ప్రజా ఆరోగ్యానికి ముప్పుగా మారిన డంప్ యార్డ్ తొలగింపునకు ఆకుల శ్రీనివాస్ పటేల్ కృషి
నవతెలంగాణ – కరీంనగర్
కరీంనగర్ నగరవాసులకు తీవ్ర సమస్యగా మారిన డంప్ యార్డ్‌ను శాశ్వతంగా తొలగించాలని, దీనిపై “డంప్ యార్డ్ బాధితుల సంఘం – కరీంనగర్ జేఏసీ” వ్యవస్థాపకులు ఆకుల శ్రీనివాస్ పటేల్ ఆధ్వర్యంలో పోరాటం ఉధృతం అవుతోంది. ప్రజా ఆరోగ్యానికి, పర్యావరణానికి తీవ్ర ముప్పుగా మారిన ఈ డంప్ యార్డ్ కారణంగా వేలాది కుటుంబాలు, ముఖ్యంగా చిన్నారులు, వృద్ధులు, మహిళలు శ్వాసకోస, చర్మవ్యాధులు వంటి వివిధ ఆరోగ్య సమస్యలతో బాధపడుతున్నారు.
ప్రధాన లక్ష్యాలు: డంప్ యార్డ్ తొలగింపు, శాస్త్రీయ వ్యర్థాల నిర్వహణ
ఆకుల శ్రీనివాస్ పటేల్ చేపట్టిన ఈ పోరాటం ప్రధానంగా రెండు లక్ష్యాలతో సాగుతోంది. మొదటిది, కరీంనగర్ డంప్ యార్డ్‌ను ప్రజల నివాస ప్రాంతం నుంచి శాశ్వతంగా తొలగించే వరకు పోరాడటం. రెండవది, కరీంనగర్ నగరంలోని చెత్తను శాస్త్రీయంగా వేరు చేసి, రీసైకిల్ చేసి, మిగిలిన వ్యర్థాలను సురక్షితంగా నిర్వహించేలా మున్సిపల్ వ్యవస్థలో సమూల మార్పు తీసుకురావడం.
పోరాట ఆరంభం, ప్రచార కార్యక్రమాలు
స్థానికంగా నివసిస్తున్న బాధితులు ఎదుర్కొంటున్న కష్టాలను ప్రత్యక్షంగా చూసిన ఆకుల శ్రీనివాస్ పటేల్, ‘డంప్ యార్డ్ బాధితుల సంఘం – కరీంనగర్ జేఏసీ’ని స్థాపించారు. గత కొన్ని నెలలుగా, అనేక సమావేశాలు, ప్రజా వేదికల ద్వారా ఈ సమస్యను విస్తృతంగా చర్చకు తీసుకొచ్చారు. పత్రికా కథనాలు, మీడియా కవరేజ్, సోషల్ మీడియాలో అవగాహన కార్యక్రమాలు నిర్వహించి ప్రజల దృష్టిని ఆకర్షించారు.
న్యాయ పోరాటానికి సన్నాహాలు
మున్సిపల్ కమిషనర్, కలెక్టర్, ఎమ్మెల్యే, మంత్రులు, ఇతర సంబంధిత అధికారులకు ప్రతినిధి బృందాలతో కలిసి పలుమార్లు ఫిర్యాదులు, వినతిపత్రాలు సమర్పించారు. అంతేకాకుండా, హైకోర్టు, సుప్రీంకోర్టుల్లో ప్రజా ప్రయోజన వ్యాజ్యాలు (PILs) దాఖలు చేసేందుకు న్యాయపరమైన సాక్ష్యాలు, ఆరోగ్య నివేదికలు, మీడియా కథనాలను సేకరిస్తున్నారు. పర్యావరణ పరిరక్షణ చట్టాలు, NGT మార్గదర్శకాల ఆధారంగా న్యాయపోరాటానికి సిద్ధమవుతున్నారు.
సంఘం నిర్దేశించుకున్న లక్ష్యాలలో డంప్ యార్డ్‌ను శాశ్వతంగా తొలగించడం, చెత్తను శాస్త్రీయంగా ప్రాసెస్ చేసే ప్లాంట్ ఏర్పాటు చేయించడం, బాధిత కుటుంబాలకు వైద్య శిబిరాలు, ఆరోగ్య సదుపాయాలు కల్పించడం, అలాగే వారికి ప్రభుత్వ పరిహారం, పునరావాసం సాధించడం ఉన్నాయి.
రాష్ట్రవ్యాప్త చర్చ, రాజకీయ పార్టీల స్పందన
ఆకుల శ్రీనివాస్ పటేల్ చేస్తున్న ఈ కృషి ఫలితంగా డంప్ యార్డ్ సమస్య తెలంగాణ రాష్ట్రవ్యాప్తంగా చర్చనీయాంశంగా మారింది. కాంగ్రెస్, బీజేపీ, బీఆర్ఎస్ వంటి ప్రధాన రాజకీయ పార్టీల నాయకులు కూడా ఈ సమస్యపై స్పందించడం ప్రారంభించారు. ప్రజల మద్దతు రోజురోజుకూ పెరుగుతోంది.
”ఇండోర్ తరహా మోడల్‌ను అనుసరించి కరీంనగర్ చెత్త సమస్యను పరిష్కరించడం, పర్యావరణహిత నగరాన్ని నిర్మించడం” అనేది ఆకుల శ్రీనివాస్ పటేల్ విజన్. “డంప్ యార్డ్ హటావో – కరీంనగర్ బచావో” అనే నినాదంతో ఈ ఉద్యమం మరింత ఉధృతం అవుతోంది. ఈ ప్రజా ఉద్యమానికి స్థానిక ప్రజల నుంచి మరింత మద్దతు, భాగస్వామ్యం అవసరమని జేఏసీ కోరుతోంది.
