40 ఏళ్ల వయసులోనూ అసాధారణ ఫిట్‌నెస్‌.. శతకంతో చెలరేగిన డుప్లెసిస్

నవతెలంగాణ – హైదరాబాద్: అమెరికాలో జరుగుతున్న మేజ‌ర్ లీగ్ క్రికెట్ (ఎంఎల్‌సీ) టోర్నమెంట్‌లో పరుగుల వరద పారింది. టెక్సాస్ సూప‌ర్ కింగ్స్ జట్టు కెప్టెన్, దక్షిణాఫ్రికా మాజీ సారథి ఫాఫ్ డుప్లెసిస్ అద్భుతమైన శతకంతో హోరెత్తించాడు. శాన్ ఫ్రాన్సిస్కో జట్టుతో జరిగిన కీలక మ్యాచ్‌లో డుప్లెసిస్ ఆకాశమే హద్దుగా చెలరేగిపోయాడు. ఈ మ్యాచ్‌లో టాస్ గెలిచి బ్యాటింగ్‌కు దిగిన టెక్సాస్ సూపర్ కింగ్స్ తరఫున ఫాఫ్ డుప్లెసిస్ ఆరంభం నుంచే దూకుడు ప్రదర్శించాడు. ప్రత్యర్థి బౌలర్లపై ఎదురుదాడికి దిగిన అతడు, కేవలం 50 బంతుల్లోనే తన సెంచరీని పూర్తి చేసుకున్నాడు. ఈ మెరుపు ఇన్నింగ్స్‌లో డుప్లెసిస్ ఏకంగా ఏడు భారీ సిక్సర్లు, ఆరు ఫోర్లు బాదడం విశేషం. 40 ఏళ్ల వయసులోనూ అసాధారణ ఫిట్‌నెస్‌తో, యువ ఆటగాళ్లకు దీటుగా రాణిస్తూ డుప్లెసిస్ క్రీజులో పరుగుల సునామీ సృష్టించాడు. డుప్లెసిస్ సూప‌ర్‌ శతకంతో టెక్సాస్ సూపర్ కింగ్స్ జట్టు నిర్ణీత 20 ఓవర్లలో 198 పరుగుల భారీ స్కోరు చేసింది.