సమయం

ప్రపంచంలో అత్యంత విలువైన, శక్తివంతమైనది ఏమైనా ఉంది అంటే అది సమయం. ఎందుకంటే గడిచిన కాలం మళ్ళీ మీకు తిరిగి రాదు. రెప్పవాల్చి తెరిచేలోగా కాలం గడిచిపోతుంది. కాలంతో పరుగులు తీయడం మనిషికి సాధ్యం కాదు. కాలశక్తిని ఆపడం మనిషితరం కాదు. చాలా మంది కాలం కరిగిపోతుంది అనుకుంటారు. కానీ కరిగిపోతుంది కాలం కాదు, మన ఆయుర్ధాయం. నిజమే కదా.. కాలం గడుస్తున్న కొద్ది మనిషి ఆయువు తరిగిపోతుంది కానీ పెరగదు కదా! కాలం మార్పును తెస్తుందని గుర్తించడానికి మనిషి బాల్యం నుంచి కౌమారానికి, కౌమారం నుంచి యవ్వనానికి, యవ్వనం నుంచి వృద్ధాప్య క్రమంగా మార్పు చెందడమే ఉదాహరణ. కనుక సమయాన్ని సద్వినియోగం చేసుకుంటే.. అది మీ జీవితానికి సంబంధించిన అన్ని గాయాలను నయం చేస్తుంది. మీకు కావలసిన విజయాన్ని ఇస్తుంది.
కాలం పాదరసంలా జారిపోతుంది. పట్టుకుందామనుకుంటే దొరకదు. కాలం కర్పూరంలా హరించుకొని పోతుంది. కనుమరుగైన తర్వాత చింతించి లాభం లేదు. అందుకే మన కంటికి ఎదురుగా ఉన్న వర్తమాన కాలం విలువను గుర్తించాలి. మంచి పనులతో ముందుకు సాగాలి. ప్రతి క్షణాన్ని అమూల్యంగా చూడాలి. కృషి చేసే వారికి కాలం ఎంతో విలువైంది. సోమరులకు కాలం విలువ లేనిదిగా కనబడుతుంది. మంచి పనులు చేసేవారికి ఇరవై నాలుగు గంటలూ అవసరమే. సమయాన్ని గౌరవించే వారు తాము చేసే పని రేపటికి వాయిదా వెయ్యరు. పనిని రేపటి కోసం వదిలిపెట్టరు. నిన్నటిది, నేటిది కూడా ఇప్పుడే చేయాలి అని అంటారు పెద్దలు. ఎందుకంటే తర్వాత ఏమి జరుగుతుందో ఎవరికీ తెలియదు. సమయానికి మంచి చెడులుండవు. ఎవరిజీవితంలోనైనా మంచి లేదా చెడు జరగాలంటే అది మీ విజయం, వైఫల్యం మీదనే ఆధారపడి ఉంటుంది. ముఖ్యంగా సమయాన్ని సరిగ్గా ఉపయోగించడం.. దుర్వినియోగం చేయడంపై ఆధారపడి ఉంటుంది.
మీరు ఏదైనా పని చేయాలనుకున్నప్పుడు.. అయ్యో సమయం అయిపోయింది అంటూ చింతిస్తారు. అయితే మీరు చింతిస్తున్నప్పుడు కూడా మీ సమయం అయిపోతోందని మీరు గమనించాలి. ఇలాంటి పరిస్థితుల్లో ఒక్క నిమిషం కూడా వృధా చేయకుండా సమయాన్ని సద్వినియోగం చేసుకోవాలి. ఒక్కరి గుర్తుపెట్టుకోండి జీవితం సంతోషంగా, సుసంపన్నంగా ఉండాలంటే.. సమయాన్ని ఎప్పుడూ వృధా చేసుకోకండి. విజేయులకు సమయం గురించి అవగాహన ఉంటుంది. అందుకే వారు ఎప్పుడూ విజయం సాధిస్తూనే ఉంటారు. ఒక వ్యక్తి సమయం గురించి అర్థం చేసుకునే సమయానికి, అతని విలువైన సమయం గడిచిపోయింది. సమయం అనేది మన కంటికి కనిపించక పోవచ్చు కానీ దాన్ని కోల్పోయినప్పుడు మాత్రం స్పష్టంగా అర్థమవుతుంది. దాని విలువ తెలిసినవాడు ఉపాధ్యాయుడు కాకపోవచ్చు కానీ మనిషికి చాలా నేర్పిస్తుంది.
మరో ముఖ్యమైన విషయం మీ ప్రాముఖ్యతను మీరు అర్థం చేసుకోనంత వరకు, మీ సమయం ప్రాముఖ్యతను కూడా మీరు అర్థం చేసుకోలేరు. మీ సమయం ప్రాముఖ్యతను మీరు అర్థం చేసుకోనంత వరకు, మీరు జీవితంలోని ఏ రంగంలోనూ విజయం సాధించలేరు. మీరు మీ యవ్వనంలో కాలం విలువ తెలుసుకుని మసలుకోక.. అనవసరమైన విషయాల కోసం వృధా చేస్తే.. మీరు వృద్ధాప్యంలో పశ్చాత్తాపపడటానికి ఏమీ మిగలదు. కనుక సమయం చాలా విలువైనది అనే విషయాన్ని గుర్తించండి. అందుకు అనుగుణంగా మీ కార్యాచరణను మొదలుపెట్టండి.