నడక కాస్త వేగంగా..

క్రమం తప్పకుండా నడిస్తే మధుమేహం వచ్చే అవకాశం తగ్గుతుందని, మధుమేహం వచ్చినా గ్లూకోజు అదుపులో ఉంటుందని తెలిసిన విషయమే. అయితే ఇంకాస్త వేగంగా నడిస్తే మరింత ఎక్కువ ప్రయోజనం పొందొచ్చని నిపుణులు చెబుతున్నారు. వ్యాయామం, నడక ఆరోగ్యానికి ఎంతో మేలు చేస్తాయనటంలో సందేహం లేదు. రోజుకు 2,500 అడుగులేసినా గుండెజబ్బుతో మరణించే ముప్పు తగ్గుతున్నట్టు ఆరోగ్య నిపుణులు అంటున్నారు. అంతేకాదు.. రోజుకు సుమారు నాలుగు వేల అడుగులు నడిస్తే మధుమేహంతో పాటు ఇతరత్ర జబ్బులతో చనిపోయే ప్రమాదం తగ్గుతుందంటున్నారు. వారానికి 150 నిమిషాల సేపు.. ముఖ్యంగా మధ్యాహ్నం వేళ ఏరోబిక్‌, రెసిస్టెన్స్‌ వ్యాయామాలు చేసేవారికి మధుమేహం ముప్పు తగ్గుతున్నట్టు ఇటీవల ఓ అధ్యయనంలో వెల్లడైంది. కేవలం వ్యాయామం, ఆహార నియమాలతోనే 61శాతం వరకు మధుమేహం వెనక్కి మళ్లుతున్నట్టు ఇంకో పరిశోధన తెలిపింది. ఈ నేపథ్యంలోనే వ్యాయామ వేగం మీద అంతర్జాతీయ పరిశోధకులు తాజాగా దష్టి సారించారు. గంటకు 3 కిలోమీటర్ల వేగంతో నడిచేవారితో పోలిస్తే గంటకు 5-6 కిలోమీటర్ల వేగంతో నడిచేవారికి మధుమేహం ముప్పు 24శాతం తక్కువగా ఉంటున్నట్టు గుర్తించారు. అలాగని తక్కువ వేగంతో నడిస్తే లాభం లేదని కాదు. వీరికి కూడా మధుమేహం వచ్చే అవకాశం 15శాతం తక్కువగానే ఉంటోంది. ఇంకాస్త వేగంగా.. అంటే గంటకు 6 కిలోమీటర్ల కన్నా ఎక్కువ వేగంతో నడిచేవారికైతే 39శాతం వరకు ముప్పు తగ్గుతోంది. నిజానికి గంటకు ఒక కిలోమీటరు వేగం పెరుగుతున్నకొద్దీ మధుమేహం ముప్పు 9శాతం తగ్గుతోందని పరిశోధకులు చెబుతున్నారు. ఎంత వేగానికి అంత ప్రయోజనమన్నమాట. మరి నడుస్తున్నప్పుడు వేగాన్ని ఎలా కొలుచుకోవాలని అనుకుంటున్నారా? గంటకు 8వేల అడుగులు వేస్తే 6 కిలోమీటర్ల వేగంతో నడుస్తున్నట్టే అనుకోవచ్చు.