విద్యుత్‌ శాఖపై అవగాహన లేదు

డిప్యూటీ సీఎంవి పొంతన లేని గణాంకాలు
భట్టి విక్రమార్కకు మాజీ మంత్రి హరీశ్‌రావు కౌంటర్‌

నవతెలంగాణ బ్యూరో – హైదరాబాద్‌
విద్యుత్‌ శాఖపై డిప్యూటీ సీఎం మల్లు భట్టి విక్రమార్కకు కనీస అవగాహన లేదని మాజీ మంత్రి హరీశ్‌ రావు విమర్శించారు. రెండేండ్ల నుంచి మంత్రిగా కొనసాగుతున్నా శాఖపై ఆయనకు ఎలాంటి పట్టు రాలేదని ఎద్దేవా చేశారు. ఈ మేరకు శనివారం ఆయన ఒక ప్రకటన విడుదల చేశారు. స్టేట్‌ పవర్‌ సెక్టార్‌ శ్వేతపత్రం, క్లీన్‌ అండ్‌ గ్రీన్‌ ఎనర్జీ పాలసీ-2025లను భట్టి విడుదల చేశారనీ, కానీ శనివారం పవర్‌ పాయింట్‌ ప్రజెంటేషన్‌లో చెప్పిన గణాంకాలకు ఒకదానికొకటి పొంతన లేకుండా ఉన్నాయని తప్పుబట్టారు. తన శాఖకు సంబంధించిన విషయాలపై ఏ మాత్రం అవగాహన లేని డిప్యూటీ సీఎం.. ఇతరులను రాజకీయాలకు పనికి రారంటూ వ్యాఖ్యానిస్తారా? అని ప్రశ్నించారు. కమీషన్లపై ఉన్న శ్రద్ధ పాలసీలపై ఉంటే ఇలాంటి పొరపాట్లు జరగవని ఆయన ఎద్దేవా చేశారు. ”స్టేట్‌ పవర్‌ సెక్టార్‌ శ్వేతపత్రం పేజీ నెంబర్‌ 7లో 2023 డిసెంబర్‌ ఒకటి నాటికి సోలార్‌ కెపాసిటీ 6,123 మెగావాట్లు అని, మొత్తం కాంట్రాక్టెడ్‌ కెపాసిటీ 19,475 అని చెప్పారు.

2025 జనవరి 11న విడుదల చేసిన క్లీన్‌ అండ్‌ గ్రీన్‌ ఎనర్జీ పాలసీ పేజీ నెం.8లో కరెంట్‌ ఇన్టాల్డ్‌ కెపాసిటీ 5,415 మెగావాట్లని అన్నారు. అప్‌ కమింగ్‌ 2,474 అనీ, మొత్తం 7,889 మెగావాట్లు అని తెలిపారు. 2023లో 6,123 మెగావాట్లు ఉంటే 2025 నాటికి 5,415 మెగావాట్లు ఎలా అయ్యింది? పెరుగుతుందా? తగ్గుతుందా?, శనివారం ఇచ్చిన పీపీటీలో చెప్పిన లెక్కలను సైతం గతంలో ప్రకటించిన పాలసీ, శ్వేతపత్రంతో పోల్చి చూసుకున్నారా?” అని హరీశ్‌రావు డిప్యూటీ సీఎంను ప్రశ్నించారు. ”క్లీన్‌ అండ్‌ గ్రీన్‌ ఎనర్జీ పాలసీ పేజీ నెంబర్‌ 8లో తెలంగాణ కరెంట్‌ కాంట్రాక్టెడ్‌ కెపాసిటీ 26,212 మెగావాట్లు అని పేర్కొన్నారు. అదే పాలసీ పేజీ నెంబర్‌ 10లో 2029-30 నాటికి 49,104 మెగావాట్లు అని తెలిపారు. 2034-35కు 66,694 మెగావాట్లు అని తేల్చారు. అంటే నిర్దేశించుకున్న లక్ష్యంలో 2029-30 నాటికి 1,729 (15,893-14,164) మెగావాట్ల థర్మల్‌ పవర్‌ ఉత్పత్తి లక్ష్యంగా పెట్టుకున్నారు.

ఇటీవల ఇచ్చిన క్యాబినెట్‌ నోట్‌ ప్రకారం, 2,400 మెగావాట్ల థర్మల్‌ పవర్‌ ప్లాంట్ల నిర్మాణం లక్ష్యంగా పెట్టుకున్నారు. క్లీన్‌ అండ్‌ గ్రీన్‌ ఎనర్జీ పాలసీని ఎందుకు తుంగలో తొక్కారు? ఏపీ పునర్విభజన చట్టం ప్రకారం, 1,600 మెగావాట్ల ఎన్టీపీసీ పవర్‌ అందుబాటులో ఉండగా, ఆ సంస్థతో ఒప్పందం చేసుకోకుండా ఎందుకు హడావుడిగా 2,400 మెగావాట్ల థర్మల్‌ పవర్‌ ప్లాంట్స్‌ నిర్మాణానికి వెళ్తున్నారు?…” అని మాజీ మంత్రి ప్రశ్నించారు. ఇదంతా రూ.50 వేల కోట్ల బడా స్కాం అని ఆయన విమర్శించారు. ప్రభుత్వ పాలసీకి, భట్టి ఇచ్చిన పీపీటీకి పొంతన లేదని ఆగ్రహం వ్యక్తం చేశారు. బాధ్యతాయుతమైన పదవుల్లో ఉంటూ ప్రజలను తప్పుదోవ పట్టించడాన్ని, ప్రతిపక్ష నాయకులపై దురుసుగా మాట్లాడే పద్దతిని మార్చుకోవాలని భట్టికి సూచించారు. మంత్రి శ్రీధర్‌ బాబు అధికారులు రాసిచ్చిన దాన్ని గుడ్డిగా చదివారని హరీశ్‌ రావు ఆరోపించారు.