మరోసారి వడ్డీ రేట్ల పెంపునకు అవకాశం
ఇక్రా ప్రధాన ఆర్థికవేత్త అదితి నాయర్‌ అంచనా
ముంబయి: పశ్చిమాసియా సంక్షోభంతో కేంద్ర ఖజానాపై భారీ ఆర్థిక భారం పడుతోందని ప్రముఖ రేటింగ్‌ సంస్థ ఇక్రా అంచనా వేసింది. యుద్ధం కారణంగా పెరిగిన ఇంధన ధరలు, సబ్సిడీల వ్యయం, పన్ను ఆదాయాల్లో తగ్గుదలతో ఇప్పటివరకు ప్రభుత్వంపై దాదాపు రూ.1.35 లక్షల కోట్ల మేర ఆర్థిక ప్రభావం పడే అవకాశం ఉందని పేర్కొంది. ఎరువులు, వంటగ్యాస్‌ సబ్సిడీలకు అదనపు కేటాయింపులు, పెట్రోలియం ఉత్పత్తులపై ఎక్సైజ్‌ సుంకాల తగ్గింపుతో ఆదాయం పడిపోవడం ప్రభుత్వ ఆర్థిక పరిస్థితిపై ఒత్తిడి పెంచుతున్నాయని ఇక్రా ప్రధాన ఆర్థికవేత్త అదితి నాయర్‌ పేర్కొన్నారు. చమురు మార్కెటింగ్‌ సంస్థల నుంచి వచ్చే డివిడెండ్లు, ప్రత్యక్ష పన్నుల వసూళ్లపైనా ప్రభావం ఉండవచ్చన్నారు. అయితే సాధారణ వ్యయాల్లో మిగులు, కొన్ని పన్ను వసూళ్లలో పెరుగుదల ద్వారా ఈ భారాన్ని ప్రభుత్వం కొంతవరకు భరించగలదని అభిప్రాయ పడ్డారు. బంగారం, వెండి దిగుమతులపై కస్టమ్స్‌ సుంకాల వసూళ్లు అంచనాల కంటే ఎక్కువగా ఉండటం కొంత ఊరట నివ్వవచ్చన్నారు. పశ్చిమాసియా సంక్షోభ ప్రభావం ప్రభుత్వ ఖజానాకే పరిమితం కాకుండా సామాన్య ప్రజలపై ధరల భారాన్ని పెంచే ప్రమాదముందని ఇక్రా హెచ్చరించింది. అక్టోబర్‌లో రిటైల్‌ ద్రవ్యోల్బణం 6 శాతం దాటవచ్చని అంచనా వేసింది. ధరల ఒత్తిడిని నియంత్రించేందుకు ఆర్‌బిఐ డిసెంబర్‌ ద్రవ్య పరపతి సమీక్షలో మరోసారి వడ్డీ రేట్లు పెంచే అవకాశం ఉందని నాయర్‌ తెలిపారు. అంతర్జాతీయ ముడిచమురు ధరల పెరుగుదల కారణంగా దేశీయంగా పెట్రోల్‌, డీజిల్‌ ధరలు పెరిగితే వచ్చే ఫిబ్రవరిలోనూ మరో విడత వడ్డీ పెంపు ఉండవచ్చని అభిప్రాయపడ్డారు. వడ్డీ రేట్ల పెరుగుదల రుణాల వ్యయాన్ని అధికం చేసి వినియోగ డిమాండ్‌పై ఒత్తిడి పెంచే అవకాశం ఉంది. పట్టణ, గ్రామీణ వినియోగదారుల విశ్వాసం తగ్గుతున్నప్పటికీ ఆర్థిక కార్యకలాపాలకు సంబంధించిన స్వల్పకాలిక సూచీలు ప్రస్తుతం సానుకూలంగానే ఉన్నాయని నాయర్‌ పేర్కొన్నారు. అయితే వర్షాకాల పరిస్థితుల ప్రభావం గ్రామీణ డిమాండ్‌, ఆహార ద్రవ్యోల్బణంపై ఆర్థిక సంవత్సరం ద్వితీయార్ధంలో మరింత స్పష్టంగా కనిపించవచ్చన్నారు. ముఖ్యంగా పండుగల సీజన్‌ అనంతరం వినియోగ వ్యయంలో మార్పులు చోటుచేసుకునే అవకాశముందని తెలిపారు. ముడిసరుకుల ధరలు అధిక స్థాయిలో కొనసాగితే కంపెనీల లాభదాయకత దెబ్బతినడంతోపాటు వినియోగదారుల కొనుగోలు శక్తిపైనా ఒత్తిడి పెరుగుతుందని హెచ్చరించారు.
కామెంట్‌లు (0)