విద్యా నాణ్యత పెంపుకు బోధనాభ్యాసన సామాగ్రి మేళా

నవతెలంగాణ – ఉప్పునుంతల 
ఉప్పునుంతల మండలంలోని జిల్లా పరిషత్ ఉన్నత పాఠశాలలో మండల స్థాయి బోధనాభ్యాసన సామాగ్రి (టి ఎల్ ఎం) మేళా శుక్రవారం ఘనంగా నిర్వహించారు. ఈ కార్యక్రమానికి ముఖ్య అతిథిగా ఎమ్మెల్యే డాక్టర్ చిక్కుడు వంశీకృష్ణ హాజరై, ఉపాధ్యాయులు తయారు చేసిన వినూత్న బోధనా పరికరాలను పరిశీలించారు. ఈ సందర్భంగా ఎమ్మెల్యే మాట్లాడుతూ.. “విద్యా నాణ్యతను పెంచి, విద్యార్థులకు సులభంగా అర్థమయ్యేలా బోధన చేయడమే ఈ మేళా ప్రధాన ఉద్దేశ్యం. వినూత్న బోధనా పద్ధతులను ప్రోత్సహించడం ద్వారా విద్యార్థుల్లో విద్యపై ఆసక్తి పెరుగుతుంది.

తెలంగాణ ప్రజా ప్రభుత్వం విద్యాభివృద్ధికి కృషి చేస్తూ పాఠశాలల్లో మౌలిక వసతులు కల్పిస్తోంది” అని పేర్కొన్నారు. ఈ మేళాలో ఉపాధ్యాయులు సృజనాత్మకంగా రూపొందించిన వివిధ రకాల బోధన పరికరాలు ప్రదర్శించబడ్డాయి. ఇవి విద్యార్థుల అభ్యాసన ప్రక్రియను మరింత సులభతరం చేయడంతో పాటు పాఠాలపై ఆసక్తిని కలిగించే విధంగా ఉన్నాయి. కార్యక్రమంలో ఎంఈఓ, హెచ్ఎంలు, ప్రధానోపాధ్యాయులు, ఉపాధ్యాయులు, విద్యార్థులు తదితరులు పాల్గొన్నారు.