ఇవాళ్ల తెలంగాణలో బాల సాహిత్యంతో పాటు బాలలు సృజిస్తున్న సాహిత్యం వెలుగు వెన్నెలల్ని కురిపిస్తోంది. మున్నూరు కవితలు, నన్నూరు గేయాలు, నూరార్ల కథలుగా మన బడి పిల్లల సృజన కొనసాగుతోంది. బాల వికాసకారుల పెద్దన్న గరిపెల్లి అశోక్‌ నమోదు చేసిన ప్రకారం ఐదునూర్లకు పైగా మన పిల్లల కథల వయ్యిలు అచ్చయ్యాయంటే మామూలు విషయం కాదు. ఇది తెలంగాణ నేపథ్యంగా తెలుగునేల మీద తలెత్తిన కొత్త విప్లవం, సరికొత్త చైతన్యం! అయితే తొలివెట్టింది ఒక్కరే కావచ్చు కానీ ఈ చేతన… చైతన్యం.. ఒక్కరిద్దరి పనికాదు. అందుకు తెలంగాణ నేల మీద వందలాది బడులల్ల వేలాది మంది పిల్లలు.. తల్లితండ్రులు.. వికాసకారులు.. టీచర్ల భూమిక ఉంది. వారిలో ఒకరు డా. ఉప్పల పద్మ. నల్లగొండ జిల్లా మిర్యాలగూడలో 4 ఆగస్ట్‌, 1980న పుట్టారు. శ్రీమతి ఉప్పల అరుణమ్మ – శ్రీ కొండయ్య పద్మ తల్లితండ్రులు.
పద్మ కవయిత్రి, కథా రచయిత్రి, విమర్శకులు. ఎం.ఎ., ఎం.ఎస్సీ., ఎం.ఈడి చదివారు. ‘డా.ముదిగంటి సుజాతా రెడ్డి కథలు-సామాజిక, సాంస్కృతిక దృక్పథం’ అంశంపై ఉస్మానియా తెలుగుశాఖలో పరిశోధనచేసి పిహెచ్‌.డి. పట్టా పొందారు. కథ, కవిత్వం, సాహిత్య విమర్శ, ఏది రాసినా సామాజిక స్థితిగతులు, స్త్రీల పట్ల ప్రస్ఫుట సహానుభూతి, ఆధునిక జీవన సంక్లిష్టతలను తన రచనల్లో పట్టిచూపారు. ‘వికసించిన ఆకాశం’ తొలి కవితా సంపుటి. విమర్శకులుగా ‘ఆకురాయి’ వ్యాస సంపుటి తెచ్చారు.
కావ్యకర్తగానే కాక కార్యకర్తగా తెలిసిన పద్మ మిర్యాలగూడలో ‘సాహితీ కౌముది’ సాహిత్య సంస్థ స్థాపించి భాషా, సాహిత్య, సాంస్కృతిక కార్యక్రమాలు నిర్వహిస్తున్నారు. 2010 నుండి పాఠశాల విద్యాశాఖ నిర్వహించిన వివిధ కార్యశాలల్లో స్టేట్‌ రిసోర్స్‌పర్సన్‌గా పాల్గొంటున్నారు. తెలంగాణ పాఠ్య పుస్తక రచయిత్రి అయిన డా.పద్మ ‘టి-సాట్‌ నిపుణ’ (మన టి.వి.) వివిధ పోటీ పరీక్షల విద్యార్థుల కోసం తెలుగు పాఠాలు బోధించారు. విద్య, సాహిత్య, సాంస్కృతిక, సామాజిక రంగాల్లో తనదైన కృషితో ఎదిగారు. శ్రీమతి సుశీలా నారాయణరెడ్డి పుస్తక ప్రచురణ గౌరవంతో పాటు ‘వెంకటసుబ్బు స్మారక పురస్కారం, అమెరికా తెలుగు కళా సమితి దీపావళి కవితల పోటీ బహుమతి, అక్షరాల తోవ ఖమ్మం నుండి ‘వ్యంగ్య కవితా పురస్కారం’, వీరి నుండే ‘పశ్చాత్తాపం’ కథకు బహుమతి అందుకున్నారు. ‘బహుమతి తెచ్చిన కథలు’కు ఉపాధ్యాయ మాస పత్రిక పోటీలో బహుమతితో పాటు తెలంగాణ ప్రాంత ఉపాధ్యాయ సంఘం వారి ఉపాధ్యాయ పురస్కారం, సావిత్రీబాయి ఫూలే జిల్లా ఉత్తమ ఉపాధ్యాయ పురస్కారం, పుడమి మహిళా దినోత్సవ పురస్కారం, లయన్స్‌ క్లబ్‌ డైమండ్‌ నల్లగొండ ఉత్తమ మహిళా పురస్కారంతో పాటు మరికొన్ని విశిష్ఠ సత్కారాలు, పురస్కారాలు అందుకున్నారు.
పదిహేను సంవత్సరాలుగా తెలుగు ఉపాధ్యాయినిగా పనిచేస్తున్న పద్మ బాల వికాస కార్యకర్తగా ముందువరుసలో నిలిచి పిల్లల కోసం ‘సృజనాత్మక రచనా కార్యశాల’లు నిర్వహించారు. మిర్యాలగూడ జిల్లా పరిషత్‌ బాలికల ఉన్నత పాఠశాల విద్యార్థినుల కవితలను ‘మిర్యాలగూడ మిణుగురులు’గా తెచ్చారు. ‘నల్లగొండ జిల్లా బడి పిల్లలు’, గుండ్రాంపల్లి జిల్లా పరిషత్‌ విద్యార్థుల కథల సంకలనం ‘మంత్రదండం’ పద్మ ప్రచురించిన బడి పిల్లల రచనలు. ఇవేకాక ‘పొగడపూల దండ’, ‘తెరిపిలేని వాన’ సంకలనాలకు సంహ సంపాదకులుగా ఉన్నారు. కవిత్వం, బోధన, పాటలు- పాఠాలతో పాటు పిల్ల కోసం చక్కని చిక్కని గేయాలను, కథలను తాయిలంగా అందించిందీ పంతులమ్మ. వివిధ పత్రికలు, సంకలనాల్లో వీరి బాలల రచనలు అచ్చయ్యాయి. అలతి అలతి పదాలతో బాలల కోసం చక్కని గేయాలను రాశారు పద్మ. ”చకచక పోదాం మన బడికి/ మన ఊరి బడికి/ మన సర్కారు బడికి/ చకచక చకచక పోదాం” అంటూ పిల్లలను నిరంతరం బడిబాట పట్టించేందుకు రాసిన గేయమిది. ఇందులో సార్కారు బడి గొప్పతనాన్ని ‘ఫీజలుతో పనిలేదు’ అని రాస్తారు. ఇంకా… ‘సీ.ఎంలను, పీ.ఎంలను దిద్దిన బడి’ అంటూ కితాబు నిస్తుంది. ”చిట్టిచిట్టి పిల్లలు/ చిన్నారి పిల్లలు/ అమ్మచేతి గారెలు/ కమ్మగుంటయంట/ తమ్ముడికి రెండు/ నాకేమో నాలుగు” అంటూ ఆటపాటల గేయాన్ని ఎంత అందంగా చెబుతారో అంతే అందంగా – ”ఈ అంటే ఈగ/ ఎగురుతోంది చకచకా!/ ఈ అంటే ఈత/ నేర్చుకుందాం పదపద” అంటారు. పద్మ పిల్లల కోసం గేయాలతో పాటు కథలు రాశారు. ‘నక్కలకోట’ కథలో దారితప్పి ఒక అడవి నుండి మరో అడవికి వచ్చి చిక్కుకున్న చిన్నారి కుందేలు చెర వీడి తన వారిని చేరిన వైనాన్ని తెలిపే కథ. ఇందులో అడవిలోని నక్కల ఎత్తులు, జిత్తులను, బలవంతుడు బలహీనుడిని ఎలా వేధిస్తారో చెబుతారు. ఇందులో చిన్నారి పావురం మంచితనం, పెద్ద ఏనుగు సహాయం వంటివి మనం చూడవచ్చు. పిల్లల్లోని భయం, మూఢనమ్మకాలను తొలగించేలా స్ఫూర్తిని కలిగిస్తూ రాసిన కథ ‘మంత్రదండం’. బాలల మనస్తత్వాన్ని గురించి, చిరుతిండ్లు, చెడు తిండ్ల వల్ల కలిగే ఇబ్బందుల గురించి తెలిపే కథ ‘నేరుడు పండు కథ’. ఇందులో రోడ్డుపక్కన అపరిశుభ్రంగా ఉండే ఆహారం తింటే కలిగే వాటి గురించి నీతిబోధ లాగా కాకుండా అర్థమయ్యేలా, తెలిసేలా చెబుతారు రచయిత్రి. బాలవికాస. సృజనోద్యమంలో బడి జండాను పట్టుకుని నల్లగొండ వీధుల గుండా నడిచొస్తున్న ఉప్పల పద్మకు అభినందనలు. పరిశోధనను ముగించి డాక్టరేటు అందుకున్న పద్మ ఇకపై మరిన్ని బాలల రచనలు చేయాలని ఆకాంక్ష. జయహో! బాల సాహిత్యం!!
డా|| పత్తిపాక మోహన్‌
9966229548
