సోషలిస్టు భావజాలం జనబాహుళ్యంలోకి

ప్రముఖ తమిళ యువ దర్శకులు, రచయిత, జర్నలిస్ట్‌ రాజు మురుగన్‌
విశాఖపట్నం నుంచి నవతెలంగాణ ప్రతినిధి
కమ్యూనిస్ట్‌, సోషలిస్టు భావజాలాన్ని విస్తృతంగా జన బాహుళ్యంలోకి తీసుకెళ్లాల్సిన ఆవశ్యకత ఎంతైనా ఉందని ప్రముఖ తమిళ యువ దర్శకులు, రచయిత, జర్నలిస్ట్‌ రాజు మురుగన్‌ ఉద్ఘాటించారు. సీఐటీయూ జాతీయ మహాసభల సందర్భంగా ఎగ్జిబిషన్‌ గ్రౌండ్స్‌లో వారం రోజులుగా జరుగుతున్న ‘శ్రామిక ఉత్సవ్‌’ ముగింపు రోజు శుక్రవారం రాత్రి సభలో ఆయన ముఖ్య అతిథిగా పాల్గొన్నారు. వర్గ పోరాటాలు పెద్ద ఎత్తున నిర్వహించాలని మురుగన్‌ ఆకాంక్షించారు. కళకు ఎల్లలు లేవన్నారు. వీధి నాటిక వైతాళికుడు సఫ్దర్‌ హష్మీని అంతమొందించినా ఆయన వీధి నాటిక సహా ఇతర కళారూపాలేవీ కనుమరుగవ్వలేదని గుర్తుచేశారు. కార్మికుల సమస్యలపై రాజీలేని పోరాటాలు నిర్వహిస్తున్న సీఐటీయూను అభినందించారు. మహనీయులు పుచ్చలపల్లి సుందరయ్య నేతృత్వంలో ఎన్నో ఉద్యమాలు జరిగిన విషయం తనకు తెలుసని చెప్పారు. మరో అతిథి, యువ దర్శకుడు అట్టాడ సృజన్‌ మాట్లాడుతూ జీవన శైలిలో కమ్యూనిస్ట్‌ పద్ధతులు అలవాటు చేసుకోవాలని సూచించారు. సాధారణ జీవనం సైతం ఓ పోరాటంగా మారిందని అభిప్రాయపడ్డారు. శక్తిమంతమైన మీడియా సినిమా అంటూ.. పార్వతీపురం కుట్ర కేసు కథాంశంగా సినిమా తీయాలని తన ఆకాంక్ష అని తెలిపారు. ”కన్యాకుమారి” సినిమా హీరో, హీరోయి న్లు కూడా పాల్గొన్నారు. సభకు అధ్యక్షత వహించిన సీఐటీయూ రాష్ట్ర ఉపాధ్యక్షులు వి.ఉమామహేశ్వరరావు మాట్లాడుతూ శ్రామిక ప్రజల కోసం నిర్వహిస్తున్న బహుముఖ కార్యక్రమాలకు అందరూ సహకరించాలని విజ్ఞప్తి చేశారు.
శుక్రవారానికి ఎంచుకున్న థీమ్‌ ”ఆహార్యం, ఆరోగ్యం, విద్య, ఉపాధి హక్కులకై ఉద్యమిద్దాం”ను సాధించేందుకు పోరాటాలు అనివార్యమని చెప్పారు. విద్యను కొనుక్కునే పరిస్థితి దాపురించిందని ఆవేదన వ్యక్తం చేశారు. ప్రజాస్వా మ్యాన్ని, రాజ్యాంగాన్ని, హక్కుల్ని కాపాడుకోవాల్సి ఉందని గుర్తుచేశారు. సఫ్దర్‌ హష్మీ వర్ధంతి సందర్భంగా ఆయన చిత్ర పటానికి రాజు మురుగన్‌ తొలుత పూలదండ వేసి నివాళులర్పించారు. కార్యక్రమంలో ఎస్‌ఎఫ్‌ఐ రాష్ట్ర కార్యదర్శి ప్రసన్నకుమార్‌, డీవైఎఫ్‌ఐ రాష్ట్ర కార్యదర్శి రామన్న, ప్రజానాట్యమండలి రాష్ట్ర కార్యదర్శి అనిల్‌ కుమార్‌, శ్రామిక ఉత్సవ్‌ కన్వీనర్‌ రమాప్రభ తదితరులు పాలొ ్గన్నారు. సీఐటీయూ రాష్ట్ర నాయకులు ముజఫర్‌ అహ్మద్‌ స్వాగతం పలికారు. ఈ ఏడు రోజులూ నిర్వహించిన ఆయా ఎగ్జిబిషన్ల కన్వీనర్లను అభినందించారు. సీఐటీయూ నాయకులు కుమార మంగళం వందన సమర్పణ చేశారు.