‘లాయి లాయి లాయిలే..’

దీక్షిత్‌ శెట్టి, రష్మిక మందన్న జంటగా నటిస్తున్న సినిమా ‘ది గర్ల్‌ ఫ్రెండ్‌’. ఈ సినిమాను అల్లు అరవింద్‌ సమర్పణలో గీతా ఆర్ట్స్‌, ధీరజ్‌ మొగిలినేని ఎంటర్‌ టైన్‌మెంట్‌ బ్యానర్స్‌ సంయుక్తంగా నిర్మిస్తున్నాయి. ఇంటెన్స్‌, ఎమోషనల్‌ లవ్‌ స్టోరీతో దర్శకుడు రాహుల్‌ రవీంద్రన్‌ రూపొందిస్తున్నారు. ధీరజ్‌ మొగిలినేని, విద్య కొప్పినీడి నిర్మాతలు. సరికొత్త ప్రేమ కథగా తెరకెక్కుతున్న ఈ సినిమా ఈనెల 7న హిందీతో పాటు తెలుగు, తమిళ, మలయాళ, కన్నడ భాషల్లో వరల్డ్‌ వైడ్‌ గ్రాండ్‌ థియేట్రికల్‌ రిలీజ్‌కు రాబోతోంది. ఈ నేపథ్యంలో శుక్రవారం ఈ సినిమా నుంచి ‘కురిసే వాన..’ లిరికల్‌ సాంగ్‌ని రిలీజ్‌ చేశారు మేకర్స్‌.

ఈ పాటకు రాకేందు మౌళి సాహిత్యాన్ని అందించగా కపిల్‌ కపిలన్‌ పాడారు. హేషమ్‌ అబ్దుల్‌ వాహబ్‌ ఛాట్‌ బస్టర్‌ ట్యూన్‌ కంపోజ్‌ చేశారు. ‘కురిసే వాన తడిపేయాలన్న భూమే ఏదో , సరదా పడుతూ పురి విప్పేస్తున్న నెమలే ఏదో, ఓ నీలి మేఘం, పెంచింది వేగం, ఆ జాబిలమ్మ చెంత చేరి వంతపాడి, కమ్మితే మైకం, లాయి లాయి లాయిలే..’ అంటూ వినగానే ఆకట్టుకునేలా సాగుతుందీ పాట. మెమొరబుల్‌ లవ్‌ సాంగ్‌గా లవర్స్‌తో పాటు మ్యూజిక్‌ లవర్స్‌కూ గుర్తుండిపోతుంది అని చిత్ర యూనిట్‌ తెలిపింది. రావు రమేష్‌, రాహుల్‌ రవీంద్రన్‌ తదితరులు నటిస్తున్న ఈచిత్రానికి సినిమాటోగ్రఫీ – కృష్ణన్‌ వసంత్‌, సంగీతం – హేషమ్‌ అబ్దుల్‌ వాహబ్‌, ప్రొడక్షన్‌ డిజైన్‌ – ఎస్‌ రామకృష్ణ, మౌనిక నిగోత్రి.