‘కొక్కొరొకో’.. మొదలైంది

కొత్త టాలెంట్‌ను ఎంకరేజ్‌ చేసేందుకు దర్శక, నిర్మాత రమేష్‌ వర్మ ‘ఆర్‌వి ఫిల్మ్‌ హౌస్‌’ అనే బ్యానర్‌ను స్థాపించారు. ఆయన ఈ బ్యానర్‌పై నిర్మిస్తున్న మొదటి ప్రాజెక్ట్‌ ‘కొక్కొరొకో’ని ఆదివారం పూజా కార్యక్రమాలతో ఘనంగా ప్రారంభించారు. ముహూర్తపు షాట్‌కు నిర్మాత రేఖ వర్మ క్లాప్‌ కొట్టగా, నిర్మాత కూరపాటి శిరీష కెమెరా స్విచ్‌ ఆన్‌ చేశారు. రమేష్‌ వర్మ స్క్రిప్ట్‌ను దర్శకుడు శ్రీనివాస్‌ వసంతలకు అందజేశారు. ఈ మూవీతో శ్రీనివాస్‌ వసంతల దర్శకుడిగా అరంగేట్రం చేస్తున్నారు.
వినూత్నమైన కథతో, డిఫరెంట్‌ ఎక్స్‌పీరియెన్స్‌ అందించేలా శ్రీనివాస్‌ వసంతల ఈ మూవీని తెరకెక్కించనున్నారు. స్క్రీన్‌ రైటర్‌ జి.సత్యమూర్తి కుమారుడు, సంగీత దర్శకుడు దేవి శ్రీ ప్రసాద్‌ సోదరుడు, నేపథ్య గాయకుడు జివి సాగర్‌ ఈ మూవీకి సంభాషణలు రాసే బాధ్యతను స్వీకరించారు. తన తండ్రి వారసత్వాన్ని అనుసరించి ‘రాక్షసుడు’ తర్వాత రచయితగా రెండో ప్రాజెక్ట్‌ని సాగర్‌ చేపట్టటం విశేషం. ఈ చిత్రానికి సినిమాటోగ్రాఫర్‌గా ఆకాష్‌ ఆర్‌ జోషి, మ్యూజిక్‌ డైరెక్టర్‌గా లండన్‌కు చెందిన సంకీర్తన్‌ పని చేయనున్నారు. నీల్లాద్రి ప్రొడక్షన్‌ కో ప్రొడ్యూసర్‌గా వ్యవహరిస్తున్నారు. ఎడిటర్‌గా ప్రవీణ్‌ పూడి పని చేస్తున్నారు.
ఈ మూవీకి కథ, స్క్రీన్‌ప్లేను రమేష్‌ వర్మ స్వయంగా రూపొందించారు. ఆర్‌వి ఫిల్మ్‌ హౌస్‌ బ్యానర్‌లో మొదటి చిత్రంగా తెలుగులో ఓ చక్కటి ఆంథాలజీ కానుంది. అద్భుతమైన విజువల్స్‌, మంచి ఎమోషన్స్‌తో ‘కొక్కొరొకో’ని రూపొందించనున్నారు. రెగ్యులర్‌ షూటింగ్‌ త్వరలో ప్రారంభం కానుంది.