మావోయిస్టు కీలక నేత కుంజాం హిడ్మా అరెస్ట్‌

భువనేశ్వర్‌: మావోయిస్టు అగ్రనేత నంబాల కేశవరావు ఎన్‌కౌంటర్‌ అయిన ఘటన మరువక ముందే.. మరో కీలక నేతను ఒడిశా పోలీసులు అరెస్టు చేశారు. ఛత్తీస్‌గఢ్‌ బీజాపూర్‌ జిల్లాలోని జనగూడకు చెందిన కుంజాం హిడ్మాను అరెస్టు చేసినట్టు పోలీసులు తెలిపారు. ఒడిశా పోలీసులు, డిస్ట్రిక్ట్‌ వాలంటరీ ఫోర్స్‌ బ ృందాలు ప్రత్యేక ఆపరేషన్‌ చేపట్టాయి. ఈ క్రమంలో బోయిపరిగూడ పోలీసు స్టేషన్‌ పరిధిలోని పెటగూడ గ్రామ సమీపంలోని అడవుల్లో హిడ్మాను పోలీసులు అరెస్టు చేశారు. ఈ ప్రాంతంలో మావోయిస్టులు సంచరిస్తున్నారని పక్కా సమాచారం అందడంతోనే.. పోలీసులు అక్కడ కూంబింగ్‌ నిర్వహించినట్టు ఉన్నతాధికారులు పేర్కొన్నారు.
కూంబింగ్‌ నిర్వహిస్తుండగా పోలీసులకు మావోయిస్టులు తారసపడ్డారు. దీంతో మావోయిస్టులకు, పోలీసు బలగాలకు మధ్య ఎదురుకాల్పులు చోటు చేసుకున్నాయి. అయితే చాలా మంది మావోయిస్టులు అక్కడ్నుంచి పారిపోయారు. మావోయిస్టు కుంజాం హిడ్మా మాత్రం అక్కడున్న చెట్ల పొదల్లో తలదాచుకుండగా..అదుపులోకి తీసుకున్నట్టు పోలీసులు తెలిపారు. ఆ తర్వాత అతను హార్డ్‌కోర్‌ మావోయిస్టు హిడ్మా అని పోలీసుల విచారణలో తేలింది.కుంజాం హిడ్మా ప్రస్తుతం ఏరియా కమిటీ మెంబర్‌గా కొనసాగుతు న్నారు. హిడ్మా నుంచి ఏకే 47 రైఫిల్‌, 35 రౌండ్ల బుల్లెట్లు, 27 ఎలక్ట్రానిక్‌ డిటోనేటర్స్‌, 90 నాన్‌ ఎలక్ట్రిక్‌ డిటోనేటర్స్‌, 2 కేజీల గన్‌ పౌడర్‌, రెండు స్టీల్‌ కంటైనర్స్‌, రెండు రేడియోలు, ఒక ఇయర్‌ ఫోన్‌, వాకిటాకీ, బ్యాటరీ, రెండు కత్తులు, గొడ్డలి, నాలుగు టార్చ్‌ లైట్లు, ఒక పాలిథీన్‌ కవర్‌, మావోయిస్టు సాహిత్యానికి సంబంధించిన పుస్తకాలు లభించినట్టు పోలీసులు పేర్కొన్నారు.