– ఎన్టీఆర్ సహకారంతో వ్యవసాయ కళాశాల ఏర్పాటు
– దేశానికే ఆదర్శంగా ఆయిల్ ఫామ్ సాగు: మంత్రి తుమ్మల నాగేశ్వరరావు
– రైతు మేళాలో పాల్గొన్న మంత్రులు తుమ్మల, ఉత్తమ్ కుమార్ రెడ్డి లు
– వ్యవసాయ పథకాలను ప్రారంభించిన మంత్రులు
– 350 మంది రైతులకు 1.07 కోట్లు విలువైన యాంత్రీకరణ పనిముట్లు పంపిణీ
– వ్యవసాయ, ఉద్యాన సాగుపై శాస్త్రవేత్తలతో అవగాహన సదస్సు
నవతెలంగాణ – అశ్వారావుపేట
గోదావరి జలాలతో ఉమ్మడి ఖమ్మం జిల్లాను సస్యశ్యామలం చేయడమే నా చిరకాల కోరికని తెలంగాణ వ్యవసాయ శాఖా మంత్రి తుమ్మల నాగేశ్వరరావు తెలిపారు. శుక్రవారం అశ్వారావుపేట వ్యవసాయ కళాశాలలో జరిగిన రైతు మేళా కార్యక్రమంలో తెలంగాణ నీటిపారుదల శాఖా మంత్రి ఉత్తమ్ కుమార్ రెడ్డి తో కలిసి పాల్గొన్నారు. వ్యవసాయ యాంత్రీకరణ, సేంద్రియ వ్యవసాయ పథకాలను అమలు చేయడం కోసం రాష్ట్ర వ్యాప్తంగా అమలు చేయడం కోసం జిల్లా స్థాయి లో ఏర్పాటు చేసిన ప్రారంభ కార్యక్రమంలో మంత్రి తుమ్మల నాగేశ్వరరావు మాట్లాడుతూ.. నాటి ముఖ్యమంత్రి ఎన్టీఆర్ సహాకారంతో వ్యవసాయ కళాశాల ఏర్పాటు జరిగిందన్నారు. వ్యవసాయ విద్యలో ఉత్తమ కళాశాల గా నిలవాలని ఆకాంక్షించారు.
గత ప్రభుత్వంలో డిస్ట్రిబ్యూటరీ కెనాల్స్ డీ.పీ.ఆర్ లో లేదు అని, ఈ ప్రభుత్వంలో ఆ కెనాల్స్ కు నిధులు మంజూరు చేశారన్నారు. నాల్గో పంపు హౌస్ నిర్మాణంతో దమ్మపేట అశ్వారావుపేట మండలాలకు గోదావరి నీళ్లు అందుతాయన్నారు. ఆయిల్ ఫామ్ లో అంతర పంటలుగా కోకో,జాజి,వక్క, మిరియం సాగుతో రైతులకు అదనపు లాభాలు వస్తాయన్నారు. దేశానికే ఆదర్శంగా భద్రాద్రి కొత్తగూడెం జిల్లా వ్యవసాయ రంగంలో అగ్ర భాగాన ఉండాలన్నారు. తెలంగాణలో పది లక్షల ఎకరాల్లో పామాయిల్ సాగు విస్తరణకు ప్రభుత్వం పట్టుదలగా ఉందన్నారు. సన్నకారు రైతులకు మేలు చేయాలని వ్యవసాయ యాంత్రీకరణ పథకం అమలు చేయాలని సీఎం రేవంత్ రెడ్డి నిర్ణయం తీసుకున్నారు.
సంక్రాంతి పండుగ రోజు నుంచి వ్యవసాయ యాంత్రీకరణ పథకం అమలు చేస్తారని మంత్రి వెల్లడించారు. 2047 నాటికి 470 బిలియన్ డాలర్స్ వ్యవసాయ రంగం వాటా ఉండేలా తెలంగాణ రైజింగ్ విజన్ డాక్యుమెంట్ లక్ష్యంగా ఉందన్నారు. పామాయిల్ సాగుతో రైతులకు మహర్దశ పట్టనుందని తెలిపారు. సీతారామ ప్రాజెక్టు భద్రాద్రి శ్రీ సీతారామ చంద్ర స్వామి వారి ఆశీస్సులతో పూర్తి చేస్తామన్నారు.
ఇరిగేషన్ మంత్రిగా మాట ఇస్తున్నా సీతారామ ప్రాజెక్టు పూర్తి చేస్తాం : ఉత్తమ్ కుమార్ రెడ్డి
రైతు మేళాలో ఇరిగేషన్ శాఖ మంత్రి ఉత్తమ్ కుమార్ రెడ్డి మాట్లాడుతూ ఇరిగేషన్ శాఖ మంత్రిగా మాట ఇస్తున్నా సీతారామ ప్రాజెక్టు పూర్తి చేసి ఉమ్మడి ఖమ్మం జిల్లా గోదావరి జలాలతో సశ్యశ్యామలం చేస్తామని ఉత్తమ్ కుమార్ రెడ్డి స్పష్టం చేశారు. గత ప్రభుత్వంలో అవినీతి అసమర్థత వల్ల సాగు నీటి ప్రాజెక్ట్ లు నిర్మాణం చేయలేదని నిబంధనలకు విరుద్ధంగా బ్యారేజ్ లో నీళ్లు నిల్వ చేయడం వల్లే కాళేశ్వరం కూలిందని ఉత్తమ్ కుమార్ రెడ్డి వ్యాఖ్యానించారు.
గత ప్రభుత్వంలో నీటి కేటాయింపులు లేకుండా ప్రాజెక్ట్ లు నిర్మాణం చేశారని కాంగ్రెస్ ప్రభుత్వం కొలువు తీరాక సీతారామ ప్రాజెక్టు కు 67 టీ ఎం సీ లు గోదావరి జలాలు కేటాయింపు సాధించామని తెలిపారు. వ్యవసాయ యాంత్రీకరణ పథకం సేంద్రీయ వ్యవసాయం దిశగా ప్రభుత్వం కార్యాచరణతో ఉన్నట్లు తెలిపారు. సీతారామ ప్రాజెక్టు పూర్తి చేసి రైతులు దశాబ్దాల సాగు నీటి కల సాకారం చేస్తామన్నారు.
అకడమిక్ బ్లాక్ ఏర్పాటు చేయండి : ఎమ్మెల్యే జారె ఆదినారాయణ
రాష్ట్రంలోనే తొలి వ్యవసాయ కళాశాల అశ్వారావుపేట కళాశాల అని,ఎంతో ఘనత ఉన్న ఈ కళాశాలలో నూతన జాతీయ విద్యావిధానం అనుగుణం విద్యార్ధులకు మరిన్ని సదుపాయాలు కల్పించాల్సి అవసరం ఉందని స్థానిక ఎమ్మెల్యే జారె ఆదినారాయణ మంత్రులను కోరారు. ఇందు కోసం ఈ కళాశాలకు అనుసంధానంగా అకడమిక్ బ్లాక్, బాలురు వసతి గృహం కోసం నూతన భవన సముదాయాలు నిర్మించాలి అని అన్నారు.
స్థానిక వ్యవసాయ కళాశాల అసోసియేట్ డీన్ జే.హేమంత కుమార్ సమన్వయంతో జరిగిన ఈ కార్యక్రమంలో భద్రాచలం ఎమ్మెల్యే తెల్లం వెంకట్రావు,ఆయిల్ ఫెడ్ చైర్మన్ జంగా రాఘవరెడ్డి,ఆత్మ (బీఎఫ్ఏసీ) చైర్మన్ సుంకవల్లి వీరభద్రరావు, వ్యవసాయ శాఖ ప్రధాన కార్యదర్శి సురేంద్ర మోహన్, డైరెక్టర్ ఎన్.గోపి,వ్యవసాయ,ఉద్యాన విశ్వవిద్యాలయాల వైస్ చాన్సలర్ లు ఆల్తాప్ జానయ్య,రాజారెడ్డి,ఆయిల్ ఫెడ్ ఎండీ జాస్మిన్ బాషా,జిల్లా కలెక్టర్ జితేష్ వి.పాటిల్,ఐటీడీఏ పీఓ రాహుల్, ఆయిల్ ఫెడ్ ఉన్నతాధికారులు సుధాకర్ రెడ్డి,శ్రీకాంత్ రెడ్డి,ప్రవీణ్ రెడ్డి లు పామాయిల్ రైతు సంఘం నాయకులు ఆలపాటి రాంచంద్రప్రసాద్,మాజీ ఎమ్మెల్యే తాటి వెంకటేశ్వర్లు,అశ్వారావుపేట పాక్స్ మాజీ అద్యక్షులు మొగళ్ళపు చెన్నకేశవ రావు లు,బండి భాస్కర్ రావు లు పాల్గొన్నారు.
