మధ్యాహ్న భోజన వంట సరుకుల ధరలు పెంపు

విద్యాశాఖ సెక్రెటరీ డాక్టర్‌ యోగితారాణా ఉత్తర్వులు జారీ

నవతెలంగాణ బ్యూరో – హైదరాబాద్‌
మధ్యాహ్న భోజనానికి సంబంధించి వంట సరకుల ధరలను రాష్ట్ర ప్రభుత్వం పెంచింది. ఈ మేరకు విద్యాశాఖ సెక్రెటరీ డాక్టర్‌ యోగితారాణా ఉత్తర్వులు జారీ చేశారు. దేశవ్యాప్తంగా ప్రభుత్వ పాఠశాలల్లో పీఎం పోషణ్‌ పథకం కింద మధ్యాహ్న భోజనం వంట ధరలను కేంద్రం పెంచిన విషయం తెలిసిందే. దానికి కొనసాగింపు రాష్ట్రంలోనూ వంట ఏజెన్సీ మహిళలు 1 నుంచి 5 తరగతుల విద్యార్థులకు మధ్యాహ్న భోజనం వండి పెట్టేందుకు కేంద్ర, రాష్ట్ర ప్రభుత్వాలు ఒక్కో విద్యార్థికి రూ.5.45 చొప్పున చెల్లిస్తుండగా దాన్ని రూ.6.19కి పెంచారు. 6 నుంచి 8 తరగతుల పిల్లలకు రూ.8.17 చెల్లిస్తుండగా దాన్ని రూ.9.29కు పెంచారు. 9, 10 తరగతుల విద్యార్థులకు రూ.10.67 నుంచి రూ.11.79కి పెంచారు. ఈ ధరలు గుడ్డును మినహాయించి మిగిలిన వంట సరుకులకిచ్చేవి. కొత్త ధరలు 2024 డిసెంబరు 1వ తేదీ నుంచి వర్తించనున్నది. ఒక్కో విద్యార్థికయ్యే ఖర్చులో కేంద్రం 60 శాతం, రాష్ట్రం 40 శాతం వెచ్చిస్తున్న విషయం విధితమే.