ఈటీవీ విన్‌లో ‘గొల్ల రామవ్వ’

తాళ్ళూరి రామేశ్వరి టైటిల్‌ పాత్ర పోషించిన చిత్రం ‘గొల్ల రామవ్వ’. ఈ సినిమా తెలుగువారి గుండెల్లో చిరస్థాయిగా నిలిచిపోతుందని ఈ చిత్ర ట్రైలర్‌ ఆవిష్కరణ వేడుకలో పాల్గొన్న ముఖ్య అతిథులు కితాబిచ్చారు. స్వర్గీయ భారత ప్రధాని పి.వి.నరసింహారావు రాసిన తెలంగాణ సాయుధ పోరాటగాథకు దశ్యరూపంగా ముళ్లపూడి వరా దర్శకత్వంలో తెరకెక్కిన ఈ చిత్రాన్ని సుచేత డ్రీమ్‌ వర్క్స్‌ ప్రొడక్షన్‌ – వర్మ డ్రీమ్‌ క్రియేషన్స్‌ పతాకాలపై… రామ్‌ విశ్వాస్‌ హనూర్కర్‌ – రాఘవేంద్రవర్మ (బుజ్జి) సంయుక్తంగా నిర్మించారు. అజహర్‌ షేక్‌ కార్యనిర్వాహక నిర్మాతగా కీలక బాధ్యతలు నిర్వహించడంతో పాటు, సాహిత్యం సమకూర్చారు. ఈటీవీ విన్‌ కోసం ‘మౌనమే నీ భాష’ చిత్రాన్ని నిర్మించి, వీక్షకుల నుంచి విశేష ఆదరణ పొందిన టీమ్‌ నుంచి వస్తున్న ‘గొల్ల రామవ్వ’ ఈనెల 25 నుంచి ఈటీవీ విన్‌లో స్ట్రీమింగ్‌ కానుంది.

ఈ చిత్ర ట్రైలర్‌ లాంచ్‌ వేడుకలో పి.వి.నరసింహారావు తనయులు పి.వి.ప్రభాకరరావు, తనయ – బారాస ఎమ్‌.ఎల్‌.సి. సురభి వాణీదేవి, గీత రచయితలు కాసర్ల శ్యామ్‌, మౌనశ్రీ మల్లిక్‌, నటులు రాజీవ్‌ కనకాల, ‘రజాకార్‌’ దర్శకులు యాటా సత్యనారాయణ, సీనియర్‌ దర్శకులు ఉదయభాస్కర్‌ పాల్గొని చిత్ర విజయాన్ని ఆకాంక్షించారు. మా నాన్న రాసిన గొప్ప కథల్లో ఒకటైన ‘గొల్ల రామవ్వ’ను ఎంతో గొప్పగా తెరకెక్కించారని వాణీదేవి ప్రశంసించారు. అల్లు గీత, అన్విత్‌, మణి మంతెన తదితరులు నటించిన ఈచిత్రానికి గానం : వరం, సంగీతం: సాయి మధుకర్‌, ఛాయాగ్రహణం: గంగమోని శేఖర్‌, కూర్పు: రాఘవేంద్రవర్మ, రచన: బయ్యవరపు రవి, కార్యనిర్వాహక నిర్మాత – సాహిత్యం: అజహర్‌ షేక్‌, నిర్మాతలు: రామ్‌ విశ్వాస్‌ హనూర్కర్‌ – రాఘవేంద్రవర్మ (బుజ్జి), చిత్రనువాదం – దర్శకత్వం: ముళ్ళపూడి వరా.