ఇప్పటి ప్రపంచంలో బిజినెస్ చేయాలంటే పెద్ద పెట్టుబడి, అధిక చదువు, మార్కెటింగ్ పరిజ్ఞానం అవసరమనే భావన చాలామందిలో ఉంది. కానీ ”ఒక్కో బుర్రకు ఒక్కో రకమైన ఐడియా” అన్నట్లు, సాధారణ ఆలోచనతోనే అసాధారణ మార్పులు తీసుకురావచ్చు. అలాంటి వినూత్న ఆలోచనకు చక్కటి ఉదాహరణగా నిలిచింది తెలంగాణలోని మారుమూల గ్రామం గుమ్మడవెల్లిలో జరిగిన ”వాట్సాప్ చింతపండు బిజినెస్”.
మొదట గ్రామ సమాచారాన్ని అందరికీ చేరవేయడానికి ఒక వాట్సాప్ గ్రూప్ ఏర్పాటు చేశారు. గ్రామంలో జరిగే కార్యక్రమాలు, అత్యవసర సమాచారం, ప్రభుత్వ పథకాలు వంటి విషయాలను పంచుకోవడం ఈ గ్రూప్ ప్రధాన ఉద్దేశం. కానీ కాలక్రమేణా ఈ గ్రూప్ వినియోగం ఒక కొత్త దిశలోకి మళ్లింది. గ్రామస్తులలో ఒకరు తమ ఇంట్లో ఉన్న చింతపండును అమ్మకానికి పెట్టాలని నిర్ణయించుకుని, అదే గ్రూప్లో పోస్ట్ చేశారు. మొదట ఇది ఒక చిన్న ప్రయత్నంగా కనిపించినా, దానికి వచ్చిన స్పందన అద్భుతం. గ్రామంలోని ఇతరులు కూడా తమ వద్ద ఉన్న పంటలు, ఇంటి ఉత్పత్తులు, అవసరమైన వస్తువులను అదే గ్రూప్ ద్వారా కొనుగోలు, అమ్మకాలకు ఉపయోగించడం ప్రారంభించారు. ఇలా ఒక సాధారణ సమాచార వేదిక, స్థానిక మార్కెట్గా మారింది.ఈ విధానం వల్ల మధ్యవర్తుల అవసరం తగ్గింది. రైతు లేదా విక్రేత నేరుగా వినియోగదారుని చేరుకోగలిగాడు.
దీనివల్ల ధరలు కూడా సమంజసంగా ఉండి, ఇరువురికీ లాభదాయకంగా మారింది. ముఖ్యంగా గ్రామీణ మహిళలు, వద్ధులు, చదువు తక్కువ ఉన్నవారు కూడా ఈ విధానం ద్వారా ఆర్థికంగా స్వయం సమద్ధిని పొందే అవకాశం పొందారు. ఇటీవలి కాలంలో ఏఐ (కృత్రిమ మేధస్సు) రాకతో మార్కెటింగ్ రంగంలో పెద్ద మార్పులు చోటు చేసుకుంటున్నాయి. అనేక సంప్రదాయ మార్కెటింగ్ ఉద్యోగాలు ప్రమాదంలో ఉన్నాయని భావిస్తున్న సమయంలో, ఇలాంటి స్థానిక మరియు సృజనాత్మక వ్యాపార నమూనాలు ఒక కొత్త ఆశను చూపిస్తున్నాయి. టెక్నాలజీని కేవలం వినోదానికి మాత్రమే కాకుండా, ఉపాధి అవకాశాల కోసం కూడా ఉపయోగించుకోవచ్చని ఈ ఉదాహరణ స్పష్టంగా తెలియజేస్తుంది.
వాట్సాప్ చింతపండు బిజినెస్ మనకు ఒక గొప్ప పాఠాన్ని నేర్పుతుంది – బిజినెస్ చేయడానికి పెద్ద వేదికలు, భారీ పెట్టుబడులు అవసరం లేదు; అవసరమైంది కేవలం ఒక మంచి ఆలోచన, దాన్ని అమలు చేయాలనే ధైర్యం. గ్రామీణ ప్రాంతాల్లో ఇలాంటి ఆవిష్కరణలు పెరిగితే, స్థానిక ఆర్థిక వ్యవస్థ బలోపేతం కావడంతో పాటు, యువతకు కూడా కొత్త అవకాశాలు ఏర్పడతాయి. మనం ఏమీ చదువుకున్నాం అన్నది ముఖ్యం కాదు కానీ మన బుర్ర ఎంత వాడుతున్నాం అన్నదే ముఖ్యం!! మీ ఆలోచనకు మరోసారి అభినందనలు.. ఈ వార్త దేశవ్యాప్తంగా వ్యాపించేలా చేస్తుంది అని ఆశిస్తున్నాను.
- కోట దామోదర్, 9391480475
