పోలవరం బ్యాక్‌ వాటర్‌తో భద్రాచలానికి ముప్పు

పరిష్కారం చేయాల్సిన బాధ్యత కేంద్రానిదే
మోడీ, ట్రంప్‌ స్నేహితులైతే సుంకాలుఎందుకు?
విలేకర్ల సమావేశంలో సీపీఐ(ఎం) రాజ్యసభ ఫ్లోర్‌ లీడర్‌ జాన్‌ బ్రిట్టాస్‌
నవతెలంగాణ-భద్రాచలం
పోలవరం ప్రాజెక్ట్‌ కారణంగా గోదావరి నదీ ప్రవాహం వెనక్కి రావటం వల్ల భద్రాచలం పట్టణమే కాక పరిసర గ్రామాలకు ముప్పు మరింత పెరిగిందని సీపీఐ(ఎం) రాజ్యసభ ఫ్లోర్‌ లీడర్‌ జాన్‌ బ్రిట్టాస్‌ అన్నారు. గోదావరి వరదలు ప్రతి ఏటా భద్రాచల పట్టణాన్ని ముంచెత్తుతున్నాయని, పోలవరం ప్రాజెక్ట్‌ పూర్తి స్థాయిలోకి రాగానే ఈ వరదల తీవ్రత పెరగనుందని ఆందోళన వ్యక్తం చేశారు. భద్రాద్రికొత్తగూడెంజిల్లా భద్రాచలంలోని చందర్రావుభవన్‌లో ఆదివారం నిర్వహించిన పాత్రికేయుల సమావేశంలో ఆయన మాట్లాడారు. పోలవరం బ్యాక్‌ వాటర్‌ నుంచి భద్రాచలం రక్షణ, పునరావాస సమస్య, గ్రామాల విలీనం, స్వాతంత్య్ర దినోత్సవం రోజు ప్రధాని మోడీ బాధ్యతారహితమైన వ్యాఖ్యలు, అంతర్జాతీయ వాణిజ్య సంబంధాలు ఇలా పలు అంశాలపై జాన్‌ బ్రిట్టాస్‌ స్పందించారు. పోలవరం కాపర్‌ డ్యాం వల్ల ప్రజలు ఇప్పటికే జీవనోపాధితో పాటు నష్టాలు, సమస్యలు ఎదుర్కొంటున్నారని తెలిపారు. ఈ సమస్యను కేంద్రం అత్యవసరంగా పరిగణించి నివారణ చర్యలు చేపట్టకపోతే భవిష్యత్తులో భద్రాచలానికి తీవ్ర ముప్పు సంభవిస్తుందని ఆందోళన వ్యక్తం చేశారు. భద్రాచలం శ్రీరాముని దేవాలయం పట్ల కేంద్ర ప్రభుత్వం వివక్ష వీడాలన్నారు.

పరిష్కారం చేయవలసిన బాధ్యత కేంద్రానిదే…
పోలవరాన్ని జాతీయ ప్రాజెక్ట్‌గా కేంద్రం గుర్తించినందున దాని ప్రభావం వల్ల కలిగే ప్రతి సమస్యకు కేంద్ర ప్రభుత్వమే పూర్తి బాధ్యత వహించాలని బ్రిట్టాస్‌ డిమాండ్‌ చేశారు. ఈ ప్రాజెక్ట్‌ వల్ల ముంపు ప్రాంతాలు పెరుగుతున్నా… పునరావాసం ఇంకా పూర్తికాలేదన్నారు. రాష్ట్ర ప్రభుత్వాలను సమన్వయం చేసి సమస్యను పరిష్కరించాల్సిన బాధ్యత కేంద్రానిదేనని స్పష్టం చేశారు.

పరిపాలనా సౌలభ్యం కోసం ఐదు గ్రామపంచాయతీలు భద్రాచలానికి ఇవ్వాలి
భద్రాచలానికి అత్యంత సమీపంలో ఉన్న ఐదు గ్రామపంచాయతీలు పక్క రాష్ట్రంలోని మండలాల్లో ఉండడం వల్ల ప్రజలు అనేక ఇబ్బందులు ఎదుర్కొంటున్నారని బ్రిట్టాస్‌ అన్నారు.
రోజువారీ పనులు విద్య, వైద్యం, రవాణా వంటి అంశాల కోసం ఈ గ్రామాల ప్రజలు భద్రాచలంపైనే ఆధారపడుతున్నప్పటికీ పరిపాలనా పరంగా వెనుకబడి పోతున్నారని ఆయన వ్యాఖ్యానించారు. కేంద్రప్రభుత్వం తలచుకుంటే ఐదు క్షణాల్లో ఐదు గ్రామపంచాయతీలను తెలంగాణలో కలపవచ్చని అన్నారు.

స్వాతంత్య్ర వేడుకల్లో ఆర్‌ఎస్‌ఎస్‌ను పొగడడం ప్రధాని బాధ్యతా రాహిత్యం
స్వాతంత్య్ర దినోత్సవ వేడుకలు భారతదేశ చరిత్రలో అత్యంత గౌరవనీయమైన సందర్భమని అలాంటి వేదికపై ప్రధానమంత్రి ఒక్క సంస్థను మాత్రమే పొగడటం దేశ ప్రజల ఆత్మాభిమానాన్ని దెబ్బతీస్తుందని బ్రిట్టాస్‌ విమర్శించారు. ‘దేశ స్వాతంత్య్ర సంగ్రామంలో కాంగ్రెస్‌, కమ్యూనిస్టులు, రైతు కూలీలు, విద్యార్థులు, మహిళలు అందరూ ప్రాణత్యాగాలు చేశారు.

అనేక మంది విప్లవకారులు ఉరి శిక్షలు ఎదుర్కొన్నారు. ఎంతోమంది ప్రాణాత్యాగం చేశారు. అలాంటి త్యాగాలను స్మరించుకోవాల్సిన స్వాతంత్య్ర దినోత్సవ వేడుకల్లో జాతీయోద్యమంలో ఏ ప్రమేయమూ లేని ఆర్‌ఎస్‌ఎస్‌ను ప్రధాని కీర్తించడం చరిత్రను వక్రీకరించడమే’ అని ఆయన అన్నారు.

మోడీ, ట్రంప్‌ స్నేహితులైతే సుంకాలు ఎందుకు…!
భారత అమెరికా వాణిజ్య సంబంధాలపై మాట్లాడుతూ ప్రధాని మోడీపై బ్రిట్టాస్‌ మండిపడ్డారు. మోడీ ట్రంప్‌తో స్నేహం పెంచుకున్నానని చెబితే ఆ స్నేహం దేశ ప్రయోజనాలకు ఉపయోగపడకపోతే దాని అర్ధం ఏమిటి అని ప్రశ్నించారు. ఇప్పటికీ అమెరికా భారత ఉత్పత్తులపై అధిక సుంకాలు వేస్తోందని అన్నారు. ‘రైతులు, పరిశ్రమలు, చిన్న వ్యాపారులు ఇబ్బందులు పడుతున్నారు. నిజమైన స్నేహం ఉంటే ఈ సుంకాలను తగ్గించేందుకు చర్యలు తీసుకోవాలి. కానీ మోడీ ట్రంప్‌ సంబంధం మాటలకే పరిమితమైంది. అది ప్రజలకు లాభం చేకూర్చలేదని స్పష్టమవుతోంది’ అని బ్రిట్టాస్‌ వ్యాఖ్యానించారు. ప్రజల ప్రయోజనాలను కాపాడేందుకు కేంద్రం తక్షణమే చర్యలు తీసుకోవాలని ఆయన డిమాండ్‌ చేశారు.

ఈ విలేకర్ల సమావేశంలో సీపీఐ(ఎం) రాష్ట్ర కార్యదర్శి వర్గ సభ్యులు పోతినేని సుదర్శన్‌ రావు, పార్టీ జిల్లా కార్యదర్శి మచ్చ వెంకటేశ్వర్లు, పార్టీ రాష్ట్ర కమిటీ సభ్యులు అన్నవరపు కనకయ్య, ఏజే రమేష్‌, పార్టీ జిల్లా కార్యదర్శి వర్గ సభ్యులు కారం పుల్లయ్య, ఎం.బి నర్సారెడ్డి, పార్టీ భద్రాచలం పట్టణ కార్యదర్శి గడ్డం స్వామి, జిల్లా కమిటీ సభ్యులు ఎలమంచి వంశీ కృష్ణ, బండారు శరత్‌ బాబు, పార్టీ పట్టణ కార్యదర్శి వర్గ సభ్యులు వై.వెంకట రామారావు, డి.సీతాలక్ష్మి, పట్టణ కమిటీ సభ్యులు నాదెళ్ల లీలావతి, కుంజ శ్రీనివాస్‌, ఎస్‌.భూపేంద్ర, కే.శ్రీనివాస్‌ తదితరులు పాల్గొన్నారు.