నవతెలంగాణ – హైదరాబాద్: కర్ణాటక రాజధాని బెంగళూరులో ఒక దారుణ సంఘటన వెలుగులోకి వచ్చింది. వివాహేతర సంబంధం ఉందన్న అనుమానంతో భార్యను భర్త అత్యంత కిరాతకంగా హత్య చేశాడు. అనంతరం, భార్య తలను తీసుకొని పోలీస్ స్టేషన్‌కు వెళ్లి లొంగిపోయాడు. ఈ దారుణ ఘటన శుక్రవారం రాత్రి ఆనేకల్ ప్రాంతంలో చోటుచేసుకుంది. పోలీసులు వెల్లడించిన వివరాల ప్రకారం, నిందితుడు శంకర్ (28), మృతురాలు మానస (26) భార్యాభర్తలు. కొంతకాలం క్రితం వీరు ఆనేకల్ పరిధిలోని హీలలిగె గ్రామంలో అద్దె ఇంట్లోకి మారారు. ఈ నెల 3న శంకర్ పనికి వెళుతున్నానని, మరుసటి రోజు ఉదయం వస్తానని భార్య మానసకు చెప్పి వెళ్లాడు. అయితే, పని తొందరగా ముగియడంతో అదే రోజు రాత్రి అనుకోకుండా ఇంటికి తిరిగి వచ్చాడు. ఆ సమయంలో మానస ఇంట్లో మరొక వ్యక్తితో కనిపించినట్లు శంకర్ ఆరోపిస్తున్నాడు. ఈ విషయమై వారిద్దరి మధ్య తీవ్ర వాగ్వాదం జరిగింది.
ఆ గొడవ తర్వాత మానస ఇంటి నుంచి వెళ్లిపోయినట్లు సమాచారం. ఆ తర్వాత కూడా మానస పలుమార్లు ఇంటికి వచ్చి శంకర్‌తో గొడవపడినట్లు తెలుస్తోంది. హత్య జరగడానికి ముందు రోజు రాత్రి కూడా మానస ఇంటికి వచ్చి గొడవ చేసిందని, దీంతో శంకర్ తీవ్ర ఆగ్రహానికి గురయ్యాడని సమాచారం. ఈ క్రమంలోనే శుక్రవారం రాత్రి వారిద్దరి మధ్య మరోసారి తీవ్రస్థాయిలో గొడవ జరిగింది. ఈ ఘర్షణలో సహనం కోల్పోయిన శంకర్, మానసను దారుణంగా కొట్టి, ఆపై తల నరికి చంపాడు. అనంతరం తెగిపడిన తలతో సూర్యనగర్ పోలీస్ స్టేషన్‌కు వెళ్లి లొంగిపోయాడు. ఈ ఘటనపై బెంగళూరు రూరల్ ఎస్పీ సీకే బాబా మాట్లాడుతూ, “నిన్న రాత్రి దంపతుల మధ్య గొడవ జరిగింది. ఈ క్రమంలో భర్త తన భార్య మానసను దారుణంగా కొట్టి, తల నరికి చంపాడు. అనంతరం తెగిపడిన తలను పోలీస్ స్టేషన్‌కు తీసుకొచ్చి నేరం అంగీకరించాడు. అతనిపై హత్య కేసు నమోదు చేశాం. మృతురాలు వివాహేతర సంబంధం పెట్టుకుందని, గత వారం పని నిమిత్తం బయటకు వెళ్లి త్వరగా తిరిగి వచ్చినప్పుడు ఈ విషయం అతనికి తెలిసిందని ప్రాథమికంగా తెలిసింది. గత వారం నుంచి ఈ విషయమై దంపతుల మధ్య గొడవలు జరుగుతున్నాయి. నిన్న కూడా ఇదే విషయమై గొడవపడగా, అది హత్యకు దారితీసింది” అని వివరించారు.
సమాచారం అందుకున్న సూర్యనగర్ పోలీసులు వెంటనే ఘటనా స్థలానికి చేరుకుని దర్యాప్తు ప్రారంభించారు.
