నిరుద్యోగాన్ని నిర్మూలిద్దాం

– ఉపాధి, ప్రతిభ అభివృద్ధిపై దృష్టి
– కోచిలో స్కిల్‌ కేరళ గ్లోబల్‌ సమ్మిట్‌ 2025లో వక్తలు
కొచ్చి: ఉన్నత విద్యలో విద్యార్థులకు నైపుణ్య అభివృద్ధి ద్వారా ఉపాధి సామర్థ్యాన్ని పెంపొందించే లక్ష్యంతో జరిగిన స్కిల్‌ కేరళ గ్లోబల్‌ సమ్మిట్‌ 2025.. కొచ్చిలోని గ్రాండ్‌ హయత్‌లో అధికారికంగా ప్రారంభమైంది. ఈ కార్యక్రమాన్ని ఉన్నత విద్యా మంత్రి డాక్టర్‌ ఆర్‌. బిందు ప్రారంభించారు.
2025-26 విద్యా సంవత్సరంలో కనీసం 100,000 మంది విద్యార్థులకు క్యాంపస్‌ ప్లేస్‌మెంట్‌లను లక్ష్యంగా చేసుకుని వివిధ కంపెనీలతో అవగాహన ఒప్పందాలు (ఎంఓయూలు) కుదుర్చుకోవాలని కేరళ ప్రభుత్వం యోచిస్తోంది. ఈ సమ్మిట్‌లో, కెరీర్‌ ప్లాట్‌ఫామ్‌ లింక్డ్‌ఇన్‌ రూపొందించిన కేరళ టాలెంట్‌ రిపోర్ట్‌ 2025ను మంత్రి బిందు ప్రారంభించారు. ఈ నివేదిక రాష్ట్ర యువత సామర్థ్యాలు, ఉద్యోగ మార్కెట్‌లో ఉద్భవిస్తున్న ధోరణులు , ప్రపంచ ఉపాధి అవకాశాలపై సమగ్ర అధ్యయనాన్ని కలిగి ఉంది. ప్రారంభ రోజైన శనివారం విద్య, ఉపాధి, నైపుణ్య అభివృద్ధి భవిష్యత్తు వంటి అంశాలను కవర్‌ చేస్తూ ఆరు దశల్లో సెషన్‌లు జరిగాయి. షెడ్యూల్‌ చేసిన చర్చల్లో విద్యార్థులు, విద్యావేత్తలు , పారిశ్రామిక వేత్తల్ని ఒకచోట చేర్చాయి – 1,500 మందికి పైగా పాల్గొన్నారు.

షెడ్యూల్డ్‌ కులాలు , షెడ్యూల్డ్‌ తెగల సంక్షేమ మంత్రి ఓ.ఆర్‌. కేలు ”నైపుణ్య సముపార్జన పట్ల మక్కువ” అనే అంశంపై కీలక ప్రసంగం చేశారు. స్థానిక స్వపరిపాలన మంత్రి ఎం.బి. రాజేష్‌ ఈ సెషన్‌కు అధ్యక్షత వహించగా, పరిశ్రమల మంత్రి పి. రాజీవ్‌ కూడా ఈ సమావేశాన్ని ఉద్దేశించి ప్రసంగించారు. కర్నాటక నైపుణ్య అభివృద్ధి మంత్రి డాక్టర్‌ శరణ్‌ ప్రకాష్‌ పాటిల్‌, విజ్ఞాన కేరళ ప్రచార సలహాదారు డాక్టర్‌ టి.ఎం. థామస్‌ ఐజాక్‌, కె-డిఐఎస్‌సి సభ్య కార్యదర్శి డాక్టర్‌ పి.వి. ఉన్నికృష్ణన్‌ , డైరెక్టర్‌ పి.ఎం. రియాజ్‌ హాజరయ్యారు. రాష్ట్ర విజ్ఞాన కేరళ చొరవలో భాగంగా కేరళ అభివృద్ధి , ఆవిష్కరణ వ్యూహాత్మక మండలి (కె-డిఐఎస్‌సి) ఈ సమ్మిట్‌ను నిర్వహిస్తుంది. ఆర్థిక మంత్రి కె.ఎన్‌. బాలగోపాల్‌ ఈ సెషన్‌కు అధ్యక్షత వహించారు.