నేటి యువ కథానాయకుల్లో వినోదానికి కేరాఫ్ అడ్రస్గా నిలుస్తున్నారు నవీన్ పోలిశెట్టి. ఈ సంక్రాంతికి అలాంటి వినోదాన్ని పంచడానికి ‘అనగనగా ఒకరాజు’ అంటూ ప్రేక్షకుల ముందుకు వచ్చారు. సినిమా చూసిన ప్రతిఒక్కరినీ కడుపుబ్బ నవ్వించారు. ఆయన తెరపై ఎంతగా సందడి చేస్తారో తెర వెనుకా అదే స్థాయిలో నవ్వులు పంచుతుంటారు. సంక్రాంతి సినిమా బరిలో నవీన్ సినిమా ఉండటం విశేషం. నవీన్ నటనా నవ్వులతో ఈ సినిమా పూర్తి వినోదాత్మకమైన సినిమాగా ప్రేక్షకాదరణ లభించింది. ఈ సందర్భంగా ఆయన గురించి కొన్ని విషయాలు తెలుసుకుందాం.
అతి తక్కువ సినిమాలతోనే ప్రేక్షకుల హృదయాల్లో స్థానం సంపాదించుకున్న అరుదైన నటుల్లో నవీన్ పోలిశెట్టి ఒకరు. ఆయనది హైదరాబాద్. తండ్రి కృష్ణారావు పోలిశెట్టి. మెడికల్ ఫీల్డ్లో వున్నారు. తల్లి మంజుల బ్యాంకు ఉద్యోగి. అన్న ప్రశాంత్, చెల్లి ప్రణీత వున్నారు. ఇద్దరూ యుఎస్లో నివాసం ఉంటున్నారు. నవీన్ కుటుంబం సాధారణమైన మధ్యతరగతి నేపథ్యానికి చెందినది. నవీన్ చిన్నప్పటి నుంచే చదువులో ముందుండేవారు. స్కూల్ దశ నుంచే తనలోని వినోదాత్మకతను ప్రదర్శించేవారు. హైదరాబాద్లోనే ఇంజినీరింగ్ పూర్తిచేసిన ఆయన, కొంతకాలం సాఫ్ట్వేర్ రంగంలో పనిచేశారు.
ఉద్యోగం వదిలి…
చిన్నప్పటి నుంచే స్నేహితులతో కలిసి సినిమాకి వెళ్లేవారు. కొత్త సినిమా విడుదల అయిందంటే.. థియేటర్ల దగ్గర సందడి చేసేవారు. అప్పుడే నటనపై ఆసక్తి కనబరిచారు. కానీ తల్లిదండ్రులు ఒప్పుకోకపోవడంతో.. సాఫ్ట్వేర్ ఉద్యోగానికి వెళ్లారు. అయితే, మనసంతా నటనపైనే ఉండటంతో కొంతకాలానికి ఉద్యోగాన్ని వదిలి, తన కలను నిజం చేసుకునే ధైర్యం చేశారు. ఈ నిర్ణయం ఆయన జీవితంలో కీలక మలుపుగా మారింది. ఇంట్లో తల్లిదండ్రులకు చెప్పారు. నటుడిగా మారాలన్న నిర్ణయాన్ని మొదట వారించారు. తర్వాత ఆయన ప్రతిభను గుర్తించి, సంపూర్ణ మద్దతు ఇచ్చారు. నవీన్ తరచూ ఇంటర్వ్యూలలో ”నా విజయంలో కుటుంబం అండే పెద్ద బలం” అని చెప్పుకుంటారు.
సినిమాలో తొలి అడుగులు..
ఉద్యోగం వదిలిన తర్వాత నవీన్ నటనలో శిక్షణ తీసుకున్నారు. మొదటగా షార్ట్ ఫిలిమ్స్, యూట్యూబ్ వీడియోల ద్వారా తన ప్రతిభను ప్రదర్శించారు. ఆ తర్వాత హిందీ సినిమా ‘చిచ్చోరే’ లో ఒక కీలకపాత్ర ద్వారా వెండితెర పైకి పరిచయమయ్యారు. ఆసిడ్ అనే చిన్న పాత్ర అయినా, సహజమైన యూత్ క్యారెక్టర్తో ప్రత్యేకంగా కనిపించారు. కామెడీ టైమింగ్, ఫ్రెండ్లీ నేచర్ ఆయనను గమనింపజేశాయి. కానీ తెలుగు ప్రేక్షకులకు ఆయనను దగ్గర చేసింది మాత్రం ‘ఏజెంట్ సాయి శ్రీనివాస ఆత్రేయ’ చిత్రం. ఈ సినిమా 2019లో విడుదలైంది. ఈ సినిమాలో ఆయన చేసిన డిటెక్టివ్ పాత్ర ప్రేక్షకులను మంత్ర ముగ్ధులను చేసింది. హాస్యం, ఎమోషన్, ఇన్వెస్టిగేషన్ అన్నీ సమపాళ్లలో మేళవించిన నటనతో కొత్త తరహా హీరోగా గుర్తింపు పొందారు.
జాతిరత్నాలు.. ఆ తరువాత..
సహజంగా మాట్లాడే డైలాగ్ డెలివరీలో ఎక్కడా నటన ప్రదర్శిస్తున్నట్లు అనిపించదు. అదే నవీన్ ప్రత్యేకత. ప్రేక్షకులు పాత్రతో వెంటనే కనెక్ట్ అవుతారు. ఆ తర్వాత ఏజాతిరత్నాలు’ సినిమాలో శ్రీకాంత్ పాత్ర పక్కా కామెడీ హీరోగా మారిపోయిన సినిమా. ముఖాభినయం, శరీరభాష, టైమింగ్ అన్నీ ఈ చిత్రంలో ఆయన ఆయుధాలు. నవ్వు పుట్టించడం మాత్రమే కాదు, పాత్రలోని అమాయకత్వాన్ని కూడా బాగా చూపించారు.
కామెడీ.. ఎమోషన్
‘మిస్ శెట్టి మిస్టర్ పోలిశెట్టి’ చిత్రం 2023లో విడుదలైంది. ఈ సినిమాలో సిద్ధు పోలిశెట్టి పాత్రలో నవీన్ నటించారు. ఇందులో ప్రేమ కామెడీతో పాటు భావోద్వేగ నటనకూ ప్రాధాన్యం ఉంది. ప్రేమ, బాధ్యత, ఆలోచనతో అన్నింటినీ సమతూకంగా చూపించారు. ఈ సినిమాతో కేవలం కామెడీ హీరో కాదు, తనలో ఉన్న సీరియస్ ఎమోషన్ కూడా చేయగలడని నిరూపించారు.
ఇప్పుడు మారీ దర్శకత్వంలో తీసిన ‘అనగనగా ఒక రాజు’ సినిమాలో రాజు పాత్రలో ఆద్యంతం నవ్వులు పూయించారు. థియేటర్లో నవ్వులతో పండగ వాతావరణం వెల్లివిరిసింది. నవీన్ స్నేహపూర్వక స్వభావం కలిగిన వ్యక్తి. సెట్స్లో సహనటులతో, సాంకేతిక బృందంతో సులభంగా కలిసిపోయే గుణం ఆయనకు ఉంది. కామెడీ టైమింగ్ మాత్రమే కాదు, నిజ జీవితంలో కూడా చమత్కారంగా మాట్లాడగలగడం ఆయన ప్రత్యేకత. అందుకే దర్శకులు, రచయితలు ఆయనతో పనిచేయడానికి ఆసక్తి చూపుతుంటారు. భవిష్యత్తులో ఆయన నుంచి ఇంకా ఎన్నో వినూత్నమైన పాత్రలు రావాలని ప్రేక్షకులు ఆశిస్తున్నారు.
స్ఫూర్తి
ఎంత పెద్ద సంక్షోభాన్నయినా కూల్గా ఎదుర్కొనే క్రీడాకారులే స్ఫూర్తి నాకు. అందుకే ఎమ్మెస్ ధోనీ, మెస్సీలని ఆరాధిస్తాను.
నాలో నాకు నచ్చినది…
ఓ సినిమా ఒప్పుకుంటే… స్క్రిప్టు నుంచి డాన్స్ దాకాహొఅన్ని విషయాల్లోనూ జాగ్రత్తలు తీసుకుంటాను. వందకు వెయ్యిశాతం అందులో లీనమై పోతాను. ఆ సమయంలో మరే విషయాన్నీ పట్టించుకోను.హొ
సినిమా కాకుండా…
పర్యటనలంటే చాలా ఇష్టం. మన దేశంలోని చిన్నచిన్న పల్లెలకూ వెళ్లి అక్కడి జీవన విధానాన్ని చూడాలని కోరిక. ఇన్నిరకాల వేషభాషలు కనిపించే దేశం ప్రపంచంలో మరొకటి ఉండదేమో!
– అనంతోజు మోహన్కృష్ణ 88977 65417
