సర్పంచ్‌ అభ్యర్థుల ఎంపికలో నేతల తలమునకలు
ఒక్కో ఊరులో గ్రూపులుగా పార్టీల క్యాడర్‌
క్యాంప్‌ ఆఫీసుల చుట్టూ ప్రదక్షిణలు
పరపతి ఉన్నోళ్లు పైసలు లేక సతమతం
కష్టంగా మారుతున్న ఏకాభిప్రాయ సాధన
ఓటుకు రూ.2, 3 వేల పైనే పంపిణీ!
ఇదీ పంచాయతీ ఎన్నికల ముఖచిత్రం
నవతెలంగాణ – ఖమ్మం ప్రాంతీయ ప్రతినిధి
రాష్ట్రంలో పంచాయతీ ఎన్నికల వాతావరణం వేడుక్కుతోంది. రాజకీయాభిరుచి ఉన్నవాళ్లు పనులన్నీ పక్కనపెట్టి ఎన్నికలపైనే దృష్టి సారిస్తున్నారు. తొలి దఫా ఎన్నికల నామినేషన్ల ఘట్టం కూడా శనివారంతో ముగిసింది. రెండో విడత ఎన్నికల కోసం నామినేషన్ల ప్రక్రియ ఆదివారం నుంచి కొనసాగనుంది. మొదటి దఫాలో కొన్నిచోట్ల సింగిల్‌గానే అభ్యర్థుల ఎంపిక జరిగాయి. మరికొన్ని చోట్ల ఒకే పార్టీలో ఉన్నవారే సర్పంచ్‌, వార్డు మెంబర్ల కోసం రెండేసి నామినేషన్లు వేశారు. ఇలాంటి చోట్ల ఆయా పంచాయతీల్లో సర్పంచ్‌ అభ్యర్థులుగా ఎవరిని ఎంపిక చేయాలనే దానిపై విపరీతమైన కసరత్తు చేస్తున్నారు.
తమ అభ్యర్థికి టికెట్‌ ఇవ్వాలని కోరుతూ ఆయా పార్టీలు, ఎమ్మెల్యేలు, మంత్రుల క్యాంప్‌ ఆఫీసులు చుట్టూ ప్రదక్షిణలు చేస్తున్నారు. ముఖ్యంగా అధికార పార్టీ నుంచి తీవ్ర పోటీ నెలకొంది. పైసలు ఉన్నవారికి పలుకుబడి లేకపోవడం.. పరుపతి ఉన్న వారికి పైసలు లేకపోవటంతో అభ్యర్థుల ఎంపిక ఆయా పార్టీల జిల్లా నేతలకు తలనొప్పిగా మారింది. రిజర్వుడ్‌ స్థానాల్లో ఉపసర్పంచ్‌ పదవి కూడా ప్రతిష్టాత్మకంగా మారింది. రాష్ట్రంలో 12,760 పంచాయతీలు, 1,13,534 వార్డులకు ఎన్నికలు జరుగుతున్నాయి. 1.66 కోట్ల మంది గ్రామీణులు ఓటు హక్కు ద్వారా తమ గ్రామ పాలన వ్యవస్థను ఏర్పాటు చేసుకునేందుకు ఆసక్తిగా ఉన్నారు.
పెద్ద పంచాయతీల్లో సర్వేలు
మూడు, నాలుగు వేలకుపైగా ఓట్లు ఉన్న పెద్ద పంచాయతీల్లో అధికారపార్టీతోపాటు ప్రధాన ప్రతిపక్షం బీఆర్‌ఎస్‌ సర్వేలు సైతం చేయిస్తున్నాయి. ఏ అభ్యర్థికి విజయావకాశాలు ఉన్నాయో.. వారికి టికెట్లు ఇచ్చేలా సన్నాహాలు చేస్తున్నాయి. పెద్ద పంచాయతీల్లో వార్డు మెంబర్‌ అభ్యర్థుల ఎంపికను సైతం జిల్లా బాధ్యులే చూస్తుండగా.. చిన్న పంచాయతీల్లో ఆ గ్రామ నాయకులకే బాధ్యతలు ఇస్తున్నారు. నామినేషన్ల ఘట్టం ముగిసిన పది రోజుల్లోనే పోలింగ్‌ ఉండటంతో ఖర్చులు కూడా ఒకింత తగ్గుతాయనే ఆశాభావంతో కొందరు ఉన్నారు. ప్రతిష్టాత్మకంగా ఎన్నికలు జరిగే గ్రామాల్లో మాత్రం ఓటుకు రూ.2, 3 వేలకు పైనే పంపిణీ చేయాల్సి ఉంటుందని లెక్కలు వేస్తున్నారు.
2,500 ఓట్లు ఉన్నచోట కనీసం 2000 ఓట్లకైనా డబ్బులు పంచాలని అంచనా వేస్తున్నారు. ఓటుకు వెయ్యి చొప్పున రూ.20 లక్షలు, ప్రచారానికి మరో పది లక్షల చొప్పున కేటాయించుకోవాలని సర్పంచ్‌ అభ్యర్థులుగా పోటీపడే వారికి నేతలు సూచిస్తున్నారు. ఆర్థిక పరిస్థితులు ఆశాజనకంగా లేకపోవటంతో పలువురు ఆశావహులు ఆసక్తి ఉన్నా పోటీ నుంచి తప్పుకోవాలని భావిస్తున్నారు. గతంలో సర్పంచులుగా పోటీ చేసి ఎకరాల కొద్దీ భూములు కోల్పోయిన వారు అనేకమంది ఉన్నారు. అలాంటి వారిని దృష్టిలో పెట్టుకొని కొందరు పోటీకి వెనకడుగు వేస్తున్నారు. మొత్తం మీద పంచాయతీ ఎన్నికలు గ్రామీణ వాతావరణాన్ని వాడీ వేడీగా మార్చాయనటంలో సందేహం లేదు.
క్యాంప్‌ ఆఫీసుల చుట్టూ రాజకీయం
క్యాంప్‌ ఆఫీసుల చుట్టూ రాజకీయ నాయకుల ప్రదక్షిణలు కొనసాగుతున్నాయి. మంత్రుల క్యాంప్‌ ఆఫీసులు అత్యంత కోలాహలంగా మారాయి. ఖమ్మం జిల్లాలో ముగ్గురు మంత్రులు ఉండటం.. ఎవరికి వారుగా తమ గ్రూపులతో చర్చలు జరుపుతున్నారు. గ్రామస్థాయి నేతలు కొందరు హైదరాబాద్‌ వరకూ వెళ్లి తమ వర్గం, లేదంటే కులానికి చెందిన వ్యక్తికి సర్పంచ్‌ అభ్యర్థిగా అవకాశం కల్పించాలని ప్రాధేయపడుతున్నారు. మంత్రుల క్యాంప్‌ ఆఫీస్‌ ల ఇన్చార్జీలైతే క్షణం తీరిక లేకుండా ఆయా గ్రామాల నేతలతో సుదీర్ఘ చర్చలు సాగిస్తున్నారు.
గ్రూపుల వారీగా వస్తున్న నేతలు తమ ప్రాబల్యాన్ని వివరిస్తూ మంత్రులు, ఎమ్మెల్యే క్యాంప్‌ ఆఫీస్‌ ఇన్‌చార్జీలను ఒప్పించేందుకు ప్రయత్నిస్తున్నారు. ఒకవేళ సయోధ్య కుదరకపోతే నేరుగా ఎమ్మెల్యేలు, మంత్రులను కలిసేందుకు హైదరాబాద్‌ వెళ్తున్నారు. తీవ్ర పోటీ ఉన్నచోట ఏకాభిప్రాయం కుదరని పక్షంలో నయానోభయానో ఒప్పించేందుకు నేతలు ప్రయత్నిస్తున్నారు. రిజర్వేషన్లు అనుకూలంగా వచ్చిన కొన్నిచోట్ల పరపతి ఉన్నవాళ్లు ప్రతిపక్ష పార్టీలను వదిలి అధికార కాంగ్రెస్‌లో చేరుతుండటం గమనార్హం. కొన్ని చోట్ల అధికారి, ప్రతిపక్ష పార్టీల మద్దతుదారులు ఏకమై సర్పంచ్‌, ఉప సర్పంచ్‌ పదవులను పంచుకుంటున్నారు. వార్డుల ఎంపిక కూడా చేసేస్తున్నారు.
