రేపు సద్దుల బతుకమ్మ వేడుకలు..
చీరల పంపిణీపై రాని స్పష్టత..
ప్రభుత్వ నిర్ణయం కోసం ఎదురుచూస్తున్న మహిళలు..
నవతెలంగాణ – మల్హర్ రావు
బతుకమ్మ పండుగను పురస్కరించుకుని ఆడపడుచులకు రాష్ట్ర ప్రభుత్వం అందించే కానుకలు ఈసారి లేనట్లుగానే కనిపిస్తోంది. బతుకమ్మ చీరల పంపిణీనికి స్పష్టత లేదు. స్వయం సహాయక సంఘాల్లోని మహిళలకు మాత్రమే ఏడాదికి రెండు చీరలను ఉచితంగా అందజేస్తామని ఇటీవల జరిగిన కార్యక్రమంలో సీఎం రేవంత్ రెడ్డి ప్రకటించారు.
కానీ దానిపై ప్రభుత్వం నుంచి ఇప్పటి వరకు ఎలాంటి నిర్ణయం వెలువడలేదు. మరోవైపు సద్దుల బతుకమ్మ వేడుకలు రేపు ప్రారంభం కానున్నాయి. ఆ డపడచులు తీరొక్కపూలతో పేర్చిన బతు కమ్మలతో సందడి చేస్తున్నారు. అయితే ప్రభుత్వం బతుకమ్మ కానుకగా ఏం ఇస్తుందా? అనే దానిపై మహిళలు ఆసక్తిగా ఎదురుచూస్తున్నారు. రాష్ట్ర ప్రభుత్వం ఆదిశగా దష్టి సారించ కపోవడంతో ఈ యేడు కానుకలు లేనట్లుగానే తెలుస్తోంది.
గత ప్రభుత్వంలో చీరల పంపిణీ..
గత బీఆర్ఎస్ ప్రభుత్వం బతుకమ్మ పండుగను పురస్కరించుకుని కొన్నేళ్ల పాటు ఆడప డుచులకు చీరలను కానుకగా అందించింది. బతుకమ్మ వేడుకల ప్రారంభానికి ముందుగానే మండలానికి అవసరమైన చీరలను పంపించేది. వాటిని డీఆర్డీఏ, మెప్మా శాఖల ఆధ్వర్యంలో ప్రత్యేక కేంద్రాలను ఏర్పాటు చేసి ప్రజాప్రతినిధుల చేతుల మీదుగా ఎంతో ఆర్భాటంగా పంపిణీ చేసేవారు. రేషన్ కార్డు కలిగి ఉండి, 18 ఏళ్ల వయస్సు నిండిన యువతులు, మహిళలందరికీ ఈ చీరలను అందించేవారు.
రెండేళ్ల క్రితం మండలంలో 15 గ్రామాలకు గానూ 8,906 చీరలను ప్రభుత్వం పంపిణీ చేసింది. అయితే బీఆర్ఎస్ ప్రభుత్వం అందించిన చీరల నాణ్యతపైన అప్పట్లో పలువురు మహిళలు అసహనం వ్యక్తం చేశారు. పలుచోట్ల చీరలను దగ్ధం చేసిన మహిళలు అప్పటి ప్రభుత్వ తీరును నిరసిస్తూ ఆందోళనలను సైతం చేపట్టారు. అప్పుడు ప్రతి పక్షంలో ఉన్న కాంగ్రెస్ సైతం చీరల నాణ్యతపై ఆగ్రహం వ్యక్తం చేసింది. ఈ నేపథ్యం లోనే వాటి పంపిణీని రద్దు చేసినట్లుగా తెలుస్తోంది.
