ఇజ్రాయిల్‌ మారణకాండ

ఏకకాలంలో మూడు ప్రదేశాల్లో దాడులు..
ఇరాన్‌, లెబనాన్‌, గాజాలపై నెతన్యాహు యుద్ధోన్మాదం
టెహ్రాన్‌: మధ్యప్రాచ్యంలో కొనసాగుతున్న యుద్ధం విస్తరిస్తోంది. ఇరాన్‌, లెబనాన్‌, గాజాలలో ఏకకాలంలో ఇజ్రాయిల్‌ సైనిక కార్యకలాపాలను ముమ్మరం చేయడంతో పరిస్థితి మరింత ఉద్రిక్తంగా మారింది. దీంతో ఈ ప్రాంతాల్లో మరణాల సంఖ్య పెరుగుతోంది. ఇజ్రాయిల్‌ రక్షణ దళం (ఐడీఎఫ్‌ ) జరుపుతున్న ఈ దాడులు వ్యూహాత్మక ఒత్తిడి పెంచేలా బీభత్సం సష్టిస్తున్నాయి.
నివేదికల ప్రకారం…ఇరాన్‌లోని మౌలిక సదుపాయాలు, సైనిక స్థావరాలతో సహా అనేక కీలక ప్రదేశాలను లక్ష్యంగా చేసుకున్నారు. వైమానిక దాడుల తర్వాత అనేక ప్రాంతాల నుంచి పొగలుపైకి లేవడం కనిపించింది. దీనికి సంబంధించిన నష్టం యొక్క చిత్రాలు వెలువడ్డాయి.
ఇదిలా ఉండగా లెబనాన్‌లోని హిజ్బుల్లా స్థావరాలపై ఇజ్రాయిల్‌ దాడులు కొనసాగు తున్నాయి. దక్షిణ లెబనాన్‌లో జరిగిన బాంబు దాడుల్లో అనేక భవనాలు ధ్వంసమయ్యాయి. పౌర మరణాలు సంభవించినట్టు నివేదికలు వచ్చాయి. దీనికి ప్రతిస్పందనగా, హిజ్బుల్లా కూడా ఉత్తర ఇజ్రాయిల్‌పైకి రాకెట్లను ప్రయోగించింది. దీంతో సరిహద్దు వెంబడి ఉద్రిక్తతలు పెరిగాయి.

లెబనాన్‌పై ఇజ్రాయిల్‌ బాంబులవర్షం
ఇజ్రాయిల్‌, హిజ్బుల్లా మధ్య ఉద్రిక్తతలు తీవ్రమవుతున్నాయి. లెబనాన్‌లో విపత్కర పరిస్థితి నెలకొంది. దక్షిణ లెబనాన్‌ రాజధాని బీరుట్‌లో జరిగిన ఇజ్రాయిల్‌ దాడుల్లో కనీసం 14 మంది మరణించారు. లెబనాన్‌, సిరియా మధ్య ఉన్న ప్రధాన సరిహద్దు మార్గంపై దాడి చేస్తామని ఇజ్రాయిల్‌ బెదిరించటంతో.. దానిని మూసివేసిన మరుసటి రోజే ఈ ఘటన చోటుచేసుకుంది.

ఇరాన్‌ యుద్ధం
బీరుట్‌ దక్షిణ శివారు ప్రాంతాలలో ఆదివారం జరిగిన ఇజ్రాయిల్‌ దాడులలో సుమారు నలుగురు మరణించారు. దక్షిణ లెబనాన్‌లో జరిగిన దాడుల్లో ఒకే కుటుంబానికి చెందిన ఆరుగురు సభ్యులతో సహా 10 మంది మరణించారు.

లెబనాన్‌
లెబనాన్‌ ప్రజారోగ్య మంత్రిత్వ శాఖ ప్రకారం.. బీరుట్‌లోని జనాహ్‌ ప్రాంతంలో జరిగిన ఇజ్రాయిల్‌ దాడిలో మరో 39 మంది గాయపడ్డారు. దేశంలోని అతిపెద్ద ప్రభుత్వ వైద్య సదుపాయమైన రఫిక్‌ హరిరి యూనివర్సిటీ హాస్పిటల్‌కు సుమారు 100 మీటర్ల (330 అడుగుల) దూరంలో ఈ దాడి జరిగిందని ఒక వైద్య వర్గం ఏఎఫ్‌పీ వార్తా సంస్థకు తెలిపింది.

టెహ్రాన్‌పై ఇజ్రాయిల్‌ క్షిపణి దాడి
టెహ్రాన్‌లోని ఇరాన్‌ ప్రభుత్వ మౌలిక సదుపాయాలపై తమ బలగాలు వరుస దాడులను ఇప్పుడే పూర్తి చేశాయని ఇజ్రాయిల్‌ సైన్యం చెబుతోంది. ఇరాన్‌ రాజధాని, చుట్టుపక్కల ప్రాంతాలలో అనేక ఘోరమైన దాడులు జరిగినట్టు ఇరాన్‌ మీడియా నివేదించిన తర్వాత ఇది జరిగింది. నివేదికల ప్రకారం, తూర్పు టెహ్రాన్‌లో కనీసం నలుగురు , టెహ్రాన్‌ ప్రావిన్స్‌లోని బహారెస్తాన్‌ కౌంటీలో మరో 13 మంది మరణించారు.

గాజాలో ఆగని ఇజ్రాయిల్‌ విధ్వంసం
వాఫా న్యూస్‌ ఏజెన్సీ ప్రకారం… గాజా నగరంలోని యర్మౌక్‌ స్టేడియం సమీపంలో పౌరుల సమూహంపై ఆదివారం రాత్రి ఇజ్రాయిల్‌ జరిపిన దాడిలో ఒక పాలస్తీనా పౌరుడు మరణించాడు. పలువురు గాయపడ్డారు. ఖాన్‌ యూనుస్‌కు దక్షిణాన ఉన్న లెమన్‌ ట్రీ ప్రాంతం సమీపంలో ఇజ్రాయిల్‌ దళాలు మరో పాలస్తీనా వ్యక్తిని కాల్చి చంపాయి. అక్టోబర్‌ 2023లో గాజాపై ఇజ్రాయిల్‌ తన దాడిని ప్రారంభించినప్పటి నుంచి సుమారు 72,292 మంది పాలస్తీనియన్లు మరణించారు. ట్రంప్‌ మధ్యవర్తిత్వం చేసి బోర్డ్‌ ఆఫ్‌ పీస్‌ ఏర్పాటు చేసినా..నెతన్యాహు రక్తదాహం తీరటంలేదు.