చదివిన విషయాల రివిజన్‌

పరీక్షలు దగ్గరపడగానే చదివిన విషయాలను రివిజన్‌ చేసుకునే సమయం లేదంటూ విద్యార్థులు హైరానా పడిపోతుంటారు. దానికోసం రాత్రులంతా మేల్కొని మరింత ఒత్తిడిని పెంచుకుంటారు. తక్కువ సమయంలోనే విషయాన్ని రివిజన్‌ చేసుకోవటానికి చక్కటి విధానాలెన్నో వున్నాయి.
పరీక్షలొస్తున్నాయంటే కోర్సు మొత్తం ఒకసారి పైనుండి కిందికి తరోగా రివైజ్‌ చెయ్యాలని ప్రతి స్టూడెంటూ అనుకుంటాడు. ఆ మేరకు వారం రోజుల ముందు నుంచో, లేకపోతే 15 రోజుల ముందునుంచో విపరీతంగా చదవడం మొదలెడతారు. ఇక పరీక్ష ముందు రోజు రాత్రికూడా కళ్ళల్లో ఒత్తులేసుకొని మరీ చదువుతారు. ఎగ్జామినేషన్‌ హాల్లోకి వెళ్ళగానే, గట్టిగా ఆవులింతలు మొదలౌతాయి. పరీక్షలముందు రివిజన్‌ మంచిదే. కానీ అది చేసే విధంగా చేయాలి. దీని ప్రాముఖ్యత, పరీక్షల మధ్య టైమ్‌ గ్యాప్‌ లేనపుడు మరీ ఎక్కువగా వుంటుంది. బాగా కష్టపడి చదివే విద్యార్థులు, రివిజన్‌కి తగిన సమయం లేని విద్యార్థులు ఈ కింది సూచనలను ఫాలో అవ్వండి.
ఇలా చేయండి: మీ కోర్సు సంక్షిప్త పాఠాన్ని రాయండి.
ఎందుకంటే: ఇలా చేస్తే, గుర్తు తెచ్చుకోవడం, సమగ్రంగా మలచడం, అలా మలిచిన దాన్ని బుర్రలో పెట్టుకోవడం చక్కగా జరుగుతుంది.
ఇలా చేయండి : కంఠస్థ పెట్టడం వదిలేసి, నోట్సు రాయడం, గ్రాఫ్‌ను గీయడం చెయ్యండి.
ఎందుకంటే : సమయం తక్కువగా వున్నప్పుడు త్వరగా రివిజన్‌ అవ్వాలంటే, ప్రయారిటీలు పెట్టుకోవడం చాలాముఖ్యం.
ఇలా చేయండి : ప్రశాంతంగా, ఆత్మ విశ్వాసంతో వుండండి.
ఎందుకంటే: కల్లోలంగా వున్న మీ చేతనం, దేనినీ గుర్తుకు తెచ్చుకోలేదు.
ఇలా చేయండి : ఒక చాప్టర్ని చదివేటపుడు కాస్సేపు చదివిన తరువాత, చిన్న విరామం ఇవ్వండి. విరామ సమయంలో బాగా రిలాక్స్‌ అవ్వండి. తిరిగి చదవటం మొదలు పెట్టండి.
ఎందుకంటే: చదివిన ప్రతిసారీ మీరు పాఠం మొదలు, చివర భాగాలను మాత్రమే గుర్తుపెట్టుకోగల్గుతారు. ఇలా గ్యాప్‌ ఇచ్చి చదవటం వల్ల ఎక్కువ పాఠం మీకు గుర్తుండిపోతుంది.
ఇలా చేయండి: పరీక్షల్లో రాగల ప్రశ్నల గురించి సమాచారం సేకరించండి.
ఎందుకంటే: మీరు కవర్‌ చేయకుండా వదిలేసిన చాప్టర్లు ఏవో మీకు తెలుస్తాయి.
ఇలా చేయండి: సేకరించిన వి.ఐ.పి. ప్రశ్నల జవాబుల్లో పది ముఖ్యమైన టాపిక్స్‌ తెలుసు కోండి. వాటి సబ్‌-హెడ్డింగులు, బొమ్మలు గ్రాఫులు విశ్లేషించండి.
ఎందుకంటే: రిపీట్‌ చేయడం వల్ల జ్ఞాపకశక్తి పెరుగుతుంది. అంతేకాదు మీరు ఎదురు చూసిన ప్రశ్న, 15 మార్కుల ప్రశ్నలలో ఇవ్వకుండా 5 మార్కుల ప్రశ్నల్లో ఇస్తే సబ్‌-హెడ్డింగుల సారాంశాన్ని మీరు గుర్తు తెచ్చుకుని పరీక్ష రాయగల్గుతారు.
ఇలా చేయండి: మీ ఆరోగ్యం జాగ్రత్తగా వుంచుకోండి.
ఎందుకంటే: సరయిన నిద్ర, ఆహారం లేకపోతే మీకు పరీక్షహాల్లో తల తిరగడు, వికారం లాంటివి ఏర్పడతాయి.
ఇలా చేయండి : ముఖ్యమైన ప్రశ్నలను కాగితం మీద రాసుకోండి.
ఎందుకంటే : ఎగ్జామినేషన్‌ హాల్లోకి వెళ్ళేముందు ఈ చిత్తుప్రతిని సునిశితంగా గమనించండి. తరువాత మీ పుస్తకాన్ని బయటే విడిచిపెట్టి లోపల కూర్చోండి. అదే ప్రశ్న మీకు తగిలినపుడు, ఫ్రెష్‌గా గుర్తుకు తెచ్చుకోగల్గుతారు.
ఇలా చేయండి : హడావిడిగా అప్పటి కప్పుడు గొణగడం.
ఎందుకంటే: అలా చదివిన అంశాలు మీ మెదడులో స్వల్పకాలిక స్మతి పథంలోకి (ూష్ట్రశీత్‌ీ ువతీఎ వీవఎశీతీy) వెళ్తాయి. ఇవి ఎక్కువ గుర్తుండవు. పైగా మీ మెదడులో వున్న ఈ విభాగం ఇప్పటికే బాగా నిండిపోయే వుంటుంది.
ఇలా చేయండి : కష్టంగా వుండే చాప్టర్ల పేర్లను ఒక పుస్తకంలో రాయండి.
ఎందుకంటే: మీకు ఏ చాప్టర్‌ కష్టమో అస్తమాను వెతుక్కోవల్సిన పని వుండదు. ఫలానా చాప్టర్‌ చదివేసిన తరువాత దానిని ఈ పుస్తకంలోంచి తొలగించండి.
ఇలా చేయండి: ‘వర్రీ బుక్‌’ పెట్టండి. మిమ్మల్ని బాధించే సమస్యలన్నిటినీ ఇందులో రాయండి. ప్రతిరోజూ 10 నిమిషాల పాటు ఈ పుస్తకం తీసి, మీరు ‘బాధపడ వల్సిన’ అంశాల గురించి బాధ పడుతూ గడపండి. ఈ పుస్తకాన్ని మూసివేయడంతోనే బాధకు ఫుల్‌ స్టాప్‌ పెట్టేయ్యండి.
ఎందుకంటే: ఆ అంశాలు మిమ్మల్ని ఎప్పుడూ నిరంతరం బాధపెట్టకుండా వుంటాయి.
ఇలా చేయండి : రోజూ చదవాల్సిన దాన్ని బిగ్గరగా చదవండి.
ఎందుకంటే : చదవాల్సిన రీడింగ్‌ మెటీరియల్ని బిగ్గరగా చదవటం వల్ల కైనస్థటిక్‌ యాక్టివిటీ పెరిగి, చదువుతున్న అంశం యధాతధంగా గుర్తుండిపోతుంది. (బిగ్గరగా చదవ టానికి ఎప్పుడూ బిడియపడకండి. మీరు చదువుతున్నది నలుగురికీ విజ్ఞానం పెంచేదే కానీ, ఇబ్బంది కల్గించేది మాత్రం కాదు)
ఇలా చేయండి : మైండ్‌ మ్యాపింగ్‌ చేయండి.
ఎందుకంటే : మైండ్‌ మ్యాపుల వల్ల మీరు అస్తమానూ రివిజన్‌ చేయవల్సిన బాధ తప్పుతుంది. అంతేకాదు రివిజన్‌ను సాధారణంగా మీరు తీసుకునే వ్యవధి కూడా గణనీయంగా తగ్గుతుంది. మైండ్‌ మ్యాపును ఒకసారి పరిశీలనగా చూడగానే ఆ చాప్టర్‌ లేదా వ్యాస రూప జవాబు శాతం మీకు గుర్తుకు వస్తుంది.
ఇలా చేయండి : గంటకొకసారి సబ్జెక్టు మార్చండి.
ఎందుకంటే: ఒకే సబ్జెక్టుకు చెందిన అంశాలను గంటల తరబడి చదువుతూ కూర్చుంటే మీకు, మీ మైండ్‌కు అలసట కల్గుతుంది. రొటీన్‌ ఏర్పడి విసుగు కూడా పుడుతుంది.
తత్ఫలితంగా రివిజన్‌ చేయాలంటే, పైన తెలిపిన సూచనలు మీకు ఎంతో ప్రయోజనకరంగా ఉపయోగపడతాయి.
డా|| హిప్నో పద్మా కమలాకర్‌, 9390044031 కౌన్సెలింగ్‌, సైకో థెరపిస్ట్‌, హిప్నో థెరపిస్ట్‌