నేవీ ఎంహెచ్‌-60ఆర్‌పై అమెరికాతో భారత్‌ ఒప్పందం
న్యూఢిల్లీ : భారత నేవీ ఎంహెచ్‌-60ఆర్‌ హెలి కాప్టర్ల కొనుగోలు, ఐదేండ్ల పాటు నిర్వహణ కోసం రూ.7,995 కోట్లతో అమెరికా ప్రభుత్వంతో భారత రక్షణ మంత్రిత్వ శాఖ ఒప్పందం చేసుకున్నది. ఆగస్టు చివరలో అమెరికా అధ్యక్షుడు డొనాల్డ్‌ ట్రంప్‌ భారతీయ వస్తువులపై 50 శాతం సుంకాల విధింపు తర్వాత రెండు దేశాల సంబంధాల మధ్య నెలకొన్న ఉద్రిక్తతల నేపథ్యంలో..భారత్‌ ఈ ఒప్పందంపై సంతకం చేసింది. లాక్‌హీడ్‌ మార్టిన్‌ కార్పొరేషన్‌ తయారు చేసిన ఎంహెచ్‌-60 ఆర్‌, అత్యాధునిక ఏవియానిక్స్‌, సెన్సా ర్‌లతో బహుళ ఆపరేషన్లకు మద్దతు ఇవ్వడానికి రూపొందించ బడినదిగా అధికారులు తెలిపారు. ఈ హెలికాప్టర్‌ ఎలాంటి వాతావరణాన్నైనా తట్టుకోగల సామర్థ్యం కలిగి ఉన్నదని వివరించారు.
రక్షణమంత్రిత్వ శాఖ వివరాల ప్రకారం.. సస్టైన్‌మెంట్‌ సపోర్ట్‌ అనేది ఒక సమగ్ర ప్యాకేజీ అని, ఇందులో విడిభాగాలు, సహాయక పరికరాలు, ఉత్పత్తి మద్దతు, శిక్షణ, సాంకేతిక సహకారం , భాగాల మరమ్మతు, నిర్వహణ అంశాలు ఉన్నాయని పేర్కొన్నది. ఇది దేశంలోని ఛాపర్‌ల కోసం ఇంటర్మీడియట్‌-స్థాయి కాంపోనెంట్‌ మరమ్మతులు, ఆవర్తన నిర్వహణ తనిఖీ సౌకర్యాలు ఏర్పాటు చేయడానికి కూడా సహకరిస్తుందని అధికారులు చెబుతున్నారు. మొదటి మూడు ఎంహెచ్‌-60ఆర్‌ హెలికాప్టర్లు 2021లో భారతదేశానికి డెలివరీ అయ్యాయని, మిగతా వాటికి ట్రంప్‌ టారిఫ్‌ల అనంతరం భారత్‌ తాజా ఒప్పందం చేసుకున్నది.
