దీపావళికి పేలనున్న నవ్వుల టపాసులు

ప్రేక్షకులు థియేటర్లలో నవ్వులతో నిండిన దీపావళి పండుగను జరుపుకునేలా ‘మిత్ర మండలి’ చిత్రాన్ని అక్టోబర్‌ 16న ప్రపంచ వ్యాప్తంగా భారీస్థాయిలో విడుదల చేయనున్నట్లు తాజాగా చిత్ర బృందం అధికారికంగా ప్రకటించింది.
టీజర్‌తో ఆసక్తిని రేకెత్తించి, రెండు చార్ట్‌బస్టర్‌ పాటలతో అభిమా నులను అలరించిన తర్వాత, నిర్మాతలు ఇప్పుడు ఆకట్టుకునే విడుదల తేదీ పోస్టర్‌తో పాటు ఒక వినోదభరితమైన ప్రకటన వీడియోను రిలీజ్‌ చేశారు.
బాణసంచా కాల్చడం, గ్యాంగ్‌ ఉత్సాహభరితమైన శక్తితో నిండిన ఈ పోస్టర్‌ పండుగ వాతావరణాన్ని నెలకొల్పింది. ఇక ప్రకటన వీడియో అయితే నవ్వులు పూయిస్తూ సామాజిక మాధ్యమాలలో చక్కర్లు కొడుతోంది.
నిర్మాత బన్నీ వాస్‌ స్థాపించిన నిర్మాణ సంస్థ బి.వి. వర్క్స్‌ సమర్పణలో సప్త అశ్వ మీడియా వర్క్స్‌, వైరా ఎంటర్టైన్మెంట్స్‌ సంయుక్తంగా నిర్మిస్తున్న ‘మిత్ర మండలి’ సినిమా హాస్యం, రహస్యం, యవ్వన శక్తి మిశ్రమంగా ప్రేక్షకులకు అపరిమిత వినోదాన్ని అందించడానికి సిద్ధమవుతోంది.
నూతన దర్శకుడు విజయేందర్‌ ఎస్‌ దర్శకత్వం వహిస్తున్న ఈ చిత్రంలో ప్రియదర్శి, నిహారిక ఎన్‌.ఎం., విష్ణు ఓరు, రాగ్‌ మయూర్‌, ప్రసాద్‌ బెహరా ప్రధాన పాత్రలు పోషిస్తున్నారు. ”మిత్ర మండలి’ అనేది స్నేహం ప్రధానంగా నడిచే కథ. బాధలన్నీ మర్చిపోయి, థియేటర్లలో మనస్ఫూర్తిగా నవ్వుకునేలా ఉంటుంది. ఓ మంచి సినిమాలో దీపావళికి ప్రేక్షకుల ముందుకు వస్తున్నందుకు సంతోషంగా ఉంది’ అని నిర్మాతలు కళ్యాణ్‌ మంతిన, భాను ప్రతాప, డా.విజయేందర్‌ రెడ్డి తీగల తెలిపారు.