సీపీఐ(ఎం) జిల్లా కార్యదర్శి వర్గ సభ్యులు బండ శ్రీశైలం
నవతెలంగాణ – చండూరు
స్థానిక సంస్థల ఎన్నికల్లో ప్రజా సమస్యల పరిష్కారం కోసం నిరంతరం పోరాడుతున్న సీపీఐ(ఎం) బలపర్చిన అభ్యర్థులను గెలిపించాలని సీపీఐ(ఎం) జిల్లా కార్యదర్శి వర్గ సభ్యులు బండ శ్రీశైలం కోరారు. ఆదివారం చండూరు మండల పరిధిలోనినేర్మట గ్రామంలో ఏర్పాటు చేసిన సమావేశంలో ఆయన మాట్లాడారు. ప్రజల పక్షాన పోరాడే కమ్యూనిస్టులను గెలిపించుకోవాలని, ధనబలం కాదు, ప్రజాబలం ముఖ్యమని అన్నారు.
అభివృద్ధి, సంక్షేమ పనుల కోసం పోరాడే కమ్యూనిస్టు కార్యకర్తలను ఎన్నుకోవడం ద్వారా గ్రామాల అభివృద్ధికి బాటలు వేయాలని సూచించారు. ఎన్నికల్లో ఓటర్లు ప్రలోభాలకు లోనుకాకుండా, ప్రజల కోసం పనిచేసే మంచి అభ్యర్థులను ఎన్నుకోవాలని ఆయన అన్నారు. పేద ప్రజల కోసం నిరంతరం పోరాడే కమ్యూనిస్టులను గెలిపించుకోవాల్సిన అవసరం ఎంతైనా ఉందన్నారు. నేర్మట గ్రామంలో సీపీఐ(ఎం) అభ్యర్థులు నాలుగు వార్డులకు పోటీ చేశారని, వీరి గెలుపే లక్ష్యంగా పనిచేయాలని ఆయన సీపీఐ(ఎం) కార్యకర్తలకు ఆయన సూచించారు. ఈ కార్యక్రమంలో సీపీఐ(ఎం)చండూరు మండల కార్యదర్శి జెర్రిపోతుల ధనంజయ, ఈరటి వెంకటయ్య, బల్లెం స్వామి, బల్లెం కవిత, సైదులు,తదితరులు పాల్గొన్నారు.
