Magazines

నవతెలంగాణ మంచాల విలేకరి పల్లాటి జగన్‌ మృతి

31 అక్టోబర్, 2026

Death of 'Nava Telangana' reporter from Manchal, Pallati Jagan
వెబ్ డెస్క్

ప్రచురించబడింది అక్టో 31, 2026 | 2 నిమిషాల చదవడం

నవతెలంగాణ – యాచారం: రంగారెడ్డి జిల్లా మంచాల మండల నవతెలంగాణ దినపత్రిక రిపోర్టర్, ప్రజా ఉద్యమాల్లో చురుకైన పాత్ర పోషించిన పల్నాటి జగన్ (51) శుక్రవారం రాత్రి గుండెపోటుతో అకాల మరణం చెందారు. ఆయన మృతితో మంచాల మండలంలో తీవ్ర విషాదం నెలకొంది. ముఖ్యంగా తోటి జర్నలిస్టులు ఆయన మృతిని జీర్ణించుకోలేక కన్నీటి పర్యంతమయ్యారు.

ఉద్యమ ప్రస్థానం.. ప్రజా సేవే లక్ష్యంగా..

పల్నాటి జగన్ విద్యార్థి దశలోనే ఎస్ఎఫ్ఐ ఉద్యమం ద్వారా ప్రజా ఉద్యమాల్లోకి అడుగుపెట్టారు. అనంతరం రైతు సంఘం రాష్ట్ర కార్యాలయంలో సేవలందించారు. ప్రజా ప్రయోజనాలే ధ్యేయంగా సాగిన ఆయన ప్రస్థానంలో భాగంగా 2015 నుంచి సీపీఐ(ఎం) మంచాల మండల కమిటీ సభ్యునిగా కొనసాగుతున్నారు. ప్రజల సమస్యలను వెలుగులోకి తీసుకురావడంతో పాటు, వారి గొంతుకగా నిలిచేందుకు 2017 నుంచి నవతెలంగాణ దినపత్రిక మంచాల మండల రిపోర్టర్‌గా బాధ్యతలు నిర్వర్తిస్తున్నారు. ప్రస్తుతం తెలంగాణ వర్కింగ్ జర్నలిస్ట్స్ ఫెడరేషన్ (TWJF) ఇబ్రహీంపట్నం డివిజన్ కార్యదర్శిగా కొనసాగుతున్నారు. రాజకీయ, సామాజిక రంగాల్లోనూ తనదైన ముద్ర వేసుకున్న జగన్, సీపీఐ(ఎం) తరఫున నోముల గ్రామ పంచాయతీ వార్డు సభ్యునిగా విజయం సాధించి ప్రజలకు సేవలందించారు. అనంతరం 2019లో లింగంపల్లి ఎంపీటీసీ స్థానానికి సీపీఐ(ఎం) అభ్యర్థిగా పోటీ చేసి స్వల్ప ఓట్ల తేడాతో ఓటమి పాలయ్యారు. విద్యార్థి దశ నుంచి చివరి వరకు ప్రజాతంత్ర, ప్రజా ఉద్యమాల్లో చురుకుగా పాల్గొంటూ ప్రజలతో మమేకమైన ఆయన సేవలు చిరస్మరణీయంగా నిలిచిపోనున్నాయి.

తీవ్ర విషాదంలో కుటుంబం..

గత కొంతకాలంగా గుండె సంబంధిత సమస్యలతో బాధపడుతున్న జగన్‌కు ఇప్పటికే రెండు స్టెంట్లు వేశారు. ఈ క్రమంలో శుక్రవారం రాత్రి సుమారు 10 గంటల సమయంలో తీవ్ర గుండెనొప్పి రావడంతో కుటుంబ సభ్యులు వెంటనే ఇబ్రహీంపట్నం ఆసుపత్రికి తరలించారు. ఆయన ఆరోగ్య పరిస్థితి విషమించడంతో మెరుగైన వైద్యం కోసం వైద్యుల సూచన మేరకు హైదరాబాద్‌కు తరలిస్తుండగా మార్గమధ్యంలోనే తుదిశ్వాస విడిచారు. జగన్‌కు భార్య లక్ష్మితో పాటు ఇద్దరు కుమారులు ఉన్నారు. పెద్ద కుమారుడు హేమచంద్ర ఇంటర్మీడియట్ చదువుతుండగా, చిన్న కుమారుడు రాఘవ ఎనిమిదో తరగతి అభ్యసిస్తున్నాడు. కుటుంబానికి అండగా నిలిచిన జగన్ ఆకస్మిక మరణంతో కుటుంబ సభ్యులు తీవ్ర విషాదంలో మునిగిపోయారు.

సంతాపాల వెల్లువ.. నివాళులర్పించిన ప్రముఖులు

పల్నాటి జగన్ మరణవార్త తెలుసుకున్న వెంటనే తోటి జర్నలిస్టులు, వివిధ రాజకీయ పార్టీల నాయకులు, ప్రజా సంఘాల ప్రతినిధులు పెద్ద సంఖ్యలో ఆయన నివాసానికి చేరుకున్నారు. ఆయన భౌతికకాయంపై పూలమాలలు ఉంచి ఘనంగా నివాళులర్పించారు. ఈ సందర్భంగా పలువురు జర్నలిస్టులు కన్నీటి పర్యంతమయ్యారు.

జగన్ ఆత్మకు శాంతి చేకూరాలని ప్రార్థిస్తూ, ఆయన కుటుంబ సభ్యులకు ప్రగాఢ సానుభూతి తెలిపారు. ప్రజా ఉద్యమాల్లోనూ, జర్నలిజం రంగంలోనూ ఆయన చేసిన సేవలను ఈ సందర్భంగా పలువురు గుర్తుచేసుకున్నారు. ఆయన మృతి ప్రజా ఉద్యమాలకు, జర్నలిస్టు లోకానికి తీరని లోటని పేర్కొన్నారు. జగన్ ఆశయాలను, ఆయన సాగించిన ప్రజా పోరాట స్ఫూర్తిని ముందుకు తీసుకెళ్తామని తెలిపారు.


ట్యాగ్‌లు

సంబంధిత వార్తలు

కామెంట్‌లు (0)

హోమ్