మనిషికి కుటుంబం అవసరం అని తెలిపే సినిమా

హెచ్‌ఎన్‌జి సినిమాస్‌ ఎల్‌ఎల్‌పి బ్యానర్‌ పై ఉదయ్ శర్మ రచన, దర్శకత్వంలో మహదేవ్‌ గౌడ్‌, నాగరత్న నిర్మించిన చిత్రం ‘సఃకుటుంబానాం’. రామ్‌ కిరణ్‌, మేఘ ఆకాష్‌ జంటగా నటిస్తున్న ఈ చిత్రంలో రాజేంద్రప్రసాద్‌, బ్రహ్మానందం, శుభలేఖ సుధాకర్‌, సత్య తదితరులు కీలకపాత్రలో పోషిస్తున్నారు. ఈ సినిమా ఈనెల 12న ప్రేక్షకుల ముందుకు రానుంది. ఈ సందర్భంగా దర్శకుడు బుచ్చిబాబు సాన చేతుల మీదగా ఈ చిత్ర ట్రైలర్‌ను మేకర్స్‌ లాంచ్‌ చేశారు. ఈ సందర్భంగా ఆయన మాట్లాడుతూ, ‘నా స్నేహితుడు విక్రమ్‌ ఒక లైన్‌ సినిమాగా చేయాలి అనుకున్నాడు. కానీ తను చనిపోయాడు. అదే లైన్‌ను తన స్నేహితుడు ఉదయ్ ఒక కథగా మార్చి, సినిమాగా చేస్తున్నాను అని చెప్పినప్పుడు నేను చాలా సంతోషించాను. ఈ సినిమా సుకుమార్‌ ఐడియాలో ఉండబోతుంది. ఈ చిత్రం మంచి విజయం సాధించాలని మనస్ఫూర్తిగా కోరుకుంటున్నాను’ అని తెలిపారు.

‘ఇలాంటి కథ 48 సంవత్సరాలలో నేను ఎప్పుడూ వినలేదు, చేయలేదు. ఈ సినిమా అంత ప్రత్యేకంగా ఉండబోతుంది. ఈ సినిమాలో నాకు ఇచ్చిన పాత్ర చాలా ఛాలెంజింగ్‌ ఉంది. ఒక మనిషికి కుటుంబం ఎంత అవసరం అనేది తెలియజేస్తూ, కుటుంబ నేపథ్యంలో కుటుంబ గొప్పతనాన్ని, ప్రాముఖ్యతను తెలుపుతూ రానున్న చిత్రమిది’ అని రాజేంద్రప్రసాద్‌ చెప్పారు.బ్రహ్మానందం మాట్లాడుతూ, ‘ఈ సినిమాలో నా పాత్ర చాలా చిత్రంగా ఉండబోతుంది. ఈ చిత్రంలో హీరోగా నటించిన రామ్‌ కిరణ్‌ ఒక డాన్సర్‌. హీరో,హీరోయిన్‌ కలిసి ఉండే కొన్ని సీన్స్‌లో నేను నటించాను. నాకు చాలా ముచ్చటగా అనిపించింది’ అని తెలిపారు. నిర్మాత మహదేవ్‌ గౌడ్‌ మాట్లాడుతూ,’మా బ్యానర్‌ పై ఇది తొలి చిత్రం. ఈ సినిమా కథ నాకు చాలా నచ్చింది. ప్రేక్షకులు తప్పకుండా మా చిత్రాన్ని ఆదరిస్తారని ఆశిస్తున్నాను’ అని చెప్పారు.’నేను ఈ స్టేజ్‌ పై ఉండటానికి ముఖ్య కారణం నా స్నేహితుడు విక్రమ్‌, అర్జున్‌ సాయి, నిర్మాత మహదేవ్‌ గౌడ్‌. నా తొలి చిత్రానికి మణిశర్మ సంగీతం అందించడం అనేది ఒక గొప్ప విజయంగా భావిస్తున్నాను’ అని అన్నారు.