ఇక గందరగోళం ఉండదు
అల్పాహార విందు అనంతరం కర్నాటక సీఎం సిద్ధరామయ్య, డిప్యూటీ సీఎం డీకే శివకుమార్‌
బెంగళూరు : కర్నాటకలో ముఖ్యమంత్రి పదవిపై కాంగ్రెస్‌ రాష్ట్ర అధినాయకత్వంలో కొంతకాలంగా గందరగోళ పరిస్థితులు నెలకొన్న నేపథ్యంలో శనివారం నాడు కీలక పరిణామం చోటుచేసుకున్నది. కాంగ్రెస్‌ అధిష్టానం నుంచి కేసీ వేణుగోపాల్‌ సూచన మేరకు ముఖ్యమంత్రి సిద్ధరామయ్య, ఉపముఖ్యమంత్రి డీకే శివకుమార్‌ శనివారం ప్రత్యేకంగా సమావేశమయ్యారు. ఇరువురు నేతలు కలిసి అల్పాహారం స్వీకరించారు. సిద్ధరామయ్య నివాసంలో జరిగిన ఈ అల్పాహార భేటీతో తమ మధ్య సంబంధాలు బాగానే ఉన్నాయనే విషయాన్ని స్పష్టం చేశారు. అనంతరం ఇరువురు కలిసి మీడియాతో మాట్లాడారు. అధిష్టానం తీసుకునే నిర్ణయానికి తాము కట్టుబడి ఉంటామని స్పష్టం చేశారు. అప్పటి వరకు ఈ విషయంలో ఎలాంటి గందరగోళానికి తావుండదని, ఇక ముందులాగే రాబోయే రోజుల్లోనూ కలిసికట్టుగా పనిచేస్తామని తెలిపారు.
బీజేపీ-జేడీఎస్‌ దుష్ప్రచారం
కాంగ్రెస్‌ నాయకత్వంలో ఏదో జరిగిపోతోందన్నట్లుగా బీజేపీ, జేడీఎస్‌ దుష్ప్రచారం చేస్తున్నాయని సిద్ధరామయ్య పేర్కొన్నారు. తనకు, డీకే శివకుమార్‌కు మధ్య గతంలో ఎలాంటి భేదాభిప్రాయాలు లేవని.. ఇకముందు కూడా ఉండబోవని తెలిపారు. కేసీ వేణుగోపాల్‌ సూచన మేరకు జరిగిన అల్పాహార భేటీ కేవలం గందరగోళానికి తెర దించడానికి మాత్రమే జరిగిందని, ఇందులో ఏ విషయంపైనా చర్చించలేదని ఆయన చెప్పారు. ప్రస్తుతం తమ పార్టీ 2028 ఎన్నికలు, స్థానిక ఎన్నికల పైనే ప్రధానంగా దృష్టిసారించినట్లు తెలిపారు. 2028లో కాంగ్రెస్‌ గెలుపే లక్ష్యంగా పని చేస్తామన్నారు.
వేచివుండడానికి సిద్ధమే : శివకుమార్‌
నాయకత్వం విషయంలో అధిష్టానమే నిర్ణయమే శిరోధార్యమని శివకుమార్‌ పునరుద్ఘాటించారు. ఇంతకాలం తనను పార్టీ పెద్దలు వేచి ఉండాలని సూచించడంతో తాను ఎదురుచూస్తున్నానని, అయితే ఇంకొంతకాలం కూడా వేచి ఉండడానికి తాను సిద్ధమేనని తెలిపారు. తాము పార్టీకి విశ్వాసపాత్రులైన సైనికుల్లా పని చేస్తున్నామన్నారు. ప్రస్తుతం పార్టీ పలు సమస్యలు ఎదుర్కొంటోందని.. 2028లో రానున్న కర్నాటక ఎన్నికల్లో విజయమే లక్ష్యంగా ముందుకు వెళ్తున్నామని ఆయన తెలిపారు. కాగా ఈ సమావేశం అనంతరం డీకే శివకుమార్‌ ఢిల్లీకి వెళ్లారు. కాంగ్రెస్‌ అగ్రనేత రాహుల్‌ గాంధీతోనూ, పార్టీ అధ్యక్షులు మల్లికార్జున ఖర్గేతోనూ ఆయన సమావేశం కానున్నట్లు శివకుమార్‌ సన్నిహితులు తెలిపారు. సామాజిక మాధ్యమాల్లోనూ ఇరువురు నేతలు ఆసక్తికర రీతిలో పోస్టులు పెట్టారు. ‘ ఈ రోజు డీకే శివకుమార్‌తో కలిసి అల్పాహారం స్వీకరించాం. కొంత సేపు కలిసి మాట్లాడుకున్నాం’ అని సిద్ధరామయ్య పోస్టు చేయగా.. ‘రాష్ట్ర ప్రయోజనాల కోసం ఒక ఫలప్రదమైన చర్చ జరిగింది’ అని శివకుమార్‌ తెలిపారు.
