కారు ఢీకొని వాటర్‌ ట్యాంకర్‌ డ్రైవర్‌ మృతి

కేపీహెచ్‌బీ మెట్రో స్టేషన్‌లో సంపు నింపుతుండగా ఘటన

నవతెలంగాణ-కేపీహెచ్‌బీ
కారు ఢీకొనడంతో వాటర్‌ ట్యాంకర్‌ డ్రైవర్‌ మృతిచెందారు. ఈ ఘటన మేడ్చల్‌ మల్కాజిగిరి జిల్లా కేపీహెచ్‌బీ పోలీస్‌ స్టేషన్‌ పరిధిలో చోటుచేసుకుంది. పోలీసులు తెలిపిన వివరాల ప్రకారం.. బండి సంతోష్‌ కుమార్‌(44) తన భార్య మంజుల, కుమారునితో కలిసి కొంతకాలంగా ఉప్పల్‌లోని తిరుమల మెడోస్‌ కాలనీలో నివాసమంటున్నాడు. స్టాన్లీ ఇంజినీరింగ్‌ కళాశాలలో సంతోష్‌ బస్సు డ్రైవర్‌గా పనిచేస్తున్నాడు. దాంతోపాటు రాత్రి సమయాల్లో వాటర్‌ ట్యాంకర్‌ నడుపుతూ కుటుంబాన్ని పోషించుకుంటున్నాడు. కాగా, శుక్రవారం రాత్రి 8:30 నిమిషాలకు వాటర్‌ ట్యాంకర్‌ డ్రైవింగ్‌కు వెళ్తున్నానని ఇంట్లో చెప్పి బయలుదేరాడు.

శనివారం ఉదయం అతను కూకట్‌పల్లి నుంచి మియాపూర్‌ మార్గంలో ట్యాంకర్‌ను పక్కకు ఆపి కేపీహెచ్‌బీ మెట్రో స్టేషన్‌లో సంపును నింపుతుండగా వెనుక నుంచి హౌండా వెర్నా కారు అతన్ని ఢీకొట్టింది. దాంతో సంతోష్‌ అక్కడికక్కడే మృతిచెందాడు. అనంతరం వాటర్‌ ట్యాంకర్‌ యజమాని వెంకట్‌ ద్వారా సమాచారం తెలుసుకున్న సంతోష్‌ భార్య కేపీహెచ్‌బీ పోలీసులకు ఫిర్యాదు చేసింది. సాయి కిరణ్‌ అనే వ్యక్తి కారును అతివేగంగా, నిర్లక్ష్యంగా నడిపి తన భర్త మరణానికి కారణమయ్యాడని ఆవేదన వ్యక్తం చేసింది. నిందితుడిని పోలీసులు అదుపులోకి తీసుకుని కేసు దర్యాప్తు చేస్తున్నారు.