నవతెలంగాణ – హైదరాబాద్: సామాజిక మాధ్యమాల్లో రీల్స్ మోజు యువత ప్రాణాల మీదకు తెస్తోందనడానికి ఓ విషాద సంఘటన మరో నిదర్శనంగా నిలుస్తోంది. బెంగళూరులోని పరప్పన అగ్రహార ప్రాంతంలో నిర్మాణంలో ఉన్న భవనం 13వ అంతస్తు నుంచి పడి 20 ఏళ్ల యువతి మృతి చెందింది. రీల్ చిత్రీకరిస్తుండగా ఈ ప్రమాదం జరిగిందని పోలీసులు ప్రాథమికంగా నిర్ధారించారు.
పోలీసులు తెలిపిన వివరాల ప్రకారం, మృతురాలు బీహార్‌కు చెందిన యువతిగా గుర్తించారు. ఆమె నగరంలోని ఒక షాపింగ్ మాల్‌లో ఉద్యోగం చేస్తోంది. బుధవారం రాత్రి కొందరు స్నేహితులతో కలిసి ఆమె ఆ నిర్మాణంలో ఉన్న భవనానికి లేట్ నైట్ పార్టీ కోసం వెళ్లింది. పార్టీ అనంతరం, వారి మధ్య ఒక ప్రేమ వ్యవహారానికి సంబంధించి గొడవ జరిగినట్లు సమాచారం.
ఈ వాగ్వాదం తర్వాత, ఆ యువతి తీవ్ర మనస్తాపంతో పై అంతస్తుకు వెళ్లిందని, అక్కడ విచారకరమైన రీల్ చిత్రీకరించే ప్రయత్నంలో అదుపుతప్పి ప్రమాదవశాత్తూ లిఫ్ట్ షాఫ్ట్ కోసం వదిలిన ఖాళీ ప్రదేశం నుంచి కిందపడిపోయిందని పోలీసులు భావిస్తున్నారు. తీవ్ర గాయాలపాలైన ఆమె అక్కడికక్కడే మృతి చెందింది. ఈ ఘటన జరిగిన వెంటనే ఆమె స్నేహితులు అక్కడి నుంచి వెళ్లిపోయారు.
ఈ ఘటనపై సౌత్ ఈస్ట్ డీసీపీ ఫాతిమా స్పందిస్తూ, “వారు ఆ భవనంలో పార్టీ చేసుకున్నారు. తర్వాత రీల్స్ చిత్రీకరించడానికి పై అంతస్తుకు వెళ్లారు. ఆ సమయంలో ఆమె జారిపడి మరణించింది. ప్రేమ వ్యవహారమే ఈ ఘటనకు దారితీసిందా లేదా అనే విషయంపై ఇంకా స్పష్టత లేదు. అన్ని కోణాల్లో దర్యాప్తు చేస్తున్నాం. అనుమానాస్పద మృతి (యూడీఆర్) కింద కేసు నమోదు చేశాం” అని తెలిపారు. పరప్పన అగ్రహార పోలీసులు ఈ ఘటనకు దారితీసిన పరిస్థితులపై లోతుగా విచారణ జరుపుతున్నారు. యువతి స్నేహితుల కోసం గాలిస్తున్నారు.
