉంటుంది. ప్రజలు అపరిచిత లింకులు, ఓటిపి ( OTP ) లు, బ్యాంక్ వివరాలు ఇతరులతో పంచుకోకుండా జాగ్రత్తలు పాటించాలని అధికారులు సూచిస్తున్నారు. సైబర్ నేరాలపై అప్రమత్తంగా ఉండటం ద్వారా మోసాలను నివారించవచ్చని న్యాయవాదులు తెలిపారు.
