30 దేశాల్లో నిరసనల హౌరు
గిగ్‌ వర్కర్లు, గిడ్డంగుల సిబ్బంది ఆందోళనలు
జర్మనీలో మూడు వేల మంది సమ్మె…కనీస వేతనం, ఉద్యోగ భద్రత కోసం డిమాండ్‌
వాషింగ్టన్‌ : అమెజాన్‌ కార్మికులు ఉద్యమబాట పట్టారు. ‘మేక్‌ అమెజాన్‌ పే’ పేరుతో 30కి పైగా దేశాల్లో కార్మికులు శుక్రవారం నాడు తమ డిమాండ్ల సాధన కోసం ఆందోళన చేపట్టారు. అమెజాన్‌ విధానాలకు వ్యతిరేకంగా యూఎన్‌ఐ గ్లోబల్‌ కార్మిక సంఘం, మానవ హక్కుల సంస్థలు, పర్యావరణ వేత్తలు బ్లాక్‌ ఫ్రైడే (శుక్రవారం) నుంచి సైబర్‌ మండే (సోమవారం) వరకూ నిరసనలకు పిలుపునిచ్చారు. ఈ నిరసనల్లో వేలాది మంది కార్మికులు పాల్గొన్నారు. ఈ పిలుపులో భాగంగా భారత్‌లో వివిధ రాష్ట్రాల్లోని 20 నగరాల్లో అమెజాన్‌ గిడ్డంగి కార్మికులు, గిగ్‌ వర్కర్లు రోడ్డెక్కారని, ఢిల్లీలోని జంతర్‌ మంతర్‌ వద్ద ధర్నా నిర్వహించామని అమెజాన్‌ ఇండియన్‌ వర్కర్స్‌ యూనియన్‌ తెలిపింది. కనీస వేతనం, ఉద్యోగ భద్రత, మెరుగైన పని పరిస్థితులు కల్పించాలని ఈ సందర్భంగా యూనియన్‌ నాయకులు డిమాండ్‌ చేశారు. అలాగే జర్మనీలోని అమెజాన్‌ సంస్థలో మూడు వేల మంది కార్మికులు సమ్మె నిర్వహించారు. స్పెయిన్‌లో ఆ సంస్థ కార్యాలయం ఎదురుగా నిరసన కార్యక్రమం చేపట్టారు. అమెరికా అంతటా నిరసనలు జరిగాయి.
డెన్మార్క్‌, గ్రీస్‌, యునైటెడ్‌ కింగ్‌డమ్‌, పోలాండ్‌, లక్సెంబర్గ్‌, ఆస్ట్రేలియా, బ్రెజిల్‌, ఇండోనేషియా వంటి అనేక దేశాల్లో నిరసన ప్రదర్శనలతో పాటు సంఘీభావ కార్యక్రమాలు నిర్వహించారు. ప్రొగ్రెసివ్‌ ఇంటర్నేషనల్‌ పొలిటికల్‌ ఆర్గనైజేషన్‌ కో-ఆర్డినేటర్‌ డేవిడ్‌ అడ్లర్‌ మాట్లాడుతూ.. కార్మికుల హక్కులను అమెజాన్‌ కాలరాస్తోందని, వారి సంక్షేమాన్ని పట్టించుకోవడం లేదని విమర్శించారు. ఐసీఈ దాడుల నుంచి పాలస్తీనియన్ల అణచివేత వరకూ అమెజాన్‌ సాంకేతికతను ఉపయోగించుకుంటోందని తెలిపారు. కంపెనీ ఉత్పాదక పెరిగిపోతుందని, దానితో కఠినమైన పరిస్థితులు తలెత్తాయని ఆయన వివరించారు. దీంతో కార్మికులు బలవంతంగా సంక్షోభంలోకి నెట్టబడ్డారని ఆవేదన వ్యక్తం చేశారు. గౌరవం, భద్రత లేదని, అనారోగ్యంతో వరుసగా మూడు రోజులు సెలవు పెడితే ఉద్యోగం నుంచి తొలగిస్తున్నారని అన్నారు. దీనిపై అమెజాన్‌ స్పందిస్తూ శుక్రవారం ప్రకటన విడుదల చేసింది. కార్మికులకు గొప్ప జీతాలు ఇస్తున్నామని, అవకాశాలు కల్పిస్తున్నామని, నిరసనల ప్రభావం కంపెనీపై లేదని తెలిపింది. మరోపక్క యూఎన్‌ గ్లోబల్‌ వర్కర్స్‌ యూనియన్‌ సోమవారం వరకూ ఆందోళనలు కొనసాగుతాయని ప్రకటించింది.
