భారీ వర్షాలు కురిసినప్పుడు రహదారులు నీటము నగడం, వాగులు పొంగిపొర్లడం, అగ్నిప్రమాదాల్లో ఇళ్లు బూడిద కావడం వంటి ఘటనలు ప్రజల జీవితాలను తీవ్రంగా ప్రభావితం చేస్తాయి. ప్రకృతి వైపరీత్యాలను పూర్తిగా నివారిం చడం సాధ్యం కాకపోయినా, ముందస్తు జాగ్రత్తలు, అప్రమ త్తత, సరైన ప్రణాళికలతో ప్రాణ, ఆస్తి నష్టాలను తగ్గించవచ్చు. ప్రతి సంవత్సరం అక్టోబర్ 13న అంతర్జాతీయ విపత్తుల ప్రమాద నివారణ దినోత్సవాన్ని నిర్వహిస్తారు. ఐక్యరాజ్య సమితి ఆధ్వర్యంలో జరిగే ఈ కార్యక్రమం ప్రజల బాధ్యతను గుర్తుచేస్తుంది. 2026లో ఇంటి నుంచే విపత్తులను తట్టుకునే సామర్థ్యాన్ని పెంపొందించుకోవడానికి ప్రాధాన్యం ఉంది.
తుపానులు, వరదలు, భూకంపాలు, కరువులు, కొండచరియలు విరిగిపడటం, అగ్నిప్రమాదాలు, పారిశ్రామిక ప్రమాదాలు, భవనాల కూలిపోవడం వంటి ఘటనలు తీవ్ర నష్టాన్ని కలిగిస్తాయి. చెరువుల ఆక్రమణలు, కాలువల్లో చెత్త వేయడం, ప్రమాదకర ప్రాంతాల్లో నిర్మాణాలు చేపట్టడం ముప్పును పెంచుతాయి. తెలంగాణలో వర్షాకాలంలో లోతట్టు ప్రాంతాలు నీటమునగకుండా నీటి ప్రవాహ మార్గాలను కాపాడాలి. కాలువలను శుభ్రంగా ఉంచుతూ, ప్రమాదకర విద్యుత్‌ తీగలు, విరిగిన స్తంభాల గురించి అధికారులకు సమాచారం అందించాలి.వాతావరణ శాఖ, ప్రభుత్వ విభాగాలు జారీ చేసే హెచ్చరికలను నిర్లక్ష్యం చేయకూడదు. సామాజిక మాధ్యమాల్లో వచ్చే నిర్ధారణలేని సమాచారాన్ని నమ్మకుండా అధికారిక సమాచారం ఆధారంగా నిర్ణయాలు తీసుకోవాలి. వరద నీటితో నిండిన రహదారులు, ఉప్పొంగుతున్న వాగులను దాటేందుకు ప్రయత్నించకూడదు. నీటి ప్రవాహ వేగం ప్రాణాలకు ముప్పుగా మారవచ్చు.
ప్రతి కుటుంబం అత్యవసర ప్రణాళికను రూపొందించుకోవాలి. ప్రమాద సమయంలో ఎక్కడికి వెళ్లాలి, ఎవరిని సంప్రదించాలి అనే విషయాలను కుటుంబ సభ్యులకు తెలియజేయాలి. ముఖ్యమైన పత్రాలు, మందులు, తాగునీరు, ఆహారం, టార్చ్‌లైట్‌, బ్యాటరీలు, ప్రథమ చికిత్స సామగ్రిని అందుబాటులో ఉంచుకోవాలి. దెబ్బతిన్న విద్యుత్‌ తీగలను మార్చడం, గ్యాస్‌ లీకేజీలను నిర్లక్ష్యం చేయకపోవడం, భవనాల్లో అత్యవసర నిష్క్రమణ మార్గాలను గుర్తించడం అవసరం. ప్రమాద సమయంలో లిఫ్టులకు బదులుగా సూచించిన సురక్షిత మార్గాలను అనుసరించాలి.పాఠశాలలు, కళాశాలల్లో విపత్తులపై ఆచరణాత్మక శిక్షణ ఇవ్వాలి. గ్రామ పంచాయతీలు, పట్టణ స్థానిక సంస్థలు సురక్షిత తరలింపు మార్గాలు, సహాయక కేంద్రాలను సిద్ధం చేసుకోవాలి. స్థానిక యువతకు ప్రథమ చికిత్స, సహాయక చర్యలపై శిక్షణ అందించాలి. మహిళా సంఘాలు, స్వచ్ఛంద సంస్థలు సమన్వయంతో పనిచేయాలి. విపత్తుల సమయంలో వృద్ధులు, వికలాంగులు, చిన్నపిల్లలు, ఆర్థికంగా బలహీనమైన కుటుంబాలకు ప్రత్యేక సహాయం అందించాలి.
ప్రభుత్వాలు ముందస్తు హెచ్చరిక వ్యవస్థలు, వరద నియంత్రణ చర్యలు, అగ్నిమాపక సేవలు, అత్యవసర వైద్య సదుపా యాలను సమర్థంగా నిర్వహించాలి. భవన భద్రతా ప్రమాణాలను అమలు చేస్తూ చెరువులు, కాలువలు, అడవులు, సహజ నీటి ప్రవాహ మార్గాలను పరిరక్షించాలి. సమాచారం ప్రజలకు అర్థమయ్యే భాషలో సమయానికి చేరాలి. తప్పుడు వార్తలను వ్యాప్తి చేయకుండా సమాచార విశ్వసనీయతను నిర్ధారించుకోవాలి. అత్యవసర పరిస్థితుల్లో ప్రజలు అధికారుల సూచనలను పాటిస్తూ సహాయక చర్యలకు ఆటంకం కలిగించకూడదు. ప్రతి ప్రాంతంలో ప్రమాదాలపై అవగాహన కార్యక్రమాలు నిర్వహించడం వల్ల ప్రజలు మరింత అప్రమత్తంగా ఉండగలరు.విపత్తుల అనంతరం బాధితులకు ఆహారం, తాగునీరు, మందులు, పునరావాసం, ఆర్థిక తోడ్పాటు, మానసిక మద్దతు కల్పించాలి. ఇళ్లు, పాఠశాలలు, ఆరోగ్య కేంద్రాలను పునరుద్ధరించాలి. గత అనుభవాల నుంచి పాఠాలు నేర్చుకొని ప్రమాదాలు పునరావృతం కాకుండా చర్యలు చేపట్టాలి.
విపత్తుల సమయంలో సమాచార వ్యవస్థలు దెబ్బతినకుండా ప్రత్యామ్నాయ ఏర్పాట్లు చేసుకోవాలి. స్థానికంగా అందుబాటులో ఉన్న వనరులను గుర్తించి అవసరమైనప్పుడు వినియోగించుకోవాలి. ప్రజలు విపత్తులపై అవగాహన పెంచుకొని క్రమం తప్పకుండా భద్రతా చర్యలను అభ్యసించాలి. సమష్టి కృషి, ముందస్తు ప్రణాళికతో విపత్తుల ప్రభావాన్ని మరింత తగ్గించవచ్చు. విపత్తుల నివారణ ప్రభుత్వాల బాధ్యత మాత్రమే కాదు. ప్రతి పౌరుడు అప్రమత్తంగా ఉంటూ పొరుగు వారికి సహకరించాలి. ఇంటి నుంచి ప్రారంభమైన భద్రతా చర్యలు సమాజమంతటికీ విస్తరించినప్పుడు విపత్తుల నష్టాన్ని తగ్గించి అనేక ప్రాణాలను కాపాడవచ్చు. విపత్తు వచ్చిన తరువాత స్పందించడం కంటే, అది రాకముందే జాగ్రత్తలు తీసుకోవడం అత్యంత ముఖ్యం.
చిటికెన కిరణ్ కుమార్, 9490841284
కామెంట్‌లు (0)