న్యూ ఇయర్‌ రెజల్యూషన్స్‌

న్యూ ఇయర్‌లో అడుగుపెట్టబోతున్నామనే ఆలోచనే యువత నుంచి వద్ధుల దాకా నూతనోత్తేజాన్ని కలిగిస్తుంది. వారం పది రోజుల ముందు నుంచే కొత్త ఏడాది సెలబ్రేషన్స్‌ ఏర్పాట్లతో పాటు, వచ్చే ఏడాదిలో ప్రారంభించాల్సిన పనులు, లక్ష్యాల గురించి ప్లాన్‌లు వేసుకుంటారు. వీటినే రిజల్యూషన్స్‌ అంటారు.
మంచి ఏదైనా సరే, ఎక్కడున్నా సరే స్వీకరిస్తే తప్పేం లేదని చాలా మంది అనుసరిస్తున్నారు కూడా. మనలో ప్రతి ఒక్కరూ ఇప్పుడున్న జీవితంలో ఏదైనా ఒక ప్రత్యేక మార్పు చేయాలనుకుంటే, ఓ ప్రత్యేక రోజు కోసం వెతుకుతారు. ఆ రోజు నుంచి మార్పు దిశగా ప్రయాణం సాగిస్తారు. ఎక్కువ మంది పుట్టిన రోజు, పెళ్లి రోజు లేదంటే ఏదైనా పండగను అందుకు గుర్తుగా పెట్టుకుంటారు.

న్యూ ఇయర్‌ కూడా అలాంటిదే. నూతన ఏడాది అనగానే, ప్రతి ఒక్కరిలో కొత్త ఆలోచనలు, కొంగొత్త ఆకాంక్షలు. ఇబ్బంది పెడుతున్న పాత అలవాట్లను వదిలించుకోవాలని భావించేవారు కొందరైతే, కొత్త విధానాలను అవలంబించాలని నిర్ణయించుకునేవారు మరికొందరు. సాదాసీదాగా సాగిపోతున్న జీవితంలో నూతన సంవత్సరం నుంచి కాస్త జోష్‌ నింపాలని అనుకుంటారు. తమకంటూ ఒక లక్ష్యాన్ని ఏర్పర్చుకోవడం న్యూ ఇయర్‌ నుంచే ప్రారంభిస్తారు.
ఆ రోజు నుంచి కొత్త నిర్ణయాలు అమలు చేయాలని చాలా మంది భావిస్తారు. గతేడాది ఎదురైన వైఫల్యాల నుంచి పాఠాలు నేర్చుకుని కొత్త భవిష్యత్‌కు ప్రణాళికలు వేసుకుని అమలు చేయడం ఆరంభిస్తారు. కొత్త ఏడాదిలో తొలిరోజు సంతోషంగా ఉంటే మిగతా రోజులంతా అలాగే ఉంటామనేది ఓ మానసిక భావన. ఆ రోజు కొత్త రిజల్యూషన్స్‌ను ప్రారంభిస్తే కచ్చితంగా సాధిస్తామని జీవితంలో పెను మార్పులకు ఇది కారణమవుతుందని చాలా మంది నమ్మకం.
పిల్లల నుంచి వద్ధుల దాకా వారి ఆలోచనలను బట్టి, చేయాలనుకున్న పనులను బట్టి రిజల్యూషన్స్‌ను పెట్టుకుంటారు. దానికై శ్రమించి విజయం సాధిస్తారు. రోజు ఏదైనా స్థిరమైన లక్ష్యాలను ఏర్పర్చుకోవాలి. పక్కా ప్రణాళికతో ముందుకు సాగిపోవాలి. మధ్యలో కాస్త అవరోధాలు వచ్చినా పట్టు వదలకుండా పని చేసుకుంటూ పోతే ఫలితాలు తప్పక వస్తాయి.

వేయి మైళ్ల ప్రయాణమైనా ఒక అడుగుతోనే మొదలవుతుందనేది అందరికీ తెలిసిందే. ఈ రిజల్యూషన్స్‌ కూడా అంతే.. ప్రారంభం అనేది జరిగితే అలా చివరిదాకా కొనసాగిస్తే అనుకున్న లక్ష్యం సాధిస్తారు. అలా చేయని వారు మధ్యలోనే చతికిలపడతారు. పరిస్థితుల కారణంగా చాలా మంది ఏడాది ప్రారంభంలో తీసుకున్న రిజల్యూషన్స్‌ అమలు చేయాలేకపోతారు. మరో ఏడాదిలోనైనా వాటిని సాధించాలని, తమ కలను సాకారం చేసుకోవాలని మళ్లీ ప్రయత్నిస్తారు. మలి ప్రయత్నంలో విజేతలుగా నిలిచిన వారు ఎక్కువగానే ఉంటారు.

ఆచరణ సాధ్యమైన లక్ష్యాలను పెట్టుకుని ముందుకు సాగుతే ప్రతి ఒక్కరూ విజయం సాధించొచ్చు. మంచి పని ప్రారంభించడానికి మంచి ముహూర్తం అంటూ ఏదీ ఉండదు. కానీ ఏదో ఒక గుర్తు ఉండాలి. కాబట్టి చాలా మంది న్యూ ఇయర్‌ రోజు కొత్త పనులు, అలవాట్లు ప్రారంభిస్తారు. నేటి తరం యువతకు స్థిరత్వం కాస్త తక్కువ కాబట్టి పెట్టుకున్న లక్ష్యాలకు కట్టుబడి ఉండరు అని చాలా మంది అనుకుంటారు. ఏది ఏమైనా క్యాలెండర్‌ మారినంత మాత్రాన పెట్టుకున్న లక్ష్యాలకు తగినట్టు శ్రమించకపోతే సరైన ఫలితాలు రావు. కనుక ఈ ఏడాది అయినా మీరు అనుకున్నది సాధించేలా ప్రయత్నించండి.