బీబీ నగర్ వద్ద రోడ్డు ప్రమాదంలో ఇద్దరు మృతి

నవతెలంగాణ – హైదరాబాద్: యాదాద్రి భువనగిరి జిల్లాలో విషాదకర రోడ్డు ప్రమాదం జరిగింది. బీబీ నగర్ చెరువుకట్టపై ఒక థార్ వాహనం బీభత్సం సృష్టించి ఇద్దరి ప్రాణాలను బలిగొంది. అతివేగంతో అదుపుతప్పిన వాహనం పాదచారులపైకి దూసుకెళ్లడంతో ఈ దుర్ఘటన సంభవించింది. వివరాల్లోకి వెళితే, బీబీ నగర్‌లోని చెరువుకట్టపై వేగంగా వస్తున్న ఒక థార్ వాహనం అకస్మాత్తుగా అదుపుతప్పింది. దీంతో అక్కడ ఉన్న పలువురిని ఢీకొట్టింది. ఈ దుర్ఘటనలో ఒక యువకుడు అక్కడికక్కడే తీవ్ర గాయాలతో మృతి చెందాడు. అదే సమయంలో వాహనం ఢీకొట్టిన ధాటికి మరో యువతి సమీపంలోని చెరువులో పడిపోయింది. నీటిలో మునిగి ఆమె కూడా ప్రాణాలు కోల్పోయింది. ఈ అనూహ్య ఘటనతో చెరువుకట్ట ప్రాంతంలో ఒక్కసారిగా భయాందోళన వాతావరణం నెలకొంది. స్థానికుల సమాచారంతో పోలీసులు వెంటనే ఘటనాస్థలానికి చేరుకున్నారు. మృతదేహాలను వెలికితీసి పోస్టుమార్టం నిమిత్తం ఆసుపత్రికి తరలించారు. ఈ ఘటనపై కేసు నమోదు చేసి దర్యాప్తు చేస్తున్నట్లు పోలీసులు తెలిపారు. అతివేగమే ప్రమాదానికి కారణమని ప్రాథమికంగా పోలీసులు భావిస్తున్నారు.