ప్రజాస్వామ్యంపై దాడి

బీహార్‌లో ఓటర్ల జాబితాల సవరణపై బృందాకరత్‌ తీవ్ర విమర్శలు
కాషాయపార్టీకి ఏజెంట్‌గా ఈసీ
రాంచీ : కేంద్ర ఎన్నికల సంఘంతో కలిసి రాష్ట్ర ఓటర్ల జాబితాలను పెద్దఎత్తున సవరించడం ద్వారా రాబోయే బీహార్‌ ఎన్నికలను బీజేపీ తారుమారు చేయాలని చూస్తోందని సీపీఐ(ఎం) సీనియర్‌ నాయకులు బృందా కరత్‌ ఆరోపించారు. ఇది ప్రజాస్వామ్య హక్కులు, రాజ్యాంగ విలువలపై దాడి అని ఆమె అన్నారు. కాషాయ పార్టీకి ఈసీ ఏజెంట్‌గా వ్యవహరిస్తోందని పేర్కొన్నారు. శుక్రవారం విలేకరుల సమావేశంలో బృందాకరత్‌ మాట్లాడుతూ ”బీహార్‌ ఎన్నికల్లో ఓడిపోతామని బీజేపీకి తెలుసు. అందువల్లే ఇంత తక్కువ సమయంలో పూర్తి ఓట్ల సవరణను నిర్వహించేలా వారు ఎన్నికల కమిషన్‌ను ఉపయోగించారు. ఆ సవరణలో, ఓటర్ల జాబితా నుంచి 52 లక్షల ఓట్లను తొలగించాలని నిర్ణయించారు. మీరు (బీజేపీ) పోల్‌ ప్యానెల్‌ను ఆ పార్టీకి ఎన్నికల ఏజెంట్‌గా చేశారు” అని ఆమె అన్నారు. రాజ్యాంగ అధికారాన్ని ఈసీ రాజీ పడి, దాని కార్యాలయంతో ముడిపడి ఉన్న ”ప్రతిష్టను నాశనం” చేసిందని కరత్‌ విమర్శించారు.
”ఒక రాజ్యాంగ సంస్థ గురించి ఇలా చెప్పడానికి నాకు బాధగా ఉంది. కానీ వారు ఈ కసరత్తు నిర్వహించిన విధానం, స్వతంత్ర సంస్థగా కాకుండా, బీజేపీ ఎన్నికల ఏజెంట్‌గా వ్యవహరిస్తున్నారని చూపిస్తోంది” అని బృందాకరత్‌ ఆరోపించారు.

కేంద్రం మొదట్లో బీహార్‌లో ఓటర్ల జాబితాల స్పెషల్‌ ఇంటెన్సివ్‌ రివిజన్‌ (ఎస్‌ఐఆర్‌)ను సమర్థించి ప్రభావితమైన ఓటర్లు విదేశీయులు లేదా అక్రమ వలసదారులు అని ఆరోపించిందని ఆమె పేర్కొన్నారు. ”ఇప్పుడు గ్యాస్‌ బెలూన్‌ పగిలిపోయిందనీ, అసలు ఆ వ్యక్తులు వారి నివాసాలలో లేరని వారు చెబుతున్నారు” అని అన్నారు. ”భారతదేశంలో కోట్లాది మంది వలస కార్మికులు ఉన్నారు. ఎవరైనా పని కారణంగా ఇంటి నుంచి దూరంగా ఉంటే, వారు తమ ఓటు హక్కును కోల్పోవాల్సిందేనా?”అని ఆవేదన వ్యక్తం చేశారు. ఈ చర్య బ్రిటిష్‌ పాలనను గుర్తుకు తెస్తుందని పేర్కొంటూ, కార్మిక వర్గాల ఓటు హక్కును తొలగించే ప్రయత్నాలు వలస రాజ్యాల కాలం నాటి ఆంక్షలను ప్రతిధ్వనిస్తాయని కరత్‌ అన్నారు. ఇది ఆస్తి యజమానులకు మాత్రమే ఓటు వేయడానికి వీలు కల్పిస్తుందని చెప్పారు.
”రాజ్యాంగం ప్రతి భారతీయ పౌరుడికి ఓటు హక్కును కల్పిస్తుంది. వీరు రోడ్లు నిర్మిస్తున్నందున లేదా నిర్మాణ ప్రదేశాలలో పనిచేస్తున్నందున ఇంట్లో ఉండకపోవచ్చు” అని ఆమె అన్నారు.

బీజేపీ మిత్రపక్షమైన టీడీపీ లేవనెత్తిన అభ్యంతరాలను ఉటంకిస్తూ, సవరణ ప్రక్రియకు వ్యతిరేకంగా ఇండియా బ్లాక్‌కు మించి సీపీఐ(ఎం) విస్తరించిందని వివరించారు.
”ఇది ప్రస్తుతం సీట్లు లేదా పొత్తుల గురించి కాదు. ఓటు హక్కును కాపాడుకోవడానికి మొత్తం ప్రతిపక్షాలు ఐక్యమయ్యాయి” అని ఆమె అన్నారు. అంతేకాక ప్రధాని మోడీపై దాడి చేస్తూ, ప్రస్తుతం కొనసాగుతున్న పార్లమెంట్‌ సమావేశం , కీలక చర్చల సమయంలో ఆయన గైర్హాజరవుతున్న తీరును కరత్‌ ప్రశ్నించారు.
”ఆపరేషన్‌ సిందూర్‌ వంటి క్లిష్టమైన అంశాలను చర్చకు లేవనెత్తుతున్నప్పుడు ప్రధాని ఎక్కడ ఉన్నారు? ఇది పార్లమెంటుకు అవమానం” అని బృందాకరత్‌ అన్నారు. ప్రతిపక్షాల ఆందోళనలను పరిష్కరించకుండా బీజేపీ చట్టాన్ని అణచివేయడానికి ప్రయత్నిస్తోందని ఆమె ఆరోపించారు.

ఉపరాష్ట్రపతి రాజీనామాను కూడా కరత్‌ ప్రస్తావించారు. ”వ్యక్తి ఆ పదవికి అర్హుడా లేదా అనేది వేరే విషయం. కానీ ఈ ప్రక్రియ ఉపరాష్ట్రపతి కార్యాలయం, రాజ్యసభ చైర్‌పర్సన్‌ గౌరవాన్ని దెబ్బతీసింది” అని ఆమె అన్నారు. మోడీ ప్రభుత్వం ప్రజాస్వామ్య సంస్థలను నీరుగార్చి, మితవాద శక్తులకు అధికారం ఇస్తోందని ఆమె ఆరోపించారు.
”అతను రెండవ అత్యంత ఎక్కువ కాలం పనిచేసిన ప్రధానమంత్రి కావచ్చు, కానీ భారత రాజ్యాంగాన్ని అణచివేయడానికి ప్రయత్నించిన మొదటి వ్యక్తిగా చరిత్రలో మోడీ నిలిచిపోతారు” అని ఆమె తెలిపారు.