నవతెలంగాణ - హైదరాబాద్ : సూపర్‌స్టార్‌ రజనీకాంత్‌ కథానాయకుడిగా నెల్సన్‌ దిలీప్‌కుమార్‌ దర్శకత్వంలో తెరకెక్కిన ‘జైలర్‌ 2’ చిత్రం బాక్సాఫీస్‌ వద్ద భారీ వసూళ్లు సాధించినట్లు కథనంలో పేర్కొన్నారు. ట్రేడ్‌ వర్గాల ప్రాథమిక అంచనాల ప్రకారం.. ఈ సినిమా తొలిరోజు ప్రపంచవ్యాప్తంగా రూ.125.25 కోట్ల గ్రాస్‌ కలెక్షన్లు రాబట్టింది. ట్రేడ్‌ ట్రాకర్‌ సాక్‌నిల్క్‌ వివరాల ప్రకారం.. భారత్‌లో ఈ చిత్రం రూ.59.70 కోట్ల నెట్‌, రూ.70.25 కోట్ల గ్రాస్‌ వసూళ్లు సాధించింది. దేశవ్యాప్తంగా 16,599 షోల ద్వారా సగటున 55.4 శాతం ఆక్యుపెన్సీ నమోదైంది. విదేశాల్లోనూ సత్తా చాటిన ఈ సినిమా తొలి రోజు రూ.55 కోట్ల గ్రాస్‌ వసూలు చేసినట్లు అంచనాలు వెల్లడించాయి. తమిళ వెర్షన్‌ వసూళ్లలో అగ్రస్థానంలో నిలిచింది. తమిళనాడులో 9,326 షోల ద్వారా రూ.43.35 కోట్ల నెట్‌ వసూళ్లు సాధించి, 70.8 శాతం ఆక్యుపెన్సీని నమోదు చేసింది. తెలుగు రాష్ట్రాల్లో రూ.12.50 కోట్లు, హిందీలో రూ.3.50 కోట్లు, కన్నడలో రూ.35 లక్షల వసూళ్లు రాబట్టినట్లు సమాచారం. మొత్తంగా తొలి రోజే 37 లక్షలకు పైగా ప్రేక్షకులు ఈ చిత్రాన్ని వీక్షించినట్లు ట్రేడ్‌ వర్గాల అంచనా.