నీరాను ప్రభుత్వమే ప్రచారం చేయాలి
మద్యం వల్ల జరిగే నష్టాలపై ప్రచారం చేపట్టాలి : కల్లుగీత కార్మిక సంఘం రాష్ట్ర మహాసభ ప్రతినిధుల సభలో ఐద్వా రాష్ట్ర ప్రధాన కార్యదర్శి మల్లు లక్ష్మి
నవతెలంగాణ-సూర్యాపేట
కల్లు గీత వృత్తిని ఆధునీకరించాలని, నీరాపై ప్రచారం కల్పించాలని ఐద్వా రాష్ట్ర ప్రధాన కార్యదర్శి మల్లు లక్ష్మి ప్రభుత్వాన్ని కోరారు. సూర్యాపేట జిల్లా కేంద్రంలోని అంతటి విజరుఫంక్షన్‌ హాల్‌- వర్ధిల్లి బుచ్చి రాములునగర్‌లో జరుగుతున్న కల్లుగీత కార్మిక సంఘం రాష్ట్ర 4వ మహాసభలో శనివారం ఆమె ప్రారంభోపన్యాసం చేశారు. వృత్తిని ఆధునీకరించి, నీరా తాటి, ఈత ఉత్పత్తులను ప్రోత్సహించి యువతి, యువకులకు ఉపాధి కల్పించడంలో కేంద్ర, రాష్ట్ర ప్రభుత్వాలు వైఫల్యం చెందాయని విమర్శించారు. అభివృద్ధి పేరుతో తాటి, ఈత చెట్లను నరికి వేయడం మూలంగా గీత వృత్తి రోజురోజుకూ అంతరిస్తోందని ఆందోళన వ్యక్తం చేశారు.
దేశీయ వస్తువులను వాడండి అని చెబుతున్న ప్రధాని మోడీ.. ప్రకృతి పానీయం నీరా, కల్లును ఎందుకు ప్రోత్సహించడం లేదని ప్రశ్నించారు. సాఫ్ట్‌ డ్రింకులను ఉత్పత్తి చేసే బడా కార్పొరేట్‌ కంపెనీలు ప్రజల నుంచి కోట్లాది రూపాయలు దండుకుంటున్నాయని వివరించారు. వారికి ప్రభుత్వం నుంచి ప్రోత్సాహం లభిస్తోందని, కానీ వృత్తినే నమ్ముకుని జీవిస్తున్న నిరుపేద కల్లుగీత కార్మికులకు ఎలాంటి ప్రయోజనమూ చేకూర్చడం లేదని అన్నారు. పోరాటాల పురిటి గడ్డ సూర్యాపేటలో కల్లుగీత కార్మిక సంఘం రాష్ట్ర నాలుగో మహాసభ జరుపుకోవడం స్ఫూర్తిదాయకమన్నారు. తమ హక్కుల సాధన కోసం కల్లుగీత కార్మిక సంఘం నాయకత్వం ఐక్యంగా ఉద్యమించాలని పిలుపునిచ్చారు.
కాటమయ్య రక్షణ కవచం ఇవ్వాలి కల్లుగీత కార్మిక సంఘం రాష్ట్ర ప్రధాన కార్యదర్శి బెల్లంకొండ వెంకటేశ్వర్లు
రాష్ట్రంలో కోటికి పైగా తాటి, ఈత, చెట్లు ఉన్నాయని, దీని ఆధారంగా రాష్ట్రంలో ఐదు లక్షల కుటుంబాలు జీవిస్తున్నాయని వీరికి కాటమయ్య రక్షణ కవచం ఇవ్వాలని కల్లుగీత కార్మిక సంఘం రాష్ట్ర ప్రధాన కార్యదర్శి బెల్లంకొండ వెంకటేశ్వర్లు డిమాండ్‌ చేశారు. మహాసభలో ఆయన కార్యదర్శి నివేదిక ప్రవేశపెట్టారు. లక్షలాది మందికి ఉపాధి కల్పిస్తున్న కల్లుగీత వృత్తి రక్షణకు రాష్ట్ర ప్రభుత్వం సమగ్ర ప్రణాళికలు రూపొందించాలన్నారు. రాష్ట్ర బడ్జెట్‌లో కల్లుగీత కార్మికుల సంక్షేమం కోసం రూ.60-70 కోట్లు మాత్రమే కేటాయించి, అందులోనూ రూ.25-30 కోట్లు మాత్రమే ఖర్చు చేస్తున్నారని ఆవేదన వ్యక్తం చేశారు. ప్రమాదాల నివారణకు కాటమయ్య రక్షణ కవచం పంపిణీ చేపట్టి సంవత్సరం దాటినప్పటికీ రాష్ట్రవ్యాప్తంగా 20,000 మందికి మాత్రమే ఇచ్చారని తెలిపారు.
కల్లుగీత కార్మికులకు పెన్షన్‌ రూ.4 వేలకు, ఎక్స్‌గ్రేషియా రూ.10 లక్షలు పెంచుతామని ఇచ్చిన హామీలు నీటి మూటలుగా మిగిలిపోయాయన్నారు. యాదాద్రి భువనగిరి జిల్లాలోని నందనములో గత బీఆర్‌ఎస్‌ ప్రభుత్వం హయాంలో నిర్మించిన నీరా, తాటి, ఈత ఉత్పత్తుల పరిశ్రమను నేటికీ ప్రారంభించలేదన్నారు. ప్రతి సొసైటీకీ ఐదు ఎకరాల భూమి ఇవ్వాలని 560 జీవో ఉన్నప్పటికీ అమలు కావడం లేదన్నారు. ఉమ్మడి రాష్ట్రంలో ఇచ్చిన ఈ జీవోను సవరించి తెలంగాణ ప్రభుత్వం కొత్త జీవో ఇవ్వాల్సిన అవసరం ఉందన్నారు. అంతకుముందు మహాసభ ప్రారంభ సూచికంగా కల్లుగీత కార్మిక సంఘం జెండాను సీనియర్‌ నాయకులు పామనగుండ్ల అచ్చాలు ఆవిష్కరించారు. అమరవీరుల స్థూపానికి సీనియర్‌ నాయకులు అబ్బగాని బిక్షం పూలమాల వేసి నివాళి అర్పించారు.
కల్లుగీత కార్మిక సంఘం రాష్ట్ర అధ్యక్షులు ఎంవి.రమణ, రాష్ట్ర ఆఫీస్‌ బేరర్స్‌ బాలగాని జయరాములు, ఎస్‌ రమేష్‌ కుమార్‌, మడ్డి అంజిబాబు, బుర్ర స్వప్న అధ్యక్షవర్గంగా వ్యవహరించారు. సంతాప తీర్మానాన్ని కల్లుగీతకార్మిక సంఘం రాష్ట్ర నాయకులు చౌగాని సీతారాములు ప్రవేశపెట్టారు. ఈ కార్యక్రమంలో కౌడిన్య అమెరికన్‌ ఆఫ్‌ నార్త్‌ ఇండియా అసోసియేషన్‌ చైర్మెన్‌ నాతి శ్రీనివాస్‌ గౌడ్‌, మత్స్యకారులు, మత్స్య కార్మిక సంఘం రాష్ట్ర ప్రధాన కార్యదర్శి లెల్లెల్ల బాలకృష్ణ, కేవీపీఎస్‌ రాష్ట్ర ప్రధాన కార్యదర్శి స్కైలాబ్‌ బాబు, జీఎంపీఎస్‌ రాష్ట్ర ప్రధాన కార్యదర్శి ఉడత రవీందర్‌, బ్యాండు, వాయిద్య కళాకారుల సంఘం రాష్ట్ర కార్యదర్శి నాగరాజు, చేనేత కార్మిక సంఘం రాష్ట్ర అధ్యక్షులు శాంత కుమార్‌ తదితరులు పాల్గొన్నారు.
