నవతెలంగాణ – హైద‌రాబాద్ : వెస్టిండీస్‌తో అహ్మదాబాద్‌లో జరిగిన తొలి టెస్టులో అద్భుత ప్రదర్శన కనబరిచిన భారత ఆటగాళ్లు ఐసీసీ ర్యాంకింగ్స్‌లో సత్తా చాటారు. ముఖ్యంగా, ఆల్ రౌండర్ రవీంద్ర జడేజా బ్యాటింగ్‌లో తన కెరీర్‌లోనే అత్యుత్తమ ర్యాంకును అందుకున్నాడు. ఈ మ్యాచ్‌లో అజేయ శతకంతో (104 నాటౌట్) రాణించిన జడేజా, ఏకంగా 25వ స్థానానికి ఎగబాకాడు. ఈ ఏడాది జులైలో సాధించిన 29వ ర్యాంకే ఇప్పటివరకు అతడి అత్యుత్తమ స్థానం. తాజా ప్రదర్శనతో 644 రేటింగ్ పాయింట్లను సొంతం చేసుకున్నాడు.
ఇక ఆల్ రౌండర్ల జాబితాలో జడేజా తన అగ్రస్థానాన్ని మరింత పదిలం చేసుకున్నాడు. రెండో ఇన్నింగ్స్‌లో నాలుగు వికెట్లు పడగొట్టడంతో, రెండో స్థానంలో ఉన్న బంగ్లాదేశ్ ఆటగాడు మెహిదీ హసన్‌పై తన ఆధిక్యాన్ని 125 పాయింట్లకు పెంచుకున్నాడు.
భారత పేసర్ మహమ్మద్ సిరాజ్ కూడా తన కెరీర్‌లో అత్యుత్తమ ర్యాంకును సాధించాడు. ఇంగ్లండ్ పర్యటనలో కనబరిచిన ఫామ్‌ను కొనసాగిస్తూ, ఈ మ్యాచ్‌లో రెండు ఇన్నింగ్స్‌లలో కలిపి ఏడు వికెట్లు (4/40, 3/31) తీశాడు. దీంతో మూడు స్థానాలు మెరుగుపరచుకుని బౌలింగ్ ర్యాంకింగ్స్‌లో 12వ స్థానానికి చేరుకున్నాడు. అంతేకాకుండా, తొలిసారిగా 700 పాయింట్ల మార్కును దాటాడు.
