తెలంగాణకు తలమానికం కాజీపేట ఆర్‌ఎంయూ

వచ్చే ఏడాది నుంచి ఉత్పత్తి ప్రారంభం
తొలి దశలో రూ.521 కోట్లు
కాజీపేట రైల్వే డివిజన్‌పై చర్చ లేదు : కేంద్ర బొగ్గు, గనుల శాఖమంత్రి జి.కిషన్‌రెడ్డి

నవతెలంగాణ-వరంగల్‌ ప్రాంతీయ ప్రతినిధి
కాజీపేటలో నిర్మిస్తున్న రైల్వే మ్యానుఫాక్చరింగ్‌ యూనిట్‌ (ఆర్‌ఎంయు) తలమానికంగా నిలుస్తుందని కేంద్ర బొగ్గు, గనుల శాఖ మంత్రి జి.కిషన్‌రెడ్డి తెలిపారు. శనివారం వరంగల్‌కు వచ్చిన మంత్రి కాజీపేట మండలం అయోధ్య పురంలో నిర్మిస్తున్న రైల్వే మ్యానుఫాక్చరింగ్‌ యూనిట్‌ పనులను పరిశీలిం చారు. అనంతరం ఆయన విలేకరుల సమావేశంలో మాట్లాడుతూ.. 2-3 ఏండ్లలో తెలంగాణ రైల్వే నెట్‌వర్క్‌ రూపు రేఖలు మారనున్నాయన్నారు. 2023 జులైలో ప్రధాని మోడీ శంకుస్థాపన చేసిన ఈ యూనిట్‌ పనులు అత్యంత వేగంగా జరుగుతున్నాయన్నారు. మొదటి దశలో రూ.521 కోట్లతో ఈ పనులను రైల్వే వికాస్‌ నిగం లిమిటెడ్‌ (ఆర్‌విఎన్‌ఎల్‌) చేపట్టిందన్నారు. ఇప్పటికే 75 శాతం పనులు పూర్తయ్యాయని, వచ్చే ఏడాది ఉత్పత్తి ప్రారంభమవుతుందని చెప్పారు. 160 ఎకరాలలో ఈ యూనిట్‌ను నిర్మిస్తున్నా మన్నారు. ఈ ఫ్యాక్టరీని డే లైటింగ్‌ వుండే విధంగా ఫ్రీ లైటింగ్‌, ఫ్రీ వెంటిలేషన్‌తో నిర్మించారన్నారు. దీంతో విద్యుత్‌ ఆదా అవుతుందన్నారు.

ఇఎంయు, ఎంఇఎంయుల తయారీ
16 కోచ్‌లతో కూడిన ఇఎంయు, ఎంఇఎంయులను రూపొందించనున్నారని మంత్రి కిషన్‌రెడ్డి తెలిపారు. రాష్ట్రంలో ఇప్పటికే వంద శాతం విద్యుద్ధీకరణ పనులను పూర్తి చేశామన్నారు. ప్రమాదాలను నివారించే ‘కవచ్‌’ వంటి రక్షణ వ్యవస్థ మొదటగా మన దక్షిణ మధ్య రైల్వేలోనే అమలు చేయడం జరిగిందన్నారు. రాష్ట్రంలో ఏకకాలంలో 40 రైల్వే స్టేషన్ల పునర్నిర్మాణ పనులు జరుగుతున్నాయన్నారు. సికింద్రాబాద్‌, కాచిగూడ, నాంపల్లి వంటి మూడు ప్రధాన టర్మినల్స్‌పై రైల్వే శాఖ ప్రధానంగా దృష్టి సారించిందన్నారు. ఆదిలాబాద్‌-ఆర్మూర్‌, హైద్రాబాద్‌-మెదక్‌, హైదరాబాద్‌-సిద్దిపేట మార్గాల్లో కొత్త రైల్వే లైన్‌లను ఏర్పాటు చేస్తున్నామన్నారు. కొమురవెల్లికి నూతన రైల్వే లైన్‌ను నిర్మిస్తున్నామన్నారు. రాష్ట్ర ప్రభుత్వం రూ.1000 కోట్లు ఇవ్వడానికి వెనుకడుగు వేసినా ఎంఎంటీఎస్‌ రెండో దశను పూర్తి చేశామని చెప్పారు. హైదరాబాద్‌- యాదగిరిగుట్టకు ఎంఎంటీఎస్‌ రైల్వే లైన్‌ మంజూరు చేసినట్టు తెలిపారు.

రూ.2,400 కోట్లతో హైవే పనులు
జాతీయ రహదారులకు రూ.2,400 కోట్లు ఖర్చు పెడుతున్నామని కేంద్ర మంత్రి జి.కిషన్‌రెడ్డి తెలిపారు. రాష్ట్రంలో ఇప్పటికే జాతీయ రహదారుల నిర్మాణానికి రూ.1.20 లక్షల కోట్లు ఖర్చు పెట్టామన్నారు. వరంగల్‌-మంచిర్యాల 4లేన్‌ హైవేకు, కరీంనగర్‌-వరంగల్‌ హైవే పనులు వేగవంతంగా జరుగుతున్నాయన్నారు. వీటికి రూ.2,400 కోట్లు ఖర్చు పెడుతున్నామన్నారు. కాకతీయ మెగా టెక్స్‌టైల్స్‌ పార్క్‌ను రూ.200 కోట్లతో చేపట్టనున్నట్లు మంత్రి చెప్పారు. ఇప్పటికే రూ.30 కోట్లు విడుదల చేశామని, మరో రూ.30 కోట్లు త్వరలోనే ఇవ్వనున్నామని తెలిపారు.

భూసేకరణ పూర్తయితే ఎయిర్‌పోర్ట్‌ పనులు
త్వరితగతిన భూ సేకరణ పూర్తి చేసి ఎయిర్‌ పోర్ట్‌ అథారిటీ ఆఫ్‌ ఇండియాకు స్వాధీనపరిస్తే వెంటనే మామునూరు ఎయిర్‌పోర్ట్‌ పనులను ప్రారంభిస్తామని కిషన్‌రెడ్డి అన్నారు. ప్రస్తుతం 696 ఎకరాల భూమి ఎయిర్‌పోర్ట్‌ అధికారుల ఆధీనంలో వుందన్నారు. 280 ఎకరాల భూమిని రాష్ట్ర ప్రభుత్వం సేకరించడానికి ముందుకు వచ్చిందన్నారు.

పత్తి కొనుగోళ్లపై ఆందోళన వద్దు
పత్తి కొనుగోళ్లకు సంబంధించి రైతులు ఆందోళన పడొద్దని మంత్రి అన్నారు. రైతులకు ఇబ్బంది కలుగకుండా పత్తి కొనుగోళ్లు చేయాలని సిసిఐ అధికారులను ఆదేశించామన్నారు. 2024-25లో 41 లక్షల బేళ్ల పత్తిని తెలంగాణలో కేంద్రం కొనుగోలు చేసిందన్నారు. గతేడాది 110 కొనుగోలు కేంద్రాల్లో కొనుగోలు చేయగా, ఈసారి 123 కొనుగోలు కేంద్రాలను ఏర్పాటు చేసినట్టు చెప్పారు. పత్తిలో తేమ శాతం 8 నుండి 9 శాతం వుంటుందని, 12 శాతం తేమ వున్నా కొనుగోలు చేయడానికి సిసిఐ అధికారులకు సుముఖత వ్యక్తం చేశారన్నారు. ఈ సమావేశంలో దక్షిణ మధ్య రైల్వే జనరల్‌ మేనేజర్‌ సంజరుకుమార్‌ శ్రీవాస్తవ, ఆర్‌విఎల్‌ఎల్‌, మాజీ ఎమ్మెల్యేలు కొండేటి శ్రీధర్‌, అరూరి రమేష్‌, ఎం.ధర్మారావు, గుజ్జుల ప్రేమేందర్‌రెడ్డి, రావు పద్మ, కొలను సంతోష్‌రెడ్డి, కార్పొరేటర్లు చాడ స్వాతి, జలగం రంజిత్‌రావు తదితరులు పాల్గొన్నారు.