నవతెలంగాణ -ఆత్మకూరు
99 రోజుల ప్రణాళికలో భాగంగా ఆత్మకూరు మండలంలోని ప్రతి గ్రామపంచాయతీలో వేసవి కాలంలో త్రాగునీటి సరఫరాకు ఎలాంటి లోటు ఉండకుండా అన్ని చర్యలు తీసుకున్నామని మండల పరిపాలన అధికారి (ఎంపీడీవో) శ్రీనివాస్ రెడ్డి శుక్రవారం వెల్లడించారు. ప్రజలకు నీటి సమస్యలు ఎదుర్కాకుండా చూడాలని పంచాయతీ సెక్రటరీలు, సర్పంచ్లకు ఆదేశాలు జారీ చేశారు.
వేసవి కాలంలో త్రాగునీటి సరఫరాకు పూర్తి చర్యలు
ఈ సందర్భంగా ఎంపీడీవో శ్రీనివాస్ రెడ్డి మాటల్లో “ప్రతి చేతిపంపును మరమ్మతు చేస్తున్నాం. కొన్ని కాలనీలకు పైపులైన్ ఎక్స్టెన్షన్ చేపడుతున్నాం. నీటి సరఫరాకు ఇబ్బంది ఉన్న చోట బావులను లీజుకు తీసుకొని ఓహెచ్ఆర్ ట్యాంకులకు నీరు సరఫరా చేస్తున్నాము. లీకేజీలు ఉన్న చోట తక్షణమే అరికట్టాలి. ప్రస్తుతం కేంద్ర ప్రభుత్వ నిధులు అందుబాటులో ఉన్నాయి. ఈ నిధులతో త్రాగునీటి సమస్యలను తక్షణం పరిష్కరించాలి.”
అదే సమయంలో పంచాయతీ కార్యదర్శులు, సర్పంచ్లకు ఎంపీడీవో కఠిన హెచ్చరిక జారీ చేశారు. “ఈ పనులు త్వరగా చేపట్టకపోతే కఠిన చర్యలు తీసుకుంటామని” స్పష్టం చేశారు. ప్రతి గ్రామంలో నీటి సరఫరా సాఫీగా జరగాలని, ఎలాంటి అశ్రద్ధ లేకుండా పనులు చేపట్టాలని ఆదేశించారు. ఈ చర్యలతో మండల ప్రజలు వేసవి కాలంలో నీటి సమస్యలు ఎదుర్కోకుండా ఉంటారని ఆశాభావం వ్యక్తం చేశారు.
