పెద్ది బుచ్చమ్మ

పేరు పెద్ది బుచ్చమ్మ
ఊరు కట్టగూరు పక్కన బొల్లేపల్లి
ఇల్లు గడవక పెనిమిటిని ఒప్పించి
మా ఊరికి బతకొచ్చిన ఆడబిడ్డ
గౌండ్ల నర్సయ్య జ్యేష్ఠపుత్రిక
వనాన్ని నమ్ముకున్న
మునిరూపుడు లక్ష్మయ్య
బతుకు గాడెంలోకి వొదిగిపోయి జీవనాన్ని
పావనంగా సాగించిన ధర్మపత్ని-
మనిషి కురుచ, మనసు పొడవాటి
ముఖం ముద్దమందారం, మాట మంత్రముగ్ధం
సొమ్ముకు నిరుపేదైనా
సోపతికి కుబేరుడి చెల్లెలు-
కంఠమా మహేశ్వరుడిలా
లక్ష్మయ్య కావడి జగిట్ల దించంగానే
కల్లుకుండల్ని చుట్టకుదుర్ల మీద పొందబెట్టి
పార్వతీదేవిలా మా ఇంట్లకొచ్చేది-
చెంద్రమ్మా ఏడి మీ నర్సింహులు
బొడ్డుగురిగికి పెదుం ఆనిస్తె చాలు
కల్లు అమతంలా అమ్ముడైతదని
నన్ను ఎట్లున్నోణ్ని అట్లనే పావురంగ
ఎత్తుకుపోయేది
నిత్య అతిథి నేను
బుచ్చెమ్మ గుండె పందిరికి-
కల్లు నురగ కాశ్మీర్‌ మంచులా
కుండల పైఅంచుల్ని కప్పేస్తూ
వాసనలు పొంగేది-
బుచ్చెమ్మను ఇచ్చెంత్రాలడుగుతూవున్న
నా బాలవ్యాకరణాన్ని
లక్ష్మయ్యతాత చిరునవ్వులు సాన బడుతుండె-
నేను కల్లు ముట్టని రోజు
బుచ్చమ్మ సురాభాండం బోణీ కొట్టదు
నేను గురిగి పట్టని దినం
లక్ష్మయ్యతాత మోకు ముస్తాదుకు హుషారుండదు-
తొమ్మిది పదినెలల కానుంచి
బడిలో అడుగుపెట్టిన ఆరోఏడువరకు
ప్రతి పొద్దుట మల్లెలతీర్థం లాంటి
కమ్మటికల్లు తాపుతూ
నన్నో సురామనోహరుడిని చేసిన
కల్పద్రుమం ఆమె- పాలిచ్చిన అమ్మ
కల్లు తాపిన బుచ్చమ్మ
నాకు శైశవం ప్రసాదించిన ఇద్దరు తల్లులు- బుచ్చెమ్మ
మా వూరి తొలి గౌండ్లకవయిత్రి
అర్వపల్లి గుట్టంత ఎత్తూవెడల్పు ఉంటది
ఆమె ఊహాశక్తి-
బొడ్డుగురిగిపట్టి కల్లు తాగుతున్నప్పటి నాకు
రేపల్లెలో కడవలెత్తి వెన్నలారగించిన
చిన్నికష్ణుడికి పోలిక చెప్పేది-
అరచేతిలో అదష్టరేఖ ఉంది
మందను మలుపుకొస్తడు, మందిల గెలిచొస్తడు
ఫికర్‌ జెయ్యకు సాయిలని నాన్నకు
నా నసీబ్‌ వివరించేది-
అమ్మ కలల కుంచెతో వేసిన
నా పసితనపు తైలవర్ణ చిత్తరువుకు
బుచ్చమ్మ ఒక గోల్డ్‌ ఫ్రేమ్‌ –
అమ్మ అడవికి పోయి
నేను పాలకేడ్చినప్పుడు స్తన్యమిచ్చిన మాతమూర్తి-
అన్నం తినిపించేటప్పుడు
బుచ్చెమ్మ స్టీలుపళ్లెం నాకో అక్షయ పాత్ర-
అమ్మ ఉమ్మనీటి మహిమో
బుచ్చెమ్మ తీయటి కల్లు మహిమో
నేను ఆఫీసర్‌ అయితిని-
ఎంతసేపున్నా పొరుగూరు పొరుగూరే కదా
మంచి చెడులకు అల్లుకుపోయే
సొంతూరులా ఉండదు
ఏదో ఓ మూలన పరాయివన్న
ఆక్షేపణ ముల్లులా గుచ్చుకుంటూనే వుంటది లోలోపల-
బుచ్చెమ్మ దంపతులిద్దరూ
పిల్లాపాపలతో వాళ్లూరు వెళ్లిపోయి
పెద్ద కాలమే అయింది-
ఓ సారి ఫోన్‌ చేసి
సంక్రాంతి పండుగకు మా ఊరికి రమ్మన్న
మాట తప్పని బుచ్చెమ్మ ఇంటికొచ్చింది
నిండు బట్టలు పెట్టి
నేనూ నా భార్యాపిల్లలం ఆశీస్సులు తీసుకున్నం
అప్పుడామె శక్తిపీఠం, మాది మహర్లోకం-
మా ఇంట్లో కూరాడు పక్కన దుగుట్ల
ఋచ్చెమ్మ ఇచ్చిన బొడ్డుగురిగిని భద్రంగా దాచి పెట్టిన
కొత్తింటికి మారేటప్పుడూ
అమ్మ భద్రంగానే తెచ్చింది పూజా ద్రవ్యంలా-
కర్కశ కరోనా కాటేసి
ఆ మధ్యన పానమిడిసిందన్న వార్త తెలిసింది
కన్నీట సుడితిరుగుతూ తాటిమొగులు దాటి
బుచ్చెమ్మ అసువిడిసిన తోవల
ఆత్మగీతం ఆలపిస్తూ బొల్లేపల్లికి పయనమైంది
బొడ్డుగురిగి-
– డా.బెల్లి యాదయ్య, 9848392690